قىزىلوردا وبلىسىنداعى قاراوزەك اۋىلىندا سۋ قويماسى سالىنادى. بۇل تۋرالى قر ەكولوگيا, گەولوگيا جانە تابيعي رەسۋرستار مينيسترلىگىنىڭ Facebook پاراقشاسىندا وتكەن تىكەلەي ەفيردەگى سۇحباتتا «قازسۋشار» رمك قىزىلوردا فيليالىنىڭ ديرەكتورى حاميت بيىمبەتوۆ مالىمدەدى.
«قاراوزەك اۋىلىندا تاعى ءبىر جاڭا سۋ قويماسى سالىنادى. جوبالىق سمەتالىق قۇجات بيىل ساراپتاماعا بەرىلەدى. كەلەر جىلى قارجى ماسەلەسى شەشىلۋى ءتيىس», - دەپ اتاپ ءوتتى حاميت بيىمبەتوۆ. سونىمەن قاتار ول قىزىلوردا سۋ تورابىنداعى جوندەۋ جۇمىستارى تۋرالى دا ايتتى.«قىزىلوردا سۋ تورابىن جوندەۋگە 2020 جىلعا 481 ملن تەڭگە, 2021 جىلعا 1 ملرد 420 مىڭ تەڭگە, 2022 جىلعا 709 ملن تەڭگە قاراستىرىلعان. سول جاق ماگيسترال كانالىندا بەتون جۇمىستارى جۇرگىزىلۋدە. 2022 جىلى بارلىق جۇمىس ءبىتۋى ءتيىس. اتالعان سۋ تورابى 1956 جىلى پايدالانۋعا بەرىلسە, بۇعان دەيىن كەشەندى جوندەۋدەن وتپەگەن ەدى. بۇدان بولەك ايتەك, جيدەلى سۋ قويمالارى جوندەلۋدە. ولاردىڭ جۇمىسى 2020 جىلدىڭ سوڭىنا دەيىن اياقتالادى. جيدەلى جەلتوقساننىڭ باسىندا ىسكە قوسىلادى»,- دەدى فيليال باسشىسى. سۇحبات بارىسىندا ۆەگەتاتسيالىق كەزەڭنىڭ اياقتالۋى ءسوز بولدى.«بيىل ۆەگەتاتسيالىق كەزەڭ باسىندا كوكساراي كونتررەگۋلياتورىنا 3 ملرد-تىڭ ورنىنا 2 ملرد تەكشە مەتر سۋ جينالىپ, 1 ملرد تەكشە مەتر جەتپەي ديحاندار ازداپ قينالدى. بىراق اكىمدىك كۇرىش ەگۋ مەكەمەلەرىمەن بىرگە 300 كم ىشكى كانالداردى تازالادى. ءبىز 61 كم ماگيسترالدى كانالداردى تازالادىق. 90 مىڭ گەكتار كۇرىش ەگىلسە, سونىڭ بارىنە كەزەكپەن بەكىتىلگەن كەستە بويىنشا ۇلەستىرە وتىرىپ, سۋ جەتكىزە الدىق», - دەدى حاميت بيىمبەتوۆ. ايتا كەتەيىك, قىزىلوردا وبلىسىنداعى بيىلعى ۆەگەتاتسيالىق كەزەڭدە بارلىق كۇرىش القاپتارى سۋارمالى سۋمەن قامتىلدى.