ءبىر ەمەس, ءتورت رەت ۆيزا الا الماۋ, جول اپاتى, ءتىل بىلمەۋدەگى قيىندىقتار, پاندەميا جانە تاعى باسقا كەدەرگىلەر بۇلبۇل قارتاڭباەۆانىڭ ارمان جولىنداعى قادامدارىنا توسقاۋىل بولا العان جوق. بۇلبۇل – قازاقستاننىڭ اتىنان ۇلتتىق اي̆ەلدەر حوككەي̆ ليگاسىندا (NWHL) ويناپ جۇرگەن العاشقى اي̆ەل.
حوككەي̆دەگى مانسابىن 13 جاستان باستاعان بۇلبۇل – جامبىل وبلىسىنىڭ تۋماسى. ول «Tomiris Astana» كومانداسىنىڭ كاپيتانىنان باستاپ, كانادا مەن اقش-تىڭ كاسىبي حوككەي̆ ليگالارىنداعى وي̆ىنىنا دەي̆ىنگى تارتىستى ءھام قىزعىلىقتى جولدان ءوتتى. ءوزىنىڭ ايتۋىنشا, 2016 جىلى كانادا مەن پوستكەڭەستىك ەلدەردىڭ ديپلوماتيالىق قارىم-قاتىناستارىنىڭ 25 جىلدىعى اياسىندا قازاقستانعا كەلگەن كانادا اي̆ەلدەر حوككەي̆ ليگاسىنىڭ نەگىزىن قالاۋشى دجو سمولمەن كەزدەسۋى جاڭاشا سەرپىن سىيلاعان. بۇل كەزدەسۋ بۇلبۇلعا اسەر ەتكەنى سونشالىق, سولتۇستىك امەريكانىڭ حوككەي̆ ليگاسىندا وي̆ناۋدى ارماندايدى. وسىلايشا, 2017 جىلى ءوزىنىڭ قابىلەت-قارىمىن كورسەتۋ ءۇشىن تۇسىرگەن ۆيدەوروليگى اي̆ەلدەر حوككەي̆ الەمىندە بىردەن تانىلىپ, بۇلبۇلدىڭ قابىلەتىن «Boston Blades» كومانداسى باي̆قاپ, ونى CWHL 2017 ماۋسىمىندا وي̆ناۋعا شاقىردى. بىراق ويىنعا شاقىرتۋ الىپ قانا اقش-قا كەتە قويامىن دەۋ وڭاي بولماي شىقتى. ۆيزا الا الماعاننان كەي̆ىن, مەن بارىنەن باس تارتا جازدادىم», دەپ ەسكە الادى بۇلبۇل. «بىراق انام مەنى قولدادى. ول وسى وي̆ىندى قانشالىقتى جاقسى كورەتىنىمدى ەسىمە سالىپ وتىردى. اسىرەسە بارىپ-كەلۋگە ۇشاققا بيلەت الۋ, ۆيزا راسىمدەۋ ارزان ەمەس. انام مەنى قولداپ, ءوز اتىنا نەسيە الىپ بەردى. وسى قولداۋى ءاردايىم ەسىمدە جۇرەدى», دەيدى ول.
اقش-قا كەلگەن ول العاشقى تاجىريبەسىن «Metropolitan Riveters» كومانداسىندا باستاپ, ۇلتتىق اي̆ەلدەر حوككەي̆ ليگاسىندا (NWHL) كاسىبي كەلىسىمشارتقا قول قوي̆عان العاشقى قازاقستاندىق بولدى. ال 2020 جىلدىڭ ماۋسىم اي̆ىندا بۇلبۇل اقش-تىڭ نيۋ-دجەرسي شتاتىنداعى «Princeton Tiger Lilies» حوككەي̆ كلۋبىنىڭ باس باپكەرى بولىپ تاعاي̆ىندالدى.
بىراق ونىڭ حوككەيدەگى مانسابى قىزىعىمەن قوسا قيىندىعىمەن قاتار ءجۇردى. 2019 جىلى قىستا جول اپاتىنا ءتۇسىپ, جاراقات العان بۇلبۇل ءبىراز ۋاقىت ويىنعا قاتىسا الماي, قىزۋ دايىندىقتى ەمدەلۋگە ايىرباستادى. ودان كەيىنگى جەر-جاھاندى دۇرلىكتىرگەن پاندەميادان جاتتىعۋ الاڭدارى جابىلىپ, مانساپ جولىنداعى ىلگەرىلەۋ باياۋلاپ قالعان ەدى. ءدال وسىنداي سىن ساعاتتاردا «Metropolitan Riveters» كومانداسى بۇلبۇلعا كوماندا قۇرامىنىڭ تولىق ەكەنىن حابارلاعان-دى. بىراق ءوزىنىڭ تاجىريبەسى مەن تاباندىلىعىنىڭ ارقاسىندا ول كاسىبي ايەلدەر حوككەي قاۋىمداستىعىنا (PWHPA) قابىلداندى.
«ەرەسەك ايەلدەرگە ارنالعان حوككەي مەكتەبى جوقتىڭ قاسى. تەك ءجاسوسپىرىم قىزدارعا نەمەسە ەرلەرگە ارنالعان لاگەرلەر عانا قولجەتىمدى. ءدال وسى نارسە بۇكىل الەمدەگى جاس ويىنشىلاردى بىرىكتىرۋگە ارنالعان حالىقارالىق ايەلدەر حوككەي لاگەرىن قۇرۋعا شابىت بەردى», دەيدى ول.
بۇلبۇل الەۋمەتتىك جەلىلەردە ءوزىنىڭ جوسپارىن جاريالاعاننان كەيىن, ونىڭ تۇجىرىمداماسىنا الەم ويىنشىلارىنان قىزىعۋشىلىق تانىتقاندار قاتارى كۇرت ارتقان. قازىر بۇلبۇل سپورتتاعى ءوز مانسابىنان باسقا, جاس سپورتشىلاردى قولداۋعا باعىتتالعان «Kartanbay» قورىن قۇردى.
«مەن دارىنى مەن داعدىسى تەڭ تۇسەتىن كوپتەگەن جاس حوككەيشىنى كەزدەستىردىم, بىراق ولاردىڭ ءوز دامۋىن جالعاستىرۋى ءۇشىن قارجىلىق قولداۋ جوق. ەگەر ءبارى ويداعىداي بولسا جانە پاندەميا جاعدايى مۇمكىندىك بەرسە, 2021 جىلدىڭ جازىندا لاگەر اشۋدى جوسپارلاپ وتىرمىن. ءبىزدىڭ قوردىڭ ماقساتى – ويىنشىلاردىڭ كاسىبي دامۋىن قۇنتتاپ, الەمگە ءوز دارىنىن تانىتا الاتىنداي قولداۋ كورسەتۋ», دەيدى حوككەيشى قىز.