قاراشا باستالعالى «فرانتسياداعى قازاقستان كۇزى» اتتى مادەني ماۋسىم باعدارلاماسى جالعاسىپ كەلەدى. Art Ambassadeurs قولداۋىمەن ءوتىپ جاتقان ونلاين-كونتسەرتتەر قازاقتىڭ ۇلتتىق ءان-كۇيىنە جاڭاشا سيپات بەرىپ جۇرگەن مودەرن توپتاردى تانىستىرا وتىرىپ, تىڭدارماندى قازاقتىڭ بۇگىنگى زاماناۋي مۋزىكا الەمىنە ساياحاتتاۋعا شاقىرادى.
«كۇزگى اۋەن» اتتى ونلاين-كونتسەرت تالانتتى, كاسىبي مۋزىكانتتاردىڭ باسىن قوستى. قوبىز, ۆيولونچەل, فورتەپيانو سىندى اسپاپتىق تريوسى ابايدىڭ «جەلسىز تۇندە جارىق اي», حالىق تۋدىرعان «ياپۋراي» اندەرىن تۇرلەندىرە ورىنداپ, تىڭدارماننىڭ كوكىرەگىنە جاڭا تىنىس سىيلادى.
اتالعان كەشتە ونەر كورسەتكەن ايگەرىم ماتاەۆا – قازاقستان, رەسەي جانە فرانتسيا ەلدەرىندە وتكەن حالىقارالىق بايقاۋلارىنىڭ لاۋرەاتى, پيانيست جانە كونتسەرتشى. ول قازاقستان, رەسەي, فرانتسيا جانە شۆەيتساريا ەلدەرىندە جەكە ونەر كورسەتىپ, ەريك لە ساج, يگور لازكو, ۆالەري سوكولوۆ جانە تاعى باسقا اتاقتى مۋزىكا شەبەرلەرى ۇيىمداستىرعان شەبەرلىك ساباقتارىنا قاتىسقان. قازىرگى ۋاقىتتا ايگەرىم – سكريابين اتىنداعى كونسەرۆاتوريادا ساباق بەرەدى جانە فرانتسياداعى «قورقىت-اباي» قازاق مادەني ورتالىعىنىڭ بىرلەسكەن قالاۋشىسى. ال قازاق حالىق اسپاپتارىنىڭ مۋزىكانتى ايگەرىم ەرسايىنوۆا – «قورقىت اتا», «استانا مەرەي» جانە وزگە دە بايقاۋلاردا جەڭىسكە جەتىپ, ۇلتتىق جانە حالىقارالىق دەڭگەيدە مادەني ىنتىماعىمىزدى جاراستىرىپ جۇرگەن جان. جاستايىنان ءان-كۇيگە ىنتىق بولىپ وسكەن 14 جاسار ماكسيم گريزارد سەن-جەرمەن-ان-لە قالاسىنىڭ كونسەرۆاتورياسىنداعى كلەر وپپەردىڭ شاكىرتى, 2019 جىلى ءتورت جىلدىق جەكە وقۋىنان كەيىن «مۋزىكالىق ىزدەنىس» سالاسىنداعى ديپلومعا يە بولدى. جەروم پەرنو, ولەگ كوگان جانە ۆلاديمير پەرلەندەردىڭ ۆيولونچەل سالاسىندا كەڭەس الدى. رۇستەم سايتقۇلوۆتان فورتەپيانو سالاسىندا ءبىلىم العان تالانتتى ورەن فرانتسيا, گەرمانيا, ۇلىبريتانيا, يتاليا, چەحيا جانە بەلارۋس ەلدەرىندە جەكە كونتسەرتتەرىن بەرىپ جاتىر. ماۋسىمدىق باعدارلاما بۇعان دەيىن مۋزىكا سالاسىنا تىڭ جاڭالىعىمەن كەلگەن «MEJ – مودەرن ەتنو-دجاز» باعىتىندا اۋەندەر شىعارىپ جاتقان «Steppe Sons» توبىنىڭ, «وتىرار سازى» اكادەميالىق فولكلورلى-ەتنوگرافيالىق وركەسترىنىڭ, ءداستۇرلى ءان-كۇي, جىرلارىمىزدى دارىپتەيتىن «حالىق قازىناسى» ءبولىمىنىڭ كونتسەرتىن كوپ نازارىنا ۇسىندى.