«فوليانت» باسپاسى وسى جىلى العاش رەت قازاق تىلىندە شىعاتىن كىتاپتار ءتىزىمىن جاريالادى

قازاق وقىرماندارىن الەم ادەبيەتىنىڭ بەستسەللەر كىتاپتارىمەن تانىستىرۋدى ماقسات ەتكەن «فوليانت» باسپاسى بيىل رەي برەدبەريدىڭ «فارەنگەيت بويىنشا 451 گرادۋس», دجون رونالد رۋەل تولكيننىڭ «ساقينالار ءامىرشىسى», ستيۆەن كينگتىڭ «سول», «جاسىل ميل», «ريتا حەيۆورت جانە شوۋشەنكتەن قاشۋ», گۋزەل ياحينانىڭ «زۇلەيحانىڭ ويانۋى», حالەد حوسسەينيدىڭ «باتپىراۋىق قۋعان بالا», كەن كيزيدىڭ «جىندىلار ۇيىندەگى جانجال», لۋيزا مەي ولكوتتتىڭ «كىشكەنتاي حانىمدار», شارلوتتا برونتەنىڭ «دجەين ەير», دجو ديسپەنزانىڭ ء«تۇپسانا كۇشى», گەربەرت ۋەللستىڭ «كورىنبەيتىن ادام», احمەت ءۇمىتتىڭ «ىستامبۇل ەستەلىكتەرى», دجون ستەينبەكتىڭ «تىشقان مەن ادام حاقىندا», ء«ىنجۋ-مارجان», كلايۆ ستەيپلز ءليۋيستىڭ «ارىستان, سيقىرشى جانە كيىم شكاف», روبەرتو ءريچچيدىڭ «قىزىل ارلەكين», مياسە سەرتبارۋتتىڭ «سىر جاسىرعان تۇمان» تۋىندىلارىن جارىققا شىعارۋدى جوسپارلاپ وتىر.

باسپا وكىلى ديانا يسابەكوۆا اتالعان الەمدىك بەستسەللەرلەر اۆتورلارى وكىلدەرىمەن اۆتورلىق قۇقىق تۋرالى ماسەلەلەر تولىعىمەن اياقتالىپ, قازىرگى تاڭدا اتالعان كىتاپتاردىڭ ءتارجىمالانىپ جاتقانىن, رەداكتسيالىق جۇمىستارى باستالىپ كەتكەنىن ايتىپ ءوتتى. «فوليانت باسپاسىنان جارىق كورەتىن بۇل تۋىندىلاردى اۋدارۋعا تاجىريبەلى اۋدارماشىلار, ادەبيەتتانۋشىلار تارتىلدى. كىتاپ اۋدارماسى, ونى باسىپ شىعارۋ – اۋدارماشى, رەداكتور, كوررەكتور, ديزاينەر, زاڭگەر, كەڭەسشى, سونداي-اق تەحنيكالىق توپتى بىرىكتىرەتىن كۇردەلى شىعارماشىلىق پروتسەسس. جۋىردا جارىق كورەتىن تۋىندىلار قازاق وقىرماندارىنىڭ كوڭىلىنەن شىعادى دەپ سەنەمىز», دەدى ديانا يسابەكوۆا.  

ەستەرىڭىزگە سالساق, «فوليانت» باسپاسىنىڭ باستاماسى بويىنشا الەم ادەبيەتىنىڭ التىن قازىناسىنا اينالعان حالەد حوسسەينيدىڭ «جارقىراعان مىڭ كۇن», مو ياننىڭ ء«ومىر مەن ءولىم ازابى», ورحان پامۋكتىڭ «اق قامال», «سەزىم مۋزەيى», «مەنىڭ اتىم قىرمىزى», «مەنىڭ وعاش ويلارىم», ء«ۇنسىز ءۇي»  تۋىندىلارى قازاق تىلىندە جارىق كورگەن بولاتىن. ناۋرىز ايىندا شۆەتسيا كورولدىگىنىڭ قازاقستان رەسپۋبليكاسىنداعى ەلشىلىگىمەن بىرلەسە, الەمگە تانىمال شۆەد جازۋشىسى استريد ليندگرەننىڭ تۇڭعىش رەت قازاق تىلىنە اۋدارىلعان «ۇزىنش ۇلىق پيپپي» كىتابىنىڭ تۇساۋكەسەرى ءوتتى.