الماتى اكىمى باقىتجان ساعىنتاەۆ ۆولونتەر جىلىنىڭ رەسمي جابىلۋ ءراسىمى اياسىندا ەرىكتىلەر مەن جاستار ۇيىمدارىنىڭ وكىلدەرىنە ماراپاتتار تاپسىردى, دەپ حابارلايدى Egemen.kz
مەملەكەت باسشىسى ق.توقاەۆتىڭ قاتىسۋىمەن ۆولونتەر جىلىنىڭ رەسمي جابىلۋ ءراسىمى ءوتتى. باسقا وڭىرلەر سياقتى الماتى بەينەكونفەرەنتسيا-بايلانىسى ارقىلى قوسىلدى.
"جومارت جۇرەك" بايقاۋىنىڭ "جىل تۇلعاسى" نوميناتسياسى بويىنشا "ديال ستروي" جشس باس ديرەكتورى عابيت ماماترايىموۆ جەڭىمپاز اتاندى.
"جىل ۆولونتەرى" بايقاۋىنىڭ جەڭىمپازدارى — "پەداگوگتەر اكادەمياسى", "Lider.kz" ەرىكتىلەر قوزعالىسى, "قر قىزىل جارتى اي قوعامى" سياقتى قوعامدىق بىرلەستىكتەردىڭ باسشىلارى نۇرىم نۇرعاليەۆ, ديلميرا بلاتس, ەركەبەك ارعىمباەۆ.
بىرقاتار ەرىكتىلەر مەن ۆولونتەر ۇيىمدارىنىڭ وكىلدەرى ەلباسىنىڭ جانە پرەزيدەنتتىڭ العىس حاتتارىمەن اتاپ ءوتىلدى.
الماتى اكىمى باقىتجان ساعىنتاەۆ ەرىكتىلەردىڭ قيىن كەزەڭدە قاراپايىم تۇرعىندارعا كورسەتكەن قامقورلىقتارى مەن كومەكتەرى ءۇشىن الماتىلىقتار اتىنان ولارعا ريزاشىلىعى مەن العىسىن ءبىلدىردى.
وتكەن جىلى الماتىدا ۆولونتەرلىك قوزعالىستاردى دامىتۋ بويىنشا جوبالار دەنساۋلىق ساقتاۋ, قارتتارعا قامقورلىق, ءبىلىم بەرۋ, ەكولوگيا جانە تۇرعىندارمەن بىرلەسىپ ارەكەت ەتۋ سالالارىندا ويداعىداي جۇزەگە استى. قالادا 28-گە جۋىق ءىرى ەرىكتىلەر ۇيىمى جۇمىس جاساۋدا. بۇل ۇيىمداردىڭ بازالىق دەرەكتەرىندە 50 مىڭنان استام ەرىكتى بار.