بۇل تۋرالى مەملەكەت باسشىسى قاسىم-جومارت توقاەۆ «Nur Otan» پارتياسىنىڭ كەزەكتەن تىس XX سەزىندە ايتتى, دەپ حابارلايدى Egemen.kz.
"Nur Otan" پارتياسىنىڭ كەزەكتەن تىس XX سەزى كۇردەلى ءارى ماڭىزدى كەزەڭدە ءوتىپ وتىر. بۇل مەملەكەتىمىزدىڭ قوعامدىق-ساياسي ومىرىندەگى ايتۋلى وقيعا. بۇگىندە "Nur Otan" پارتياسى ەل تاعدىرىنا جاۋاپتى ەڭ باستى ساياسي كۇشكە اينالىپ وتىر. حالقىمىز بىزگە قاشاندا زور سەنىم ارتادى. اسىرەسە جاھاندىق داعدارىس كەزىندە ەل اماناتىنا ەرەكشە كوڭىل ءبولۋىمىز كەرەك. بۇكىل الەمگە تاراعان پاندەميا قازاقستانعا دا وڭاي تيگەن جوق. مەملەكەت ازاماتتارىمىزدىڭ دەنساۋلىعىن قورعاۋ ءۇشىن بارلىق قاجەتتى شارالاردى قابىلداپ جاتىر",- دەدى ق.توقاەۆ.
بۇدان سوڭ, مەملەكەت باسشىسى پارتيا تاراپىنان حالىققا تۇراقتى قولداۋ كورسەتىلىپ كەلە جاتقانىن اتاپ ءوتتى.
"ناقتى جۇمىس پەن جاناشىرلىق بەرەكە-بىرلىگىمىزدى ارتتىرا تۇسەدى. قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە ىسكە اسىرادى. بۇل رەتتە ەلباسى ساياساتىنىڭ ساباقتاستىعىن قامتاماسىز ەتۋ نەگىزگى مىندەتتىڭ ءبىرى. مەن بيىلعى جولداۋىمدا پارتيانىڭ قوعامداعى جەتەكشى ءرولى تۋرالى ايتتىم. ءبىز رەفورمالاردى جۇزەگە اسىرۋ بارىسىندا "Nur Otan" پارتياسىنىڭ زور الەۋەتىنە سۇيەنەمىز",- دەدى پرەزيدەنت.