2021 جىلدىڭ 3 ناۋرىزىندا تاشكەنتتە كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ باسقارما توراعاسى بولات سارسەنباەۆ پەن وزبەكستان رەسپۋبليكاسى مينيسترلەر كابينەتى جانىنداعى يسلام وركەنيەتى ورتالىعىنىڭ ديرەكتورى شوازيم مينوۆاروۆ ءوزارا ىنتىماقتاستىق تۋرالى مەموراندۋمعا قول قويىلدى, دەپ حابارلايدى Egemen.kz.
مەموراندۋمنىڭ ماقساتى وركەنيەتارالىق جانە كونفەسسياارالىق ديالوگ سالاسىنداعى ورتاق جوبالاردى جۇزەگە اسىرۋ, تولەرانتتىلىق پەن كەلىسىم قاعيداتتارىن دامىتۋ بولىپ تابىلادى.
تاراپتار دىنارالىق ديالوگتى دامىتۋداعى ءوزارا تاجىريبە الماسۋ, سونداي-اق ەكى مەملەكەت اۋماعىندا وسى باعىتتاعى كەزدەسۋلەر, ءىس-شارالار, فورۋمدار مەن سامميتتەر ۇيىمداستىرۋ ماسەلەسى بويىنشا كەلىسىمگە كەلدى.
ەكى تاراپ تا الەمنىڭ تۇراقتى دامۋىنىڭ ىرگەلى شارتى ءارتۇرلى كونفەسسيالار, ەتنوستار مەن مادەنيەتتەر اراسىنداعى ديالوگ, سىيلاستىق پەن دوستىق ەكەنىن العا تارتتى.
ن.نازارباەۆ ورتالىعىنىڭ باسقارما توراعاسى بولات سارسەنباەۆ ءدىني جانە عىلىمي ساراپشىلار قاۋىمداستىعىنىڭ ءتۇرلى كونفەسسيالىق قاتىناستارى سالاسىنداعى ىرگەلى, قولدانبالى, زەرتتەۋ جوبالارىن دامىتۋداعى ءرولىنىڭ ءوسىپ كەلە جاتقاندىعىن, دىندەر اراسىنداعى تولەرانتتىلىقتى نىعايتۋ, سونداي-اق ەكى باۋىرلاس ەل اراسىنداعى ىنتىماقتاستىقتى كەڭەيتۋ بويىنشا تاجىريبە الماسۋدىڭ ماڭىزدىلىعىن اتاپ ءوتتى.
سونىمەن قاتار, بولات سارسەنباەۆ 2022 جىلى وتەتىن الەمدىك جانە ءداستۇرلى دىندەر كوشباسشىلارىنىڭ سەزى مەن 2021 جىلى وتەتىن XIX حاتشىلىققا قازاقستان رەسپۋبليكاسى پارلامەنتى سەناتىنىڭ توراعاسى - الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ماۋلەن اشىمباەۆتىڭ باسشىلىعىمەن, قازاقستان رەسپۋبليكاسى اقپاراتتىق جانە قوعامدىق دامۋ مينيسترلىگى, قازاقستان رەسپۋبليكاسىنىڭ سىرتقى ىستەر مينيسترلىگى قولداۋىمەن دايىندىق باستالعانىنا ەرەكشە نازار اۋداردى.
«وزدەرىڭىز بىلەتىندەي, وزبەكستان – ءبىزدىڭ مەملەكەتىمىزدىڭ ماڭىزدى سەرىكتەستەرىنىڭ ءبىرى عانا ەمەس, بىزگە دوس, باۋىرلاس مەملەكەت. قازاقستان رۋحاني ءبىلىم بەرۋ, دىنارالىق ديالوگتى ىلگەرىلەتۋ, ەكى ەل اراسىنداعى تاجىريبە الماسۋ سالاسىنداعى تەرەڭ ىنتىماقتاستىققا ەرەكشە ءمان بەرەدى. وسى ورايدا, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ كونفەسسيالار مەن وركەنيەتتەر اراسىنداعى ديالوگتى قامتاماسىز ەتۋدەگى, حالىقتار اراسىنداعى بەيبىتشىلىك پەن كەلىسىمنىڭ ءتيىمدى ستراتەگياسىن ازىرلەۋدەگى ءرولىن اتاپ ءوتۋ ماڭىزدى. سونداي-اق, قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازارباەۆتىڭ باستاماسىمەن وتەتىن الەمدىك جانە ءداستۇرلى دىندەر ليدەرلەرى سەزىن جان-جاقتى قولداعانى ءۇشىن ريزامىز. وسى جىلدار ىشىندە سەزد جۇمىسى - ءارتۇرلى كونفەسسيا وكىلدەرىنىڭ وزەكتى ماسەلەلەرىن شەشۋگە باعىتتالعان ءتيىمدى قۇرالعا اينالىپ ۇلگەردى. وزگە ەلدەر مەن وركەنيەتتەر اراسىنداعى ىنتىماقتاستىقتى دامىتۋداعى جەمىستى جۇمىسىنىڭ ارقاسىندا الەمدىك جانە ءداستۇرلى دىندەر ليدەرلەرىنىڭ سەزى شىنىمەن دە قازاقستاننىڭ تانىمال سيمۆولى مارتەبەسىنە يە بولدى.
الەمدىك جانە ءداستۇرلى دىندەر ليدەرلەرى سەزىنىڭ يدەيالارىن ىلگەرىلەتۋ جانە ونى ديالوگتىڭ جاڭا دەڭگەيىنە شىعارۋ جۇمىستارىن بىرلەسىپ جالعاستىرۋ ماڭىزدى دەپ سانايمىن. تەك ىنتىماقتاستىق, باۋىرمالدىق قاسيەتتەرى عانا بىزگە بۇكىل الەمدىك قوعامداستىقتىڭ ءال-اۋقاتىن جاقسارتۋ مەن ورتاق ماقساتتارعا جەتۋگە مۇمكىندىك بەرەدى», - دەدى ن.نازارباەۆ ورتالىعىنىڭ باسقارما توراعاسى.
بولات سارسەنباەۆ وزبەكستانعا جۇمىس ساپارى بارىسىندا وزبەكستان مۇسىلماندارى باسقارماسىنىڭ توراعاسى, ءمۇفتي ۋ.اليموۆپەن, وزبەكستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى ف.ارزيەۆپەن, پالەستينا مەملەكەتىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى موحامماد تارشاحانيمەن كەزدەستى.
ايتا كەتۋ كەرەك, وزبەك تاراپىنىڭ باستاماسىمەن كەزدەسۋلەر جەرگىلىكتى بۇقارالىق اقپارات قۇرالدارىندا, اقپاراتتىق اگەنتتىكتەردىڭ رەسمي ينتەرنەت-رەسۋرستارى مەن رەسپۋبليكالىق تەلەارنالاردىڭ ەفيرىندە كەڭىنەن جاريالاندى. اتاپ ايتقاندا, بولات سارسەنباەۆ جەتەكشى «وزبەكستان 24» تەلەارناسىنا, «Muslim.uz», «Batafsil.uz», «Uza.uz» جاڭالىق پورتالدارىنا جانە باسقا دا باق-قا سۇحبات بەردى.