حالىقتى جۇمىسپەن قامتۋ ورتالىعى ازاماتتاردى جۇمىسپەن قامتۋ بويىنشا جۇيەلى تۇردە جۇمىس ىستەيدى. مەكەمەگە جۇمىسسىزدار عانا ەمەس, پروباتسيا قىزمەتىندە ەسەپتە تۇرعاندار, مۇمكىندىگى شەكتەۋلى جاندار دا جۇگىنەدى. جوعارى ءبىلىمى جوق تۇرعىندار تالاپ ەتىلەتىن ماماندىقتار بويىنشا كۋرستان وتەدى, دەپ حابارلايدى Egemen.kz.
جۇمىسپەن قامتۋ ورتالىعىنا جۇمىسسىز رەتىندە تىركەلىپ, جاڭا ماماندىق يگەرگەندەردىڭ ءبىرى - ايگۇل قاسەنوۆا. وسى جىلى ول «ەڭبەك» مەملەكەتتىك باعدارلاماسى بويىنشا «ناۋبايحانا» كاسىپتىك وقىتۋ كۋرستارىن ءبىتىردى. قازىر ول وقۋ كەزىندە وندىرىستىك تاجىريبەدەن وتكەن «ۋاشەۆا دانا» جك ناۋبايحاناسىندا جۇمىس ىستەيدى.
- شىن جۇمىس ىزدەگەن ادام تابادى. ونىڭ ۇستىنە قازىر سۇرانىسقا يە ماماندىقتى الۋعا دا, بىردەن جۇمىس تابۋعا دا مۇمكىندىكتەر كوپ, - دەيدى ايگۇل قاسەنوۆا.
ايتا كەتەيىك, نۇر-سۇلتان قالاسىنىڭ جۇمىسپەن قامتۋ ورتالىعى ءوتىنىش بەرۋشىلەردى جۇمىسپەن قامتۋ اياسىن كەڭەيتۋ ماقساتىندا جۇمىس بەرۋشىلەرمەن ۇنەمى بايلانىستا. بوس ورىندار كۇن سايىن جاڭارتىلىپ وتىرادى. ەندى پاندەمياعا بايلانىستى ورتالىقتىڭ قىزمەتتەرىن قاشىقتان پايدالانۋعا بولادى. وسى ماقساتتا ەلەكتروندى ەڭبەك بيرجاسى مەملەكەتتىك اقپاراتتىق پورتالى جۇمىس ىستەيدى (www.enbek.kz).
نۇر-سۇلتان قالاسىنىڭ تۇرعىندارى پورتالعا تىركەلىپ, بوس جۇمىس ورىندارىن تاڭدايدى نەمەسە جۇمىسىنان ايرىلعان جاعدايدا الەۋمەتتىك تولەمدەر تاعايىنداۋ قىزمەتتەرىن پايدالانا الادى.
تولىق اقپارات پەن ماماندار كەڭەسىن الۋ ءۇشىن ورتالىقتىڭ جۇمىسپەن قامتۋ بولىمىنە 8 777 116 82 76; 8 777 116 82 73 تەلەفوندارى ارقىلى حابارلاسۋعا بولادى.