اۋىل ايەلدەرىنىڭ الەۋمەتتىك بەلسەندىلىگى ارتۋدا

قۇتتىقتاۋدا ايتىلعانداي, بۇگىندە ەل حالقىنىڭ 40 پايىزدان استامى اۋىلدىق جەرلەردە تۇرادى, سوندىقتان اۋىل­دى دامىتۋ مەملەكەتتىك سايا­سات­تىڭ باسىم باعىتى بولىپ وتىر. بۇل رەتتە ايەلدەردىڭ الەۋە­تىن كۇشەي­­تۋگە ەرەكشە ءمان بەرى­لەدى, جىل سايىن ولاردىڭ ەكو­نومي­كالىق بەلسەندىلىگى مەن الەۋمەت­تىك جاۋاپ­كەرشىلىگى ارتىپ كە­لەدى. بۇعان بۇگىندە ايەلدەر ءوز كاسىپ­ورىندارىن اشىپ, شارۋا قو­جالىقتارىن باسقارىپ, بىرەگەي وندىرىستەردى ىسكە قوسىپ, مىڭدا­عان ادامدى جۇمىسپەن قامتىپ وتىرعانى دالەل.

ءوز سوزىندە ءلاززات رامازانوۆا اگرو­ونەر­كاسىپتىك كەشەندى دامى­تۋ­داعى اۋىل ايەل­دەرىنىڭ ماڭىزدى ءرولىن اتاپ ءوتتى. «قازاق­ستان پرە­زيدەنتى قاسىم-جومارت توقاەۆ ءوز جولداۋىندا اۋىل شارۋا­شى­لىعىن وركەندەتپەي باسەكەگە قابىلەتتى ەكونوميكا قۇرۋ مۇمكىن ەمەس ەكەنىن ايتىپ, اۋىل مەن اگروونەركاسىپتىك كەشەندى ودان ءارى دامىتۋ بويىنشا ماڭىزدى مىن­دەت­تەردى ايقىندادى. بۇل مىندەتتەردى ىسكە اسىرۋدا, ارينە اۋىل ايەلدەرىنە ۇلكەن جانە جاۋاپتى ءرول بولىنگەن. اۋىل­داعى ايەلدەردىڭ كاسىپكەرلىك باس­تاما­لارىن قولداۋ ءتۇرلى مەم­لەكەتتىك باعدار­لامالار ارقىلى جۇزە­گە اسىرىلادى. بۇگىن­دە اۋىل­داعى شاعىن, ورتا بيزنەس سۋبەك­­تىلەرىنىڭ جالپى سانىنىڭ 42,2% ايەلدەر باسقارادى», دەدى ل.رامازانوۆا.

ۇلتتىق كوميسسيا توراعاسى وتباسىلىق داستۇرلەردى ساق­تاۋ­داعى اۋىل ايەلدەرى ءرولىنىڭ ماڭى­زىنا توقتالىپ, بۇگىندە اۋىلدا 2 ملن-عا جۋىق وتباسى (44,5%) تۇراتىندىعىن اتاپ ءوتتى.

«ەجەلدەن وتباسى قوعامداعى بىرلىك­تىڭ, بەيبىتشىلىك پەن كەلى­سىمنىڭ سيمۆولى بولعان قازاق­ستان ءۇشىن بۇل وتە ماڭىزدى. سون­دىق­تان ەلىمىزدىڭ بارلىق وڭىرلەر­ىندە وتباسى ينستيتۋتىن نىعايتۋ جانە دامىتۋ ماقساتىندا جۇيەلى جۇ­مىس جۇرگىزىلۋدە. اۋىل ايەل­دەرىن ىلگەرىلەتۋدىڭ نەگىزگى ماسە­لە­لەرى 2030 جىل­عا دەيىنگى وتبا­سىلىق جانە گەندەرلىك ساياسات تۇ­جى­­رىمداماسىندا كورىنىس تاپ­قان», دەدى ل.رامازانوۆا.

