تريللەر جانرىنىڭ شەبەرى اتانعان حيچكوك «فيلم جەر سىلكىنىسىنەن باستالىپ, سودان كەيىن شيەلەنىس كۇشەيۋى كەرەك», دەيدى. كورەرمەنىن قورقىتا وتىرىپ كۇلدىرەتىن, سويتە تۇرا قايتادان ۇرەي قۇشاعىنان بوساتپايتىن «جانىم, سەن سەنبەيسىڭ!» ءفيلمى تىڭ تاقىرىپقا جول اشىپ بەردى.
جۋىردا اتالعان قازاقستاندىق فيلم XXIX «كينوشوك» اشىق كينوفەستيۆالىندە باس جۇلدە يەلەنىپ, «ۇزدىك ستسەناري» اتالىمىنا جانە ءباسپاسوز جۇلدەسىنە لايىق دەپ تانىلعان ەدى. كوكتەمدە ۇلكەن ەكرانعا جول تارتقان فيلم تۇساۋكەسەرى كارانتين ۋاعىنا تاپ كەلىپ, كوبىمىز كورىپ ۇلگەرمەي قالعانبىز. قارا كومەديا جانرىندا باس-اياعى ءبۇتىن, العاش رەت تۇسىرىلگەن فيلم قازاق كينوسىنداعى جاڭا بەلەس رەتىندە باعالانىپ وتىر.
Art Dealers شىعارماشىلىق توبىنىڭ قاتىسۋىمەن تۇسىرىلگەن ءفيلمنىڭ رەجيسسەرى ەرنار نۇرعاليەۆ, وپەراتورى ازامات دۋلاتوۆ, پروديۋسەرلەرى تيمۋر شەۆچەنكو مەن جاندوس ايباسوۆ.
سيۋجەت جەلىسى بويىنشا تۇڭعىش بالاسىن كۇتىپ جۇرگەن ەرلى-زايىپتىلاردىڭ ادەپكى ءومىر سالتىنان باستالادى. باس كەيىپكەر داستان (دانيار الشىنوۆ) ايەلىنەن (اسەل قاليەۆا) ءبىر كۇنگە بولسا دا قاشىپ كەتۋدى ويلاپ, دوستارىمەن بالىققا كەتەدى. اياق استىنان پالەگە ۇشىراماعاندا, بالكىم, كەرەمەت دەمالىپ تا كەلگەن بولار ما ەدى. مىنە, ءبىز كۇتكەن شيەلەنىس وسى تۇستان باستالادى.
كارتينا قارا كومەديانىڭ تابيعاتىنا ءتان اڭقاۋ, اڭعال, ۇردا-جىق كەيىپكەرلەر مودەلىنەن الشاقتامايدى. كاريكاتۋرالىق بەينەلەردىڭ جۇلدىزىن جاققان اكتەرلىك قۇرام رەجيسسەر تالابىنان تولىق شىققان دەۋگە نەگىز بار. بۇعان دەيىن تاريحي فيلمدەردە, درامالىق بەينەلەردە كورىنىپ كەلگەن دۋلىعا اقمولدانىڭ نانىمدى ويىنىمەن قازاق كينوسىندا جاڭا كەيىپكەردىڭ تۇساۋى كەسىلدى. بۇعان دەيىن قازاق فيلمدەرىندە كەزدەسپەيتىن مانياك وبرازى قانىشەرلىك مىنەز-قۇلقىمەن ەرەكشەلەنەدى. ارينە, بۇل الەم كينو تاريحىندا ۇيرەنشىكتى سحەما بولعانىمەن, ءوزىمىزدىڭ قازاقتان شىققان مانياكپەن «قورقىتۋ» دا بەلگىلى ءبىر دەڭگەيدە اسەرلى شىققان. بۇعان دەيىن قازاق كينو ەكرانىنان كوپ كورىنىپ جۇرگەن دانيار الشىنوۆ, ەركەبۇلان دايىروۆ, رۇستەم جانىامانوۆ, ەرلان پىرىمبەتوۆ, اسەل قاليەۆالار ويىنى بۇل فيلمدە كۇتپەگەن رولدە ەرەكشەلەنەدى ءارى كۇرەسكەر كەيىپكەرلەر قاتارىن ۇزدىك الىپ شىققان.
