بۇگىنگى كۇنى الماتى وبلىسىنىڭ باسىم باعىتتارىنىڭ ءبىرى – اۋىل شارۋاشىلىعى جانە ونىڭ دامۋىنا مەملەكەت تاراپىنان ەلەۋلى قولداۋ كورسەتىلۋدە. بيىلعى جىلى قانت قىزىلشاسىنىڭ القابى 16 مىڭ گەكتارعا جەتتى. ودان 550 مىڭ توننا ءونىم الىپ, 50 مىڭ توننا اق قانت ءوندىرۋ جوسپارلانىپ وتىر, - دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
ەلباسىنىڭ قانت قىزىلشاسىنىڭ بۇرىنعى داڭقىن جاڭعىرتۋ تۋرالى تاپسىرماسىن ورىنداۋ ماقساتىندا وبلىس باسشىلىعى 2014 جىلدان باستاپ بارلىق قاجەتتى شارالاردى قابىلدادى.
ەگەر 2014 جىلى قانت قىزىلشاسىنىڭ القابى 1,2 مىڭ گەكتار بولسا, 2020 جىلى ول 16 مىڭ گەكتارعا جەتكىزىلىپ, 14 ەسەگە جۋىق كورسەتكىشكە ۇلعايتىلدى.
مۇنداي ناتيجەگە قول جەتكىزۋ ءۇشىن وبلىستىڭ شارۋا قوجالىقتارىنا سۋبسيديا بەرىلىپ, فرانتسيا, گەرمانيا, دانيا ەلدەرىنەن اكەلىنگەن جوعارى ونىمدىلىكتى تۇقىم بەرىلدى. ارنايى تەحنيكا جانە جانار-جاعارماي ماسەلەسى دە شەشىلدى.
"جەتىسۋ" اكك" ۇك" اق-نىڭ قاتىسۋىمەن قانت قىزىلشاسى باعىتىندا 29 سەرۆيستىك-دايىنداۋ ورتالىقتارى قۇرىلىپ, قۇنى 6,4 ملرد تەڭگە بولاتىن 621 بىرلىك ارنايى تەحنيكا ساتىپ الىندى. سدو-لار ءۇشىن بارلىعى 1200 بىرلىك اۋىل شارۋاشىلىعى تەحنيكاسى ساتىپ الىنىپ, قارجىلىق ليزينگىگە بەرىلدى.
ء"بىز قانت قىزىلشاسىن وسىرۋمەن قاتار وڭدەۋ ءىسىن دە شەشتىك. قىزىلشا ءوسىرۋ وتە اۋىر جۇمىستى تالاپ ەتەدى. سوندىقتان ونىڭ ءار تال ءونىمىن شاشاۋ شىعارماي وڭدەۋدى جولعا قويۋىمىز كەرەك بولدى. سوندىقتان ءبىز ەڭ الدىمەن جىلدار بويى توقتاپ تۇرعان كوكسۋ قانت زاۋىتىن, ودان كەيىن اقسۋ قانت زاۋىتىن ىسكە قوستىق. ينۆەستورلار تارتتىق. ولار زاۋىتتى قايتا جاڭعىرتۋدان وتكىزىپ, وتاندىق, رەسەيلىك, ۋكراينالىق جانە باسقا دا شەتەلدىك ەڭ وزىق ۇلگىدەگى قۇرال-جابدىقتاردى ورناتتى. سول سياقتى زاۋىتتاردا بۇرىننان ىستەگەن مامانداردى قايتا شاقىردىق", - دەپ اتاپ ءوتتى ا. باتالوۆ.
