سولتۇستىك قازاقستاندا تەك وتكەن ءبىر اپتادا 15 ءورت وقيعاسى تىركەلگەن. وتتى ابايسىز قولدانۋدىڭ كەسىرىنەن 1 ادام كوز جۇمدى. ال تاعى ءبىر ەلدىمەكەندە ءورت ءسوندىرۋ كولىگى تازالانباعان جولداردىڭ كەسىرىنەن ورتەنىپ جاتقان ۇيگە جەتە الماعان, دەپ حابارلايدى Egemen.kz
توتەنشە وقيعا اققايىڭ اۋدانى, لەنينسكوە اۋىلىندا بولدى. كەشكى 18:30-دا ءورت سوندىرۋشىلەرگە جەكە ۇيدەن ءورت شىققانى جايىندا حابار كەلىپ تۇسكەن. توتەنشە جاعدايلار دەپارتامەنتىنىڭ حابارلاۋىنشا, ءورتتىڭ اۋماعى 1 شارشى مەتردى قۇرادى.
«وقىس وقيعا وتتى ابايسىز قولدانۋ, ياعني تاماقتى گاز ۇستىندە قالدىرۋدىڭ سالدارىنان شىققان. توتەنشە جاعدايلار قىزمەتكەرلەرى كەلگەنگە دەيىن ەر ادامنىڭ جانسىز دەنەسىن ونىڭ ايەلى ۇيدەن الىپ شىققان. قازىرگى ۋاقىتتا ءولىمنىڭ ناقتى سەبەبى انىقتاۋ ءۇشىن, مارقۇمنىڭ مۇردەسى ساراپتاماعا جىبەرىلدى», – دەدى وبلىستىق تجد مەملەكەتتىك ءورتتى باقىلاۋ ءبولىمىنىڭ باسشىسى دميتري راستيحين.
تاعى ءبىر وقيعا قىزىلجار اۋدانى, نادەجكا اۋىلىندا ورىن العان. جەكەمەنشىك ۇيدەن ءورت شىعىپ, ءۇي يەسى ەكى الاقانىن كۇيدىرىپ, 2-دارەجەلى كۇيىك العان. ءورت ءسوندىرۋ ءبولىمى جەتكەنگە دەيىن جەر ۇيدە گاز باللونى جارىلىپ, سالدارىنان ءۇي ورتتەن تولىعىمەن قيراپ, جاقىن ماڭدا تۇرعان ۆاز-2199 اۆتوكولىگى دە جانىپ كەتكەن. مامانداردىڭ سوزىنشە, جولدى قار باسىپ كەتكەننەن, وتقا ورانعان ۇيگە بىردەن جەتۋ مۇمكىن بولماعان. سالدارىنان ءورت قۇبىرشەگىن الىستان تارتۋعا تۋرا كەلدى. كەيىن قار تازالايتىن تەحنيكا جولدى تازارتىپ شىقتى.
«وتكەن كۇندەرى قار كوپ تۇسكەن. ال قار تازالايتىن تەحنيكانىڭ نەگىزگى بولىگى بوگوليۋبوۆو اۋىلىندا بولعان. ءورت سوندىرۋشىلەر وقيعا ورىنىنا جەتكەننەن كەيىن, بۇل تەحنيكا, ياعني ت-150 اۋىر بۋلدوزەر جانە متز, 10-15 مينۋتتىڭ ىشىندە بىردەن جولدى تازارتۋ ءۇشىن كەلگەن», دەدى قىزىلجار اۋدانى اكىمى اپپاراتىنىڭ باس مامانى احمەتجان توبىلباەۆ.
سولتۇستىك قازاقستاندا جىل باسىنان 145 ءورت وقيعاسى تىركەلگەن. 22 ادام قازا بولىپ, 29-ى ءتۇرلى جاراقات العان. ال اۋا-رايىنىڭ بۇزىلۋىنا بايلانىستى وڭىردە 7 رەسپۋبليكالىق جانە وبلىستىق ماڭىزى بار جولدار جابىلدى.