الماتىداعى قارا شاڭىراق قازۇۋ قالاشىعىندا شىعىستىڭ ۇلى ويشىلى ءابۋ ناسىر ءال-ءفارابيدىڭ الىپ پورترەتى كۇزگى جاپىراقتاردان بەينەلەندى. بابامىزدىڭ 1150 جىلدىق مەرەيتويىنا ارنالعان تاماشا تارتۋدىڭ اۆتورى – دجوحار يۋنۋسوۆ.
دجوحار بۇعان دەيىن دە كوشەدەگى كرەاتيۆتى ارت-جۇمىستارىمەن كوپشىلىكتى ءسۇيسىنتىپ جۇرگەن ەدى. بۇل جولى دا تابيعاتتىڭ توسىن مىنەزىنەن قورىقپاي, تاۋەكەل ەتكەن توپ توقتاماي 10 ساعات بويى جۇمىس ىستەگەن.
– بۇل جوبا مەنىڭ ومىرىمدەگى ەڭ ءورشىل ءارى قيىن جوباعا اينالدى. مۇنىڭ ءبارى نەگە كەرەك, ماعان بولا بۇكىل قازۇۋ جاپىراق جيناپ جاتىر. قانە, ەندى جاۋاپ بەر دەپ ءبىر كۇن قالعاندا ويلانا باستادىم, – دەيدى سۋرەتشى.
«تاۋەكەل ءتۇبى – جەلقايىق, وتەسىڭ دە كەتەسىڭ» دەمەكشى, جينالعان 50 قاپ جاپىراقتىڭ باۋىن شەشىپ جىبەرىپ, جۇمىسقا كىرىسىپ كەتكەن توپتىڭ ماقساتى ايقىن بولعانىمەن, ناتيجەسى ءبىر قۇدايعا ايان ەدى.
– ءسويتىپ جۇرگەندە فيلوسوفتىڭ تاقياسىنىڭ جارتىسىن دا جاپپاي جاپىراعىمىز تاۋسىلدى. سودان كەيىن جەل تۇرىپ, قۇيىنداتىپ كەتكەندە تابيعاتتىڭ كۇشىنە قارسى كەلىپ جاتىرمىز دەپ كۇدىكتەنە باستادىم. ءبارىن تاستاپ, تىرمالاپ جاتقان بالالاردى ۇيگە قايتارسام با دەپ تە ويلاندىم. بىراق مەن ونى كورسەتپەۋگە تىرىستىم, – دەيدى دجوحار.
بىرلىگى جاراسقان ەڭبەكقور توپ كەش قارايعانعا دەيىن تاپجىلماي جۇمىس ىستەپ, جۇمىستى ويداعىداي اياقتاعان. قاراڭعى ءتۇسىپ كەتكەندىكتەن پورترەتتى فوتو, ۆيدەوعا ءتۇسىرۋ مۇمكىن بولماي, ءۇيدى-ۇيىنە تارقاۋعا تۋرا كەلگەن. تاڭ اتا قايتا جينالعان شىعارماشىلىق توپ ناعىز كەرەمەتتىڭ كۋاسى بولعان ەدى.
– كەش باتىپ كەتىپ, پورترەتتى ءتۇسىرىپ ۇلگەرمەدىك. قالعان جۇمىستى تاڭعا قالدىرۋعا تۋرا كەلدى. ءتۇنى بويى جەل ۇشىرىپ كەتپەسىن دەپ تىلەدىم. تاڭەرتەڭ ءبىز كەلگەن بۇكىل ستاديون الاڭى تاڭعى شىقپەن كومكەرىلىپ, ءبىر جاپىراعى دا قيسايماپتى. مەن كوماندامنىڭ كوزىنەن سەنىمدى, تاۋەكەلدى كوردىم. ارقايسىسىنا جەكە راحمەتىمدى ايتامىن, – دەيدى ول.
قالا تۇرعىندارىن كۇتپەگەن جەردەن قۋانتىپ جۇرگەن سۋرەتشىنىڭ وسىعان دەيىن دانا ابايدىڭ, ديماشتىڭ پورترەتىنە ارنالعان جۇمىستارى الەۋمەتتىك جەلىلەردە كەڭ قولداۋعا يە بولعان ەدى. الەمنىڭ ەكىنشى ۇستازىنا ارنالعان بۇل جۇمىسى دا ونەر اياسىنىڭ, قيال كوكجيەگىنىڭ شەكسىز ەكەندىگىن كورسەتىپ بەردى.