قازىرگى كەزدە كوكسۋ قانت زاۋىتى 260 مىڭ توننا قانت قىزىلشاسىن وڭدەۋگە قاۋقارلى. كاسىپورىن 80 % قايتا جاڭعىرتىلدى, ءوندىرىس تولىق اۆتوماتتاندىرىلعان, بۇل قانت ساپاسىن ەسەلەپ ارتتىرۋعا ىقپال ەتۋدە. تاعى ءبىر ماڭىزدى جايت – بۇل زاۋىت تابيعي گازعا قوسىلدى. كاسىپورىننىڭ ەكولوگيالىق تازا وتىنمەن جۇمىس ىستەپ تۇرعانىنا ەكى جىل بولدى. بۇل نىسانعا ەكونوميكالىق جاعىنان ءتيىمدى بولسا, ءوڭىر ءۇشىن ەكولوگيالىق جاعىنان ءتيىمدى. بۇرىن زاۋىت ماۋسىمىنا 10 مىڭ توننا مازۋت جاقسا, گازعا كوشكەلى وتىنعا كەتەتىن شىعىن 1,5 ەسە كەمىگەن.
بۇگىنگى كۇنى اقسۋ قانت زاۋىتىنىڭ كەزەكتى جاڭعىرتۋ جۇمىستارىنان كەيىن وڭدەۋ قۋاتتىلىعى 350 مىڭ توننادان 500 مىڭ تونناعا ۇلعايتىلدى.
زاۋىتتا قانت قىزىلشاسىنان شىعاتىن جومدى كەپتىرۋگە ارنالعان جانە ونى تۇيىرشىكتەيتىن جەلى ىسكە قوسۋعا دايىن.
"قىزىلشا جومى – مالعا تاپتىرمايتىن ازىق. وبلىستا مال بورداقىلاۋ الاڭدارىنىڭ قاتارى ارتىپ كەلەدى, سوندىقتان كەپتىرىلگەن جومدى وتكىزۋ قيىندىق تۋعىزبايدى. ونىڭ ۇستىنە جاڭا تەحنولوگيانىڭ ارقاسىندا جوم بريكەتتەلىپ, قۇرعاق كۇيىندە جەتكىزىلەدى. سوندا ول ۇزاق ساقتالادى ءارى ءوزىنىڭ پايدالى قاسيەتتەرىن جوعالتپايدى. سول سياقتى اشىتقى زاۋىتى مەن قۇراماجەم زاۋىتىن سالۋ ارقىلى ءوندىرىستى ودان ءارى كەڭەيتۋ جوسپاردا بار. ءسويتىپ زاۋىت قالدىقسىز وندىرەتىن كاسىپورىن بولادى. وندىرىستىك قۋاتىن ارتتىرۋدىڭ ارقاسىندا بىزگە تاعى ءبىر زاۋىتتى ىسكە قوسۋدىڭ قاجەتتىلىگى تۋمايدى. ءبىز قازىر سۋارمالى جەرلەردى ۇلعايتۋمەن, وعان قوسا قانت قىزىلشاسى القابىنىڭ كولەمىن ارتتىرۋمەن اينالىسىپ جاتىرمىز", - دەدى قانت قىزىلشاسى ءوندىرىسىن دامىتۋ تۋرالى جوسپارلارىمەن بولىسكەن اماندىق باتالوۆ.
جوم تەڭگە بريكەتتەلەدى, 1 تەڭ 800 كگ سالماق تارتادى. قانت قىزىلشاسى وڭدەلگەندە 100 %-ءتىڭ 22 %-ىنەن ساپالى جەمدىك قوسپا شىعادى. ينۆەستورلارمەن بىرلەسىپ, قانت زاۋىتىندا قامىس شيكىزاتىن وڭدەۋ باعىتىندا جاڭعىرتۋ جۇمىستارى جالعاسۋدا. بۇل زاۋىتتىڭ جىل بويى ۇزدىكسىز جۇمىس ىستەۋىنە مۇمكىندىك بەرەدى.
قابىلدانعان شارالاردىڭ ارقاسىندا 2023 جىلعا قاراي وبلىس ەلىمىزدىڭ اق قانتقا دەگەن سۇرانىسىنىڭ 70% قامتاماسىز ەتە الادى.
الماتى وبلىسىنىڭ قانت قىزىلشاسىنىڭ بۇرىنعى داڭقىن قايتا جاڭعىرتۋ باعىتىندا اتقارعان جۇمىستارى وسىنداي.