ورتالىق سايلاۋ كوميسسياسى ەلىمىزدە وتكەن پارلامەنت ءماجىلىسى دەپۋتاتتارىن سايلاۋدىڭ قورىتىندىسىن شىعارىپ, ساياسي پارتيالارعا بەرىلگەن داۋىستار سانىن جاريالادى.
ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ سايلاۋ ۋچاسكەلەرىندەگى سايلاۋشىلار تىزىمدەرىنە 11 919 241 ازامات ەنگەنىن حابارلادى. ولاردىڭ ىشىندە 7 539 280 ادام نەمەسە سايلاۋشىلاردىڭ 63,25 پايىزى سايلاۋ بيۋللەتەندەرىن العان. داۋىس بەرۋگە 7 389 153 ادام قاتىسقانى بەلگىلى بولدى, ونىڭ ىشىندە ەسەپتەن شىعارۋ كۋالىكتەرى بويىنشا 13 677 سايلاۋشى داۋىس بەردى.
ساياسي پارتيالار بويىنشا قازاقستان حالىق پارتياسى – 659019 (9,10 پايىز), Nur Otan پارتياسى – 5 148 074 (71,09 پايىز), «اۋىل» حالىقتىق دەموكراتيالىق پاتريوتتىق پارتياسى – 383 023 (5,29 پايىز), «اق جول» دەموكراتيالىق پارتياسى – 792 828 (10,95 پايىز), ADAL ساياسي پارتياسى – 258 618 (3,57 پايىز) داۋىس جيناعان.
سونداي-اق پارلامەنت ءماجىلىسى دەپۋتاتتارىن سايلاۋدا ءۇش ساياسي پارتيا يە بولعان مانداتتار سانى جاريالاندى. Nur Otan, «اق جول» جانە قازاقستان حالىق پارتياسى جەتى پايىزدىق مەجەنى ەڭسەرىپ, قازاقستان پارلامەنتىنە جولداما الدى. قورىتىندى بويىنشا Nur Otan پارتياسى – 76, «اق جول» دەموكراتيالىق پارتياسى – 12, قازاقستان حالىق پارتياسى – 10 مانداتقا يە بولدى.
وتىرىس بارىسىندا پارلامەنت ماجىلىسىنە قازاقستان حالقى اسسامبلەياسىنان سايلانعان دەپۋتاتتار بەلگىلى بولدى. 11 قاڭتاردا وتكەن قحا سايلايتىن ءماجىلىس دەپۋتاتتارىن سايلاۋ ناتيجەسى بويىنشا 9 دەپۋتات انىقتالدى. ولاردىڭ ىشىندە ساۋىتبەك ابدراحمانوۆ – 298 (84,9 پايىز), اۆەتيك اميرحانيان – 270 (76,9 پايىز), يلياس بۋلاروۆ – 274 (78,1 پايىز), ناتاليا دەمەنتەۆا – 292 (83,2 پايىز), يۋري لي – 282 (80,3 پايىز), ۆاكيل نابيەۆ – 285 (81,2 پايىز), شاميل وسين – 271 (77,2 پايىز), ۆلاديمير توحتاسۋنوۆ – 277 (78,9 پايىز), ابيلفاس حامەدوۆ 290 (82,6 پايىز) داۋىسقا يە بولدى. سايلاۋشىلار تىزىمىنە ەنگەن 509 ازاماتتىڭ 351-ءى نەمەسە 68,9 پايىزى داۋىس بەرۋگە قاتىستى.
سونداي-اق كەشە ورتالىق سايلاۋ كوميسسياسى (وسك) ءماسليحاتتار دەپۋتاتتارىنىڭ كەزەكتى سايلاۋىنىڭ قورىتىندىسىنا ارنالعان وتىرىس وتكىزدى.
جيىندا ءماسليحاتتار دەپۋتاتتارى سايلاۋىنىڭ قورىتىندىسى مەن دەپۋتاتتىق مانداتتاردى ءبولۋ ماسەلەسى قارالدى. وسك توراعاسى بەرىك يماشەۆ ءوز سوزىندە ءماسليحاتتار دەپۋتاتتارىنىڭ سايلاۋ قورىتىندىلارىن اۋماقتىق سايلاۋ كوميسسيالارى انىقتايتىنىن اتاپ ءوتتى. ەلدەگى 216 ءماسليحات بويىنشا جۇمىستى وبلىستاردىڭ, نۇر-سۇلتان, الماتى, شىمكەنت قالالارىنىڭ اۋماقتىق سايلاۋ كوميسسيالارى جۇرگىزگەن. وسى ماسەلەگە قاتىستى كوميسسيا مۇشەلەرى اۋماقتىق سايلاۋ كوميسسيالارىنىڭ ەسەپتەرىن تىڭدادى.
«سايلاۋ ناۋقانىندا اتقارىلعان جۇمىستار ءۇشىن بارشاڭىزعا العىس ايتامىن. وسى ارقىلى ءماسليحاتتار بويىنشا سايلاۋ ناۋقانىن اياقتادىق. ءماسليحاتتار دەپۋتاتتارى العاش رەت پروپورتسيونالدى سايلاۋ جۇيەسى بويىنشا سايلاندى. بۇل – 2007 جىلعى كونستيتۋتسيالىق رەفورمانىڭ قيسىندى جالعاسى, رەسپۋبليكالىق جانە جەرگىلىكتى دەڭگەيلەردە وكىلدى ورگانداردى قالىپتاستىرۋ جونىندەگى تاسىلدەردى بىرىزدەندىرەدى», دەدى بەرىك يماشەۆ. ونىڭ ايتۋىنشا, سايلاۋ تۋرالى زاڭعا سايكەس دەپۋتاتتىق مانداتتاردى ءبولۋ كەزەكتىلىگىن ساياسي پارتيانىڭ ءتيىستى فيليالىنىڭ باسشى ورگانى سايلاۋ قورىتىندىلارى جاريالانعان كۇننەن باستاپ بەس كۇننەن كەشىكتىرمەي ايقىندايدى.
ءماسليحاتتار دەپۋتاتتارىن سايلاۋ قورىتىندىلارى تۋرالى حاباردى ءتيىستى اۋماقتىق سايلاۋ كوميسسيالارى جەرگىلىكتى بۇقارالىق اقپارات قۇرالدارىندا جاريالايدى.
وتىرىسقا ساياسي پارتيالاردىڭ وكىلدەرى, بەينەكونفەرەنتس-بايلانىس رەجىمىندە وبلىستاردىڭ, نۇر-Cۇلتان, الماتى جانە شىمكەنت قالالارىنىڭ اۋماقتىق سايلاۋ كوميسسيالارى قاتىستى.