دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ سىناق زەرتحاناسى اككرەديتاتسيادان ءوتتى جانە سلوۆاكيا ۇلتتىق اككرەديتاتسيالاۋ قىزمەتىنىڭ (SNAS) GLP OECD ءتيىستى زەرتحانالىق پراكتيكا قاعيداتتارىنا سايكەستىكتى حالىقارالىق ماقۇلداۋ تۋرالى كۋالىگىن الدى. بۇل ينسپەكتسيا GLP حالىقارالىق ستاندارتى تالاپتارىنا كەزەكتى سايكەستىك سەرتيفيكاتىن الۋعا دەيىن ءۇش جىلدا ءبىر رەت وتكىزىلەدى.
تەكسەرۋ بارىسىندا SNAS ينسپەكتورلارى ۇلتتىق ورتالىقتىڭ ۇيىمدىق قۇرىلىمىن جانە فارماكولوگيالىق سىناقتار زەرتحاناسىنىڭ جالپى قۇرىلىمدا ورنالاسۋىن قاراستىردى. قىزمەتكەرلەردىڭ بىلىكتىلىك دەڭگەيىنە, قولدانىلعان جابدىقتاردىڭ, ماتەريالدار مەن رەاگەنتتەردىڭ ساپاسى مەن سايكەستىگىنە, سونداي-اق ساپانى قامتاماسىز ەتۋ جۇيەسىنىڭ جانە GLP-زەرتتەۋلەر قۇجاتتاماسىن جۇرگىزۋ جۇمىسىنا قايتا باعالاۋ جۇرگىزىلدى. كومپيۋتەرلەندىرىلگەن جۇيەلەرگە ۆاليداتسيا وتكىزىلىپ, بارلىق قىزمەت تۇرلەرى بويىنشا قۇجاتتاما ەگجەي-تەگجەيلى ينسپەكتسيالاندى. زەرتحانانى باعالاۋ قاشىقتىق رەجىمىندە جۇرگىزىلدى. وسىنداي فورماتتى قازىر كوپتەگەن شەتەلدىك اككرەديتتەۋ ورگانى (ەۋروپالىق وداق ەلدەرى, ۇلىبريتانيا جانە اقش) قولدانادى.
تەكسەرۋ قورىتىندىسى بويىنشا SNAS ساراپشىلارى زەرتحانا مەنەدجمەنتى جۇيەسىن جوعارى باعالادى, مامانداردىڭ تەحنيكالىق قۇزىرەتتىلىگىن جانە GLP OECD حالىقارالىق ستاندارتى تالاپتارىنىڭ قاداعالانۋىن راستادى.
دزسۇو باس ديرەكتورى ەركەن داۋىتباەۆتىڭ ايتۋىنشا, وسى اۋديت اياسىندا زەرتحانانىڭ اتقارعان جۇمىسىنا جان-جاقتى تاۋەلسىز باعا بەرىلدى.
«وڭ باعا الۋ – زور مارتەبە. SNAS كوميسسياسى زەرتحانا جۇمىسىنىڭ GLP ستاندارتى تالاپتارىنا سايكەس جۇرگىزىلەتىنىن, ءتيىستى زەرتحانالىق پراكتيكا نورمالارى مەن قاعيداتتارىن قاداعالاۋدىڭ قامتاماسىز ەتىلگەنىن اتاپ ءوتتى. الەمنىڭ كوپتەگەن ەلىندە GLP ساپا مەن قاۋىپسىزدىكتىڭ مىندەتتى ستاندارتى بولىپ سانالادى. ال ۇلتتىق ورتالىق ەڭ ۇزدىك زەرتحانالىق پراكتيكانى ەنگىزۋگە جانە قولداۋعا تىرىسادى, ويتكەنى ماسەلەنىڭ ءمانى – تۇرعىلىقتى حالىق دەنساۋلىعىنىڭ قاۋىپسىزدىگىنە تىرەلەدى», دەدى ە.داۋىتباەۆ.
دزسۇو فارماكولوگيالىق سىناقتار زەرتحاناسىنىڭ قۇزىرەتىنە قازاقستانداعى بىردەن-ءبىر فارماكوكينەتيكالىق جانە بيوبالامالىلىق زەرتتەۋلەرىن جۇرگىزۋ كىرەدى. ال اككرەديتاتسيانى راستاۋ وسىعان ۇقساس زەرتتەۋلەر جۇرگىزۋ ءۇشىن GLP OECD تالاپتارىنا تولىق سايكەستىگىنە جانە ونىڭ ناتيجەلەرىنىڭ ساپاسىنا كەپىلدىك بەرۋدى بىلدىرەدى. وسى زەرتحانادا COVID-19 دەرتىنە قارسى ەكى وتاندىق ۆاكتسينانىڭ كلينيكاعا دەيىنگى سىناقتارىنىڭ II فازاسى وتكەنىن ايتا كەتەلىك.