اسقار مامين جاڭارتىلعان قۇرامدا ۇكىمەتتىڭ العاشقى وتىرىسىن وتكىزدى

جاڭا تاعايىندالعان ۇلتتىق ەكونوميكا ءمينيسترى اسەت ەرعاليەۆ پەن ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ مەملەكەتتىك قىزمەتشى رەتىندە انت بەردى.

وتىرىستا ەلدەگى سانيتارلىق-ەپيدەميولوگيالىق جاعداي قارالدى. دەنساۋلىق ساقتاۋ ءمينيسترى الەكسەي تسوي, ىشكى ىستەر ءمينيسترى ەرلان تۇرعىمباەۆ, اقپارات جانە قوعامدىق دامۋ ءمينيسترى ايدا بالاەۆا, نۇر-سۇلتان قالاسىنىڭ اكىمى التاي كولگىنوۆ, پاۆلودار وبلىسىنىڭ اكىمى ابىلقايىر سقاقوۆ, اقمولا وبلىسىنىڭ اكىمى ەرمەك مارجىقپاەۆ, قوستاناي وبلىسىنىڭ اكىمى ارحيمەد مۇحامبەتوۆ, اتىراۋ وبلىسىنىڭ اكىمى ماحامبەت دوسمۇحامبەتوۆ بايانداما جاسادى.

قازىرگى تاڭدا Covid-19 تارالۋ قارقىنى بويىنشا قر-نىڭ 6 ءوڭىرى «قىزىل ايماقتا» تۇر, اتاپ ايتساق: اقمولا, اتىراۋ, قوستاناي, پاۆلودار, سولتۇستىك قازاقستان وبلىستارى جانە نۇر-سۇلتان قالاسى. «سارى ايماقتا» — باتىس قازاقستان, الماتى جانە قاراعاندى وبلىستارى.

رەسپۋبليكا بويىنشا ۆيرۋستىڭ رەپرودۋكتيۆتىك كورسەتكىشى 1,1-ءدى قۇرايدى. ينفەكتسيالىق توسەك ورىنداردىڭ جۇكتەمەسى – 32%, رەانيماتسيالىق توسەك ورىندار – 23%. QazCovid-in وتاندىق ۆاكتسيناسى كلينيكالىق سىناقتاردىڭ III كەزەڭىنەن وتۋدە (الدىن الا تيىمدىلىگى – 96%). «سپۋتنيك V» ۆاكتسيناسىنىڭ ساپاسىن اتتەستاتتاۋ جۇمىستارى جۇرگىزىلىپ جاتىر. GMP ستاندارتى بار ۆاكتسينالار شىعاراتىن بيوفارمزاۋىت سالىنىپ جاتىر.

«بۇگىنگى تاڭداعى ەڭ ماڭىزدى مىندەت – حالىقتى جاپپاي ۆاكتسينالاۋدى ۇيىمداستىرۋ», — دەدى ا. مامين.

ۇكىمەت باسشىسى دەنساۋلىق ساقتاۋ مينيسترلىگىنە اكىمدىكتەرمەن بىرلەسىپ, 1 اقپاننان باستاپ مەديتسينالىق ۇيىمداردىڭ حالىقتى «سپۋتنيك V-مەن» جاپپاي ۆاكتسينالاۋدى باستاۋعا دايىن بولۋىن قامتاماسىز ەتۋدى تاپسىردى.

پرەمەر-مينيستر وڭىرلەردىڭ اكىمدەرىنە ەپيدەميولوگيالىق احۋال ناشارلاعان جاعدايدا الدىن الا شەكتەۋ شارالارىنىڭ جوسپارىن ازىرلەۋدى, حالىق پەن بيزنەس سۋبەكتىلەرىنىڭ بەلگىلەنگەن سانيتاريالىق نورمالاردى قاتاڭ ساقتاۋىن قامتاماسىز ەتۋدى, ءبىر اپتا مەرزىمدە ينفەكتسيالىق ستاتسيونارلار مەن العاشقى مەديتسينالىق-سانيتاريالىق كومەك ۇيىمدارىندا جەكە قورعانىش قۇرالدارى مەن كوروناۆيرۋسقا قارسى ءدارى-دارمەك قورلارىنا تەكسەرىس جۇرگىزۋدى تاپسىردى. ىشكى ىستەر مينيسترلىگىنە اكىمدىكتەرمەن بىرلەسىپ, مونيتورينگتىك توپتاردىڭ جۇمىسىن كۇشەيتۋ, اقپارات مينيسترلىگىمەن بىرلەسىپ ءتۇسىندىرۋ جۇمىستارىن كۇشەيتۋ تاپسىرىلدى.