نۇر-سۇلتاندا حالىقارالىق تۇركى اكادەمياسىندا تۇركى مەملەكەتتەرى تاۋەلسىزدىگىنىڭ 30 جىلدىعى اياسىندا قاراباق تۋرالى جاڭا كىتاپتار تانىستىرىلدى, دەپ حابارلايدى Egemen.kz.
بۇعان دەيىن حابارلاعانىمىزداي, تۇركى اكادەمياسى «قاراباق – ازەربايجاننىڭ جاۋھارى: تاريحى, مادەنيەتى, تابيعاتى», «جوعالعان باقىت: قاراباقتىڭ شىنايى وقيعالارى» جانە «ازەربايجان حالىق رەسپۋبليكاسى» كىتاپتارىن شىعاردى.
«حالىقارالىق تۇركى اكادەمياسى قاراباق ماسەلەسىندە ءاردايىم ازەربايجاننىڭ جانىندا بولدى, قولدادى. بۇگىن ءبىزدىڭ ەڭ ۇلكەن تارتۋىمىز – قاراباق تۋرالى البوم-كىتاپ پەن ازەربايجان رەسپۋبليكاسىنىڭ ءجۇز جىلدىعىنا ارنالعان كىتاپ جانە قاراباقتىڭ شىنايى وقيعالارى تۋرالى اڭگىمەلەر جيناعى جارىق كوردى. وعان وتكەن جىلدان بەرى جىل بويى دايىندىق جۇرگىزدىك. ساپالى سۋرەتتەر مەن ماتەريالداردى جيناستىردىق. ءبىزدىڭ بۇل كىتاپتى باسپاعا بەرۋىمىز ازەربايجاننىڭ شۋشانى الۋىمەن سايكەس كەلدى», - دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى جيىن بارىسىندا.
القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ, قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆ, وزبەكستان رەسپۋبليكاسىنىڭ قازاقستان رەسپۋبليكاسىنداعى ەلشىلىگىنىڭ ءبىرىنشى حاتشىسى مۋزاففار ۋسمانوۆ, س.سەيفۋللين مۋزەيىنىڭ ديرەكتورى نەسىپبەك ايت ۇلى جانە باسقا دا مەملەكەت جانە قوعام قايراتكەرلەرى, قىرعىزستان, وزبەكستان جازۋشىلارى, زيالى قاۋىم وكىلدەرى قاتىستى.
ونلاين رەجىمدە قىرعىزستاننان وسماناكۋن يبراگيموۆ, تۇركيادان ياكۋب ومەروعلۋ , ازەربايجاننان گانيرە پاشاەۆا, وزبەكستاننان ەركىن نۋريددينوۆ قاتىسىپ, ءسوز سويلەگەن جيىن بارىسىندا باۋىرلاس ەلدەر اراسىنداعى ىنتىماقتاستىقتى نىعايتۋعا قوسقان زور ۇلەسى ءۇشىن ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆتى حالىقارالىق تۇركى اكادەمياسىنىڭ ارنايى التىن مەدالىمەن ماراپاتتالدى.