بىرنەشە ەلدە 88 قازاقتىلدى باق-تىڭ دەرەكقور بازاسى جاسالدى

م.سارباسوۆ وتانداستار قورى جانىنداعى قوعامدىق كوميسسيا وتىرىسىندا: «2020 جىلعى قاڭتاردان جەلتوقسان ايىنا دەيىن «شەتەلدىك جانە قازاقستان رەسپۋبليكاسىنا كوشىپ كەلگەن ەتنيكالىق قازاقتاردى قولداۋدى قامتاماسىز ەتۋ قىزمەتتەرى» اياسىندا قر اقپارات جانە قوعامدىق دامۋ مينيسترلىگىنىڭ مەملەكەتتىك تاپسىرماسى ورىندالدى. زەرتتەۋ اياسىندا جالپى 11 مەملەكەتتەگى 88 قازاقتىلدى باق پەن قانداستارىمىز قولداناتىن الەۋمەتتىك جەلىدەگى توپتاردىڭ دەرەكقور بازاسى جاسالدى. سونىڭ ىشىندە 14 گازەت, 14 جۋرنال, 5 تەلەارنا, 11 سايت, 5 راديو, الەۋمەتتىك جەلىدە 39 توپتىق پاراقشالار بار. بيىل وسى شەتەلدەگى قازاقتىلدى باق بىرلەستىگىن قۇرۋدى جوسپارلاپ وتىرمىز», دەپ ايتىپ ءوتتى.

وسى اقپارات قۇرالدارىندا جاريالانعان ماتەريالدارعا مونيتورينگ جاساپ, سارالاۋ ناتيجەسىندە بىرقاتار وزەكتى ماسەلە انىقتالدى.

«كورشىلەس الىس-جاقىن شەت مەملەكەتتەردە قارجى تاپشىلىعى سالدارىنان ءداستۇرلى قازاقتىلدى اقپارات قۇرالدارىنىڭ (گازەت-جۋرنال, تەلەارنا, راديو) سانى ازايعان. اتاپ ايتساق, موڭعوليادا سوڭعى 4-5 جىلدان بەرى ء«بىلىم» گازەتى, تۆ-4 تەلەارناسى, Baiolke.com سايتى, رەسەيدە – ومبى وبلىسىنان شىعاتىن «اتا-مەكەن», استراحاندا «اق ارنا» گازەتتەرى جابىلدى. قارجى تاپشىلىعىن وزبەكستانداعى قازاقتىلدى اقپارات قۇرالدارى دا سەزىنىپ وتىر. ونداعى قانداستارىمىزدىڭ ايتۋىنشا, اۋداندىق جانە وبلىستىق گازەت-جۋرنالدار مەملەكەتتىك مەكەمە بولىپ سانالادى. بىراق مەملەكەت ەسەبىنەن بولىنگەن قارجىنىڭ جەتكىلىكسىزدىگىنەن گازەت-جۋرنالدار جەكە ازاماتتاردىڭ قولداۋىمەن شىعارىلۋدا. وسىنداي تۇيىتكىلدى ماسەلەلەردى ەسكەرە وتىرىپ, سىرتقى ىستەر مينيسترلىگى ىسكە اسىراتىن ەلىمىزدى شەتەلدەرگە تانىتاتىن يميدجدىك اقپاراتتىق جوبالار باعدارلامالارى ارقىلى جىل سايىن ىرىكتەپ, 10 شەتەلدەگى قازاق ءتىلدى باق-تىڭ ارقايسىسىنا 1 ميلليون تەڭگەدەن قارجىلاي كومەك كورسەتۋدى قولعا الۋ قاجەت دەپ ەسەپتەيمىز. وسى ۋاقىتقا دەيىن ولاردى قانداستارىمىز جەكە ءوز قارجىلارىنا شىعارىپ كەلدى. سىرتتاعى باۋىرلارىمىزدىڭ بۇل وتانسۇيگىشتىك, ەلجاندىلىق ارەكەتىنە وتىز جىلدان كەيىن قولداۋ كورسەتەتىن كەز كەلگەن سياقتى», دەيدى م.سارباسوۆ.