الماتى قالاسىنىڭ اكىمى باقىتجان ساعىنتاەۆ جۇمىس ساپارى بارىسىندا جازۋشىلار وداعى عيماراتىنىڭ جوندەۋ جۇمىستارىنىڭ ناتيجەلەرىمەن تانىستى.
جازۋشىلار ءۇيى 1955 جىلى سالىنعان جانە مۇندا كوپتەن بەرى جوندەۋ جۇمىستارى جۇرگىزىلمەگەن. وتكەن جىلى العاشقى كەزدەسۋلەردىڭ بىرىندە جازۋشىلار قاۋىمداستىعى الماتى اكىمى ب. ساعىنتاەۆقا تاريحى تەرەڭدە جاتقان شىعارماشىلىق نىساندى جوندەۋگە كومەكتەسۋ تۋرالى ءوتىنىش بىلدىرگەن ەدى. عيماراتتى جوندەۋ جۇمىستارىنىڭ ناتيجەلەرى تۋرالى مەگاپوليس اكىمى ءوزىنىڭ Instagram-داعى پاراقشاسىندا ايتىپ بەردى.
«بۇل تۋرالى جازۋشىلار قاۋىمداستىعىمەن وتكەن جىلى بولعان كەزدەسۋدە ايتىلدى. سول جىلى جازۋشىلار ءۇيىن رەتكە كەلتىرۋ تۋرالى شەشىم قابىلداندى. ناتيجەسىندە شاتىر, ەلەكترمەن جابدىقتاۋ جانە جىلىتۋ جۇيەلەرى اۋىستىرىلىپ, ىشكى ارلەۋ جاڭارتىلدى», - دەپ جازدى ب.ساعىنتاەۆ.
مەگاپوليس اكىمى كلاسسيتسيزم ستيلىندە بوي كوتەرگەن عيمارات پەن ونىڭ ينتەرەرىنىڭ ساۋلەتتىك كەلبەتىن ساقتاپ قالۋ قاجەتتىگىنە باسا نازار اۋداردى.
«بۇل ادەبيەت عيباداتحاناسىندا ءبىر كەزدەرى ەڭبەك ەتكەن مۇحتار اۋەزوۆ, ءسابيت مۇقانوۆ, ءابدىجامىل نۇرپەيىسوۆ, ولجاس سۇلەيمەنوۆ سىندى ۇلىلاردىڭ اتموسفەراسىن ساقتاپ قالۋ ءۇشىن قاجەت ەدى», - دەپ اتاپ ءوتتى قالا اكىمى.
«اقىن-جازۋشىلاردى قولداۋ ءۇشىن جازۋشىلار وداعىنىڭ ۇسىنۋىمەن اۆتورلاردىڭ 30 كىتابىن شىعارۋعا قاراجات ءبولىندى. كىتاپ قالاداعى جانە مەكتەپ كىتاپحانالارىنىڭ قورىن تولىقتىرادى. مۇنداي قولداۋ كەلەسى جىلى دا جالعاسىن تابادى», - دەپ حابارلادى ب. ساعىنتاەۆ.