قازاقستان ەلشىسى ازامات بەردىباي «بايان» سارايىندا كۋۆەيت ءامىرى شەيح ناۋاف ءال-احمەد ءال-دجابەر اس-ساباحقا سەنىم گراموتالارىن تاپسىردى, دەپ حابارلايدى Egemen.kz.
رەسمي راسىمنەن كەيىن ورىن العان سۇحبات بارىسىندا ەلشى امىرگە پرەزيدەنت قاسىم-جومارت توقاەۆتىڭ جىلى لەبىزدەرى مەن دوستىق تىلەكتەرىن جەتكىزىپ, قازاقستان بۇل مەملەكەتپەن ىنتىماقتاستىقتى ارتتىرۋعا ۇلكەن ءمان بەرەتىنىن ايتتى.
ديپلومات سۇحباتتاسۋشىن ەلىمىزدىڭ وزەكتى سىرتقى ساياسي جانە ەكونوميكالىق باستامالارىمەن تانىستىرىپ, ەكى ەل اراسىنداعى دوستىق قاتىناستاردى نىعايتۋ ءۇشىن بار كۇش-جىگەرىن سالاتىنىنا سەندىردى.
ءامىر مەملەكەتىمىزدىڭ جەتىستىكتەرىن جوعارى باعالاپ, وعان ودان ءارى وركەندەۋ مەن تابىس تىلەدى جانە قازاقستانمەن ساياسي جانە ەكونوميكالىق بايلانىستاردى ودان ءارى كەڭەيتۋگە مۇددەلىلىگىن ءبىلدىردى.