ەلىمىزدە كەيىنگى ون جىلدىقتا كومەديا جانرىنداعى فيلمدەر قارقىندى ءتۇسىرىلىپ جاتىر. دەسە دە قازاق كينوسىنا ورتاق ماسەلە – مازمۇن جۇتاڭدىعى مەن كەيىپكەر مىنەزىن كورسەتۋدەگى قاساڭدىق ءالى دە شەشىمىن تاپپاي كەلەدى. ماسەلەن, اتالعان فيلمدەگى ايەل بەينەسى اشۋشاڭ, كۇيەۋىنە كۇن كورسەتپەيتىن بەيمازا جان رەتىندە سۋرەتتەلەدى. قايتالانا بەرەتىن تاپتاۋرىن كورىنىستەن ارىلۋ, مادەني قۇبىلىستارعا ورتاق ادامزاتتىق قۇندىلىقتار تۇرعىسىنان قاراۋ – بۇگىنگى ۋاقىت تالابى. شىعارماشىلىق توپ العاشقى جۇمىسىن «تاجىريبە ەسەبىندەگى دۇنيە» دەپ باعالاپ وتىر. كوممەرتسيالىق فيلمدەر زاڭدىلىعىن باسشىلىققا العان بۇل تۋىندىدا دا تاپتاۋرىن شابلوندار كەزدەسپەي قويمايدى. بەلگىلى كينوتانۋشى مولديار ەرگەبەكوۆ قوعامنىڭ نەگىزگى پسيحولوگيالىق ءحالى ونەرگە اسەر ەتەتىن بولعاندىقتان, ارزان ازىلدەرگە جۇگىنۋدەن اۋلاق بولعاندى ءجون سانايدى. «قارا يۋموردىڭ قوعامدىق, الەۋمەتتىك ومىرىمىزبەن تىكەلەي بايلانىسى بار. شيەلەنىستەن تۋعان وقيعانى كۇلكىگە اينالدىرامىز. ءبىر جاعىنان ۇرەي بۋسا, ەكىنشى جاعىنان كۇلكى قىسادى. قارا كومەديانىڭ نەگىزگى ماقساتى – ءولىمنىڭ مازاققا اينالۋى, بۇل دا سونىڭ ءبىر كورسەتكىشى ءتارىزدى», دەيدى ول.
ءيا, كۇلكى مەن ءولىم قاقتىعىسىندا كۇلكىنىڭ جەڭىسكە جەتۋى شىعارمانىڭ جالپى تەگەۋرىنىن كورسەتەدى. ماسەلەن, كوميكس پەن تراگەديانىڭ بىرلىگى رەتىندە تانىلعان چەحوۆتىڭ «شەنەۋنىكتىڭ ءولىمى» اڭگىمەسىندە دە بولىپ جاتقان وقيعالار بەيتاراپ سۋرەتتەلىپ, قورىتىندى جاساۋدى وقىرماننىڭ ەنشىسىنە قالدىراتىن. «جانىم, سەن سەنبەيسىڭ!» فيلمىندە دە اجالدى مازاقتاۋ يدەياسى ءالسىز بەن كۇشتى كەيىپكەر اراسىندا تارتىسقا تۇسەدى. وقيعا مازمۇنى مەن كەيىپكەرلەر كوڭىل-كۇيىنە جايدارى, جارقىن بوياۋ ەنگىزگەن كومەديا اۆتورلارىنىڭ جاڭا دەڭگەيگە دەگەن تالپىنىسى انىق بايقالادى. سوندىقتان كۇلكىلى, كۇتپەگەن بەت بۇرىستارعا تولى ءفيلمدى كورىڭىز, قازاق كينوسىنىڭ بۇگىنگى تىنىسىنا كۋا بولىڭىز!