ول سونداي-اق پاندەميا كەزىن­دە قابىلدانعان مەملەكەتتىك قول­داۋ شارالارى اۋىلداعى كاسىپكەر ايەلدەر ءۇشىن دە ماڭىزدى ەكەنىن اتاپ ءوتتى. بۇل قارىزدار, كرەديت­تەر جانە سالىقتار بويىنشا ءوسىم­­پۇلداردى, ايىپپۇلداردى جويۋ, مەملەكەتتىك ساتىپ الۋلاردى جۇر­گىزۋ ءتارتىبىن وڭايلاتۋ, بيۋد­جەتكە تولەنەتىن سالىقتىق جانە وزگە دە تولەمدەردى كەيىن­گە قال­دىرۋ, سالىقتى ەسەپتەۋ مەن تو­لەۋدى 6 ايعا كۇشىن جويۋ جانە باسقا دا بىرقاتار شارا­لار. الاي­دا وبەكتيۆتى وتباسى­لىق ءمان-جايلارى مەن مىندەت­تە­مەلەرى بار ايەلدەردىڭ پايداسىنا شەشۋدى قاجەت ەتەتىن دە ماسەلەلەر بار.

جىل سايىنعى اۋىل ايەل­دەرى­نىڭ فورۋمى پارلامەنت, ءماسلي­حات دەپۋتاتتارى, ورتالىق جانە جەر­گىلىكتى اتقارۋشى ورگانداردىڭ وكىلدەرى, اۋداندار مەن اۋىلدىق وكرۋگتەردىڭ اكىمدەرى, اۋىل شارۋاشىلىعى كاسىپورىن­دارى­نىڭ باسشىلارى مەن ماماندارى, اۋىل ينتەلليگەنتسياسىنىڭ وكىلدەرى, قوعامدىق ۇيىمداردىڭ بەل­سەندىلەرى قاتىساتىن اۋىل ايەلدەرىنىڭ الەۋمەتتىك بەلسەن­دىلى­گىن ارتتىرۋعا باعىتتالعان سىن­دارلى ديالوگ الاڭىنا اينال­دى.

ل.رامازانوۆا فورۋمدا اۋىل مەن اگروونەركاسىپتىك كەشەندى دامى­تۋداعى ايەلدەردىڭ ءرولىن ودان ءارى جانداندىرۋ بويىنشا بىرقاتار ناقتى مىندەتتەردى العا تارتتى. سونداي-اق فورۋمدا جىلدىڭ ۇزدىك بەلسەندىلەرى – ازا­ماتتىق قوعام, بيزنەس جانە اگرو­ونەركاسىپتىك كەشەن, باق وكىلدەرى, سونداي-اق اۋىلدىق جەرلەردى دامىتۋعا ۇلەس قوسىپ جۇرگەن ۇزدىك اۋىل ەڭ­بەك­كەرلەرى انىقتالدى. سونىمەن قاتار «اسقار شىڭدارعا تۋ تىككەن اۋىل ايەل­دەرى/100 يستوري ۋسپەحا سەلسكيح جەنششين» اتتى كىتابىنىڭ تۇساۋكەسەرى ءوتتى.

فورۋمنىڭ ۇيىمداس­تىرۋ­شىلارى مەن رەسمي سەرىكتەستەرى رەتىندە قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەمو­گرافيالىق سايا­سات جونىندەگى ۇلتتىق كوميس­سيا­نىڭ جانە Coca-Cola حالىق­ارا­لىق قورىنىڭ, ەقىۇ-نىڭ نۇر-سۇل­تان­داعى باعدارلامالار ءوفي­سىنىڭ قول­داۋىمەن «جاسىل ەكونو­ميكا جانە G-Global-دى دا­مىتۋ كواليتسياسى زتب, «EXPO&WOMEN» قم, «قازاق­ستان ايەل­دەرىنىڭ اگرارلىق وداعى» زتب, «الەۋمەتتىك ديناميكا» قورى بىر­لەسە جۇمىس اتقارىپ كەلەدى.