17-22 جەلتوقسان ارالىعىندا اقتاۋدا قازاقستان رەسپۋبليكاسىنىڭ چەمپيوناتى ءوتتى. جارىسقا 14 وبلىستان, الماتى, نۇر-سۇلتان جانە شىمكەنت قالالارىنان بارلىعى 273 دزيۋدوشى قاتىستى, دەپ حابارلايدى Egemen.kz ەلوردا اكىمىنىڭ ءباسپاسوز قىزمەتىنە سىلتەمە جاساپ.
دزيۋدودان ەلوردالىق قۇرامانىڭ ەكى سپورتشىسى التىن مەدال جەڭىپ الدى. 48 كەلىگە دەيىنگى سالماقتا اقمارال ناۋاتبەك عاليا تىنباەۆانى جەڭىپ, قازاقستان چەمپيونى اتاندى, ال ءمادي امانگەلدى فينالدا ابىلايحان جۇمانازاردى (قىزىلوردا وبلىسى) ۇپاي بويىنشا جەڭىپ, 81 كەلىدە چەمپيون اتاندى.
«جارىس جوعارى دەڭگەيدە ءوتتى. كارانتينگە بايلانىستى جارىستار وتپەگەن سوڭ, بالالارعا تاكتيكالىق تۇرعىدان قيىن بولدى. بىراق ءبىزدىڭ سپورتشىلار, جوسپارلاعانداي, ەكى التىنعا قول جەتكىزدى. نۇر-سۇلتان قالاسىنىڭ قۇراماسى جالپى كوماندالىق ەسەپتە بەسىنشى ورىنعا يە بولدى», - دەدى دزيۋدودان نۇر-سۇلتاننىڭ اعا جاتتىقتىرۋشىسى مەيىرلان بايماحانبەتوۆ.
ايتا كەتەيىك, ءىس-شارا بارلىق سانيتارلىق نورمالاردى ساقتاي وتىرىپ ءوتتى.