ۇلتتىق مۋزەيدە ء«بىر تۋىندى تاريحى» جوباسى اياسىندا قازاقستاننىڭ حالىق سۋرەتشىسى اۋباكىر ىسمايىلوۆتىڭ 1981 جىلى تاۋ پەيزاجدارى جانرىمەن سالىنعان «بيىك تاۋلار» كارتيناسى كوپشىلىككە تانىستىرىلدى.
تاۋدا ءبىر رەت بولعان ادام ونىڭ ەرەكشە ايبىندىلىعى مەن سۇلۋلىعىن ۇزاق ۋاقىت ۇمىتا المايدى. ءبىزدىڭ الدىمىزدان سۇرلەۋدىڭ ءار بۇرىلىسىنان كوككە ۇمتىلعان تاۋ شىڭدارى, تومەن قاراي سىلدىراي اققان سارقىرامالار, بوكتەرگە تاماشا جايعاسقان اعاشتار شىعادى. قۇددى, كەۋدەڭە ۇلىلىقتىڭ نۇرىن توگىپ تۇرعانداي.
تاۋ – تابيعاتتىڭ ەڭ كەرەمەت جەتىستىگى. ولار اسقاق ءارى قۇدىرەتتى. الىستان كوز قاداساڭ, جىلى شىرايلى سەكىلدى. سولاي بولا تۇرا قاتەرلى ءارى قاۋىپتى. تاكاپپار تاۋلاردى سۇيگەن سۋرەتشى عانا ءوز كارتينالارىندا ونىڭ كۇشى مەن جۇمباق سيقىرىن جەتكىزە الادى.
ءبىزدىڭ الدىمىزدا شامالعان تاۋلارىنىڭ عاجاپ كورىنىستەرى كوسىلىپ جاتىر. تاۋدىڭ سۋرەتى كەنەپ بەتىن تۇگەلدەي جاۋىپ, بيىككە ۇمسىنادى. سۋرەتتىڭ تەك تومەنگى جاعىنان سالت اتتىلار ءجۇرىپ بارا جاتقان جىڭىشكە جولدى كورەمىز. ولار تاۋدىڭ اسەم كورىنىستەرىنىڭ اسەرىنەن بايقالمايدى دا. سول كىشكەنتاي بەينەلەر كوشپەلى قازاقتىڭ ومىرىنەن سىر تارتاتىنداي.
وقىرمان بۇل سۇلۋلىقتى ءبىرىنشى پلانداعى قوشقىل تۇستەرمەن بويالعان تاۋدا تۇرىپ باقىلايدى. سودان كەيىن ءبىز جاسىل تۇسپەن كومكەرىلگەن تاۋ بوكتەرىنىڭ تىزبەگىن كورەمىز. ال سامال جەل سوعىپ تۇرعان شىڭدارى تاستاقتى جىنىستارىمەن تۇكسيىپ تۇر. كارتينا بويىمەن ءسال جوعارى كوتەرىلسەڭىز, سولاردىڭ ارعى جاعىنان كوز جاۋىن الاتىن اپپاق قارلى تاۋ شىڭى شىعا كەلەدى. قارلى شىڭدار ءبىرىنشى جانە ەكىنشى پلانداعى تاۋلارعا مۇلدە كەراعار ورنالاسقان. ولار كوگىلدىر اسپان استىندا اۋادا سالماقسىز قالىقتاپ تۇرعانداي. بۇلار – قاتىپ قالعان تاپ-تازا ءمولدىر مۇز قاباتتارىنىڭ ساقتاۋشىسى.
اۋباكىر ىسمايىلوۆ ءوز كارتيناسىندا تاۋدىڭ قۇدىرەتىن, ولاردىڭ بويىنداعى قۇپيانى جانە وزىنە قاراپ تۇرعان ادامدى سەندىرەتىن شەكسىزدىك پەن مىزعىماستىق سەزىمىن جەتكىزگەن. سۋرەتشى كەيىنگى ۇرپاق ءۇشىن تۇمسا تابيعاتتىڭ اسپانمەن استاسىپ جاتقانىن ۇعىندىرىپ, جەر مەن كوكتىڭ تۇتاستىعىن كەنەپ بەتىنە جازىپ, قالدىرىپ كەتتى. مۇنداعى وي – قازاقتىڭ دارقان دالاسىنىڭ ءار بولىگى جانعا شۋاق, كوڭىلگە قۋانىش سىيلايتىنىن دالەلدەۋ.