"نازارباەۆ زياتكەرلىك مەكتەپتەرى" دەربەس ءبىلىم بەرۋ ۇيىمىنىڭ پەداگوگيكالىق شەبەرلىك ورتالىعى الەم مۇعالىمدەرىنىڭ كاسىبي دامۋىن جوعارىلاتۋداعى ايرىقشا جەتىستىكتەرى ءۇشىن الەمدىك تاجىريبەلەردىڭ ۇزدىك وندىعىنا ەندى, دەپ حابارلايدى Egemen.kz.
ءبىلىم بەرۋ, عىلىم جانە مادەنيەت ماسەلەلەرى بويىنشا بىرىككەن ۇلتتار ۇيىمى پەداگوگتاردى كاسىبي وقىتۋ سالاسىنداعى جەتىستىكتەرى ءۇشىن تابىستالاتىن بەدەلدى UNESCO Hamdan 2019-2020 حالىقارالىق سىيلىعىنىڭ ناتيجەلەرىن جاريالادى.
پەداگوگيكالىق شەبەرلىك ورتالىعى مۇعالىمدەردىڭ جۇمىسىنىڭ تيىمدىلىگى مەن ناتيجەلىلىگىن كوتەرۋدەگى باعا جەتپەس تاجىريبەلەرى مەن جەتىستىكتەرى ءۇشىن UNESCO سىيلىعىنىڭ ۇزدىك 10 فيناليستەرى قاتارىنا ەندى. پشو ۇزدىك اكادەميالىق جەتىستىكتەرى مەن مۇعالىمدەردىڭ كاسىبي دامۋىنداعى قۇندى تاجىريبە ءۇشىن العىس سەرتيفيكاتىنا يە بولدى.
بەدەلدى حالىقارالىق سىيلىقتىڭ فيناليستەرىن حالىقارالىق قازىلار القاسىنىڭ ۇسىنىمدارى مەن باعالاۋى نەگىزىندە UNESCO باس ديرەكتورى ودرە ازۋلە ىرىكتەۋدەن وتكىزدى. قازىلار القاسىنىڭ قۇرامىنا پەداگوگيكا سالاسىندا بىرەگەي ءبىلىم مەن تاجىريبەگە يە الەمنىڭ ءتۇرلى ەلىنىڭ مويىندالعان ساراپشىلارى ەندى.
UNESCO Hamdan ميسسياسى – الەم مۇعالىمدەرىنىڭ ۇزدىك تاجىريبەلەرىنە ىقپالداسۋ. اتالعان بەدەلدى سىيلىق 2008 جىلى قۇرىلعان, ءار ەكى جىل سايىن تابىس ەتىلەدى. 2019-2020 جىلدارداعى بايقاۋعا وقىتۋدى جەتىلدىرۋ باعىتىندا قىزمەت ەتەتىن حالىقارالىق جانە ۇلتتىق 190 ۇيىم قاتىستى.
UNESCO Hamdan سىيلىعى پەداگوگيكالىق شەبەرلىك ورتالىعىنىڭ حالىقارالىق جەتىستىكتەرىنىڭ ءبۇتىن ءبىر توپتاماسىن جالعاستىردى. قازىرگى تاڭدا ورتالىق جاساپ شىعارعان بىلىكتىلىكتى ارتتىرۋدىڭ 10 ءبىلىم بەرۋ باعدارلاماسى ACQUIN (گەرمانيا) اككرەديتتەۋ, سەرتيفيكاتتاۋ جانە ساپانى قامتاماسىز ەتۋ ينستيتۋتىنىڭ حالىقارالىق سەرتيفيكاتتاۋىنان ءوتتى.
پەداگوگيكالىق شەبەرلىك ورتالىعىنىڭ حالىقارالىق دەڭگەيدە مويىندالۋى "نازارباەۆ زياتكەرلىك مەكتەپتەرى" دەربەس ءبىلىم بەرۋ ۇيىمىنىڭ ىنتىماقتاستىق اياسىن كەڭەيتۋ ءۇشىن جاڭا مۇمكىندىكتەرگە جول اشادى.