كوپ جىلعى قالىپتاسقان ءداستۇرلى مانەرگە جاڭا لەپ اكەلگەن شىعارماشىلىق توپ جاڭا نەمىس كينەماتوگرافياسىنىڭ دامۋىندا ايرىقشا ورىن الادى. سونىڭ اراسىندا راينەر ۆەرنەر فاسسبيندەر, ۆەرنەر حەرتسوگ, فولكەر شلەندورف, مارگارەت فون تروتتا, ۆيم ۆەندەرس سىندى تالانتتى رەجيسسەرلەر شوعىرى الەم كينوسىندا جاقسى تانىلدى. ءبىر قايران قالدىراتىنى, كوركەمدىك سۋرەتتەۋدىڭ جاڭا مۇمكىندىكتەرىن قالىپتاستىرۋ جولىندا جۇرتشىلىق كامەرا سىرتىنداعى ايەلدەردى تاني بەرمەيدى. ءبىز بۇگىن نەمىس فيلم ساحناسىنان جۇرت ءبىلۋى ءتيىس تۇلعالاردى نازارعا ۇسىنباقپىز.
كارولينا لينك,
رەجيسسەر
ونىڭ «تىنىشتىقتىڭ ار جاعىندا» (Jenseits der Stille) اتتى كينو دەبيۋتىنىڭ ءوزى 1998 جىلى وسكار سىيلىعىنا ۇسىنىلعان-دى. بەس جىلدان كەيىن كارولينا لينك «افريكادا ەشقايدا» (Nirgendwo in Afrika) ءفيلمى «شەت تىلىندەگى ۇزدىك فيلم» بولىپ تانىلىپ, اقش-تىڭ ەڭ تانىمال ماراپاتى وسكار جۇلدەسىنىڭ يەگەرى اتاندى. 2018 جىلى كوميك كەركەليننىڭ ءومىربايانى نەگىزىندە تۇسىرىلگەن «بالاعا تازا اۋا قاجەت» (Der Junge muss an die frische Luft) ءفيلمى دە رەجيسسەردىڭ ۇلكەن جەتىستىگىنە اينالدى. 2019 جىلى ۇلكەن ەكرانعا جول تارتقان يۋديت كەرردىڭ رومانى بويىنشا تۇسىرىلگەن «گيتلەر قىزعىلت كوجەكتى ۇرلاعاندا» (Als Hitler das rosa Kaninchen stahl) ءفيلمى كورەرمەن تاراپىنان وڭ باعاعا يە بولعان ەدى.
انەتتە حەسس,
كينودراماتۋرگ
گەرمانيا تاريحى جايلى تەلەفيلمدەر مەن سەريالدار ءۇشىن ستسەناري جازىپ جۇرگەن بەلگىلى كينودراماتۋرگتەردىڭ ءبىرى. احيم فون ءبورريستىڭ «ويداعى ماحاباتتان نە پايدا» (Was nützt die Liebe in Gedanken) كينوفيلمىنە ستسەناري جازۋى ونىڭ كاسىبي جەتىستىگىن وسىرە ءتۇستى. 2021 جىلى ء«بىز زوو بەكەتىنىڭ بالالارىمىز» (Wir Kinder vom Bahnhof Zoo) اتتى سەريالىنىڭ امازوندا تۇساۋكەسەرى وتپەك. بۇل ا.حەسستىڭ باس اۆتور رەتىندە توپپەن جۇمىس ىستەگەن العاشقى تاجىريبەسى.
تەا فون حاربوۋ,
كينودراماتۋرگ
نەمىس كينو تاريحىندا ءاۋ باستان ەرەكشە ورنى بار كينودراماتۋرگ كوپتەگەن كلاسسيكالىق ەكسپرەسسيونيستىك فيلم مەن روماننىڭ ستسەناري اۆتورى. 1920 جىلدارى كورنەكتى دىبىسسىز فيلمدەرگە ستسەناري جازىپ, بەلگىلى رەجيسسەرلەرمەن, ونىڭ ىشىندە فريدريح ۆيلگەلم مۋرناۋمەن بىرگە جۇمىس ىستەدى. ءوزىنىڭ زايىبى – رەجيسسەر فريتس لاڭمەن بىرگە «مەتروپوليس نەمەسە M» (Metropolis oder M) سىندى فيلمدەرگە ستسەناري جازعان. 1933 جىلى كۇيەۋى ايدالىپ كەتكەندە دە, مانسابىن جالعاستىرىپ, ۇسدجپ مۇشەسى بولعانى ءۇشىن حاربوۋدىڭ جەكە باسىنا قاتىستى قاراما-قايشى پىكىر دە ايتىلىپ جاتادى.
رەگينا تسيگلەر,
پروديۋسەر
1973 جىلى 29 جاسار رەگينا تسيگلەر ءوزىنىڭ جەكە كينو تۇسىرەتىن فيرماسىن قۇرعان العاشقى ايەل اتاندى. ونىڭ «مەن ءولىمىن دەپ ويلادىم» (Ich dachte, ich wäre tot) دەپ اتالعان العاشقى ءفيلمى نەمىس كينو اكادەمياسىنىڭ سىيلىعىن جەڭىپ الدى. 50 جىل ىشىندە 500-دەي كينوفيلم, تەلەفيلم تۇسىرگەن تسيگلەر كەيىن گەرمانيانىڭ ەڭ تابىستى پروديۋسەرىنە اينالدى. تسيگلەر كوڭىل اۋلايتىن فيلمدەرمەن قاتار كۇردەلى جۇمىستارعا دا پروديۋسەرلىك ەتتى. كەيىنگى تانىمال جۇمىستارى رەتىندە فيليپپ ءشتيولتسلدىڭ «مەن نيۋ-يوركتە بولعان جوقپىن» (Ich war noch niemals in New York) جانە فولكەر شلەندورففتىڭ «مونتوكقا ورالۋ» (Rückkehr nach Montauk) فيلمدەرىن ايتۋعا بولادى.