• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
ەلوردا 23 قازان, 2020

ەرەكشە ءبىلىم بەرۋ قاجەتتىلىكتەرى بار بالالار قانداي رەجىمدە وقيدى؟

475 رەت
كورسەتىلدى

نۇر-سۇلتاندا 15 ارنايى ءبىلىم بەرۋ ۇيىمى جۇمىس ىستەيدى جانە 18 جاسقا دەيىنگى ەرەكشە ءبىلىم بەرۋ قاجەتتىلىگى بار 10 مىڭنان استام بالا تىركەلگەن. بريفينگتە قالالىق ءبىلىم باسقارماسىنىڭ باسشىسى شولپان قادىروۆا حابارلاعانداي, پسيحولوگيالىق-مەديتسينالىق-پەداگوگيكالىق كونسۋلتاتسيانىڭ (پمپك) قورىتىندىسى ارنايى ۇيىمدارعا قابىلدانۋ ءۇشىن نەگىز بولىپ تابىلادى, دەپ حابارلايدى Egemen.kz

"قابىلداۋ الدىن الا جازىلۋ ارقىلى اتا-انالار ءۇشىن ىڭعايلى فورماتتا جۇزەگە اسادى. تىكەلەي جۇگىنۋگە, تەلەفون ارقىلى جانە بيىل تامىز ايىنان باستاپ egov.kz "ەلەكتروندى ۇكىمەت" پورتالى ارقىلى جازىلۋعا بولادى. بۇگىنگى تاڭدا پمپك شتاتتىق رەجيمدە جۇمىس ىستەيدى, سونىمەن قاتار اتا-انالاردىڭ قالاۋى بويىنشا ونلاين-تەكسەرۋگە دە بولادى", دەپ ءتۇسىندىردى شولپان قادىروۆا.

ەموتسيونالدى ەركى مەن مىنەز-قۇلقى بۇزىلعان, سونداي-اق ەستۋ جانە كورۋ قابىلەتى بۇزىلعان وقۋشىلار وقۋعا شتاتتىق رەجيمدە قابىلدانادى. تىرەك-قيمىل اپپاراتى بۇزىلعان جانە پسيحيكالىق دامۋى تەجەلگەن بالالار ونلاين-رەجىمدە تەكسەرۋدەن وتە الادى.

"قاشىقتىقتان جۇمىس ىستەۋ كەزەڭىندە 1 767 بالا ونلاين-تەكسەرۋدەن ءوتتى, ونىڭ ناتيجەلەرى بويىنشا ءار بالاعا جەكە ءبىلىم بەرۋ باعىتى ازىرلەندى", دەپ حابارلادى باسقارما باسشىسى.

ەلوردادا قاشىقتان وقىتۋعا كوشۋگە بايلانىستى بالالاردى تۇزەتۋ-دامىتۋ قىزمەتتەرىمەن قامتۋ 10% ارتتى. قازىرگى ۋاقىتتا 1413 بالا پسيحولوگيالىق-پەداگوگيكالىق كومەك الۋدا.

"سونىمەن قاتار, اۋتيستىك سپەكتردىڭ بۇزىلۋلارى جانە كورۋ قابىلەتىنىڭ بۇزىلۋى بار بالالار ءۇشىن كورۋ جانە ەموتسيالىق بايلانىستاردىڭ بولماۋىنا بايلانىستى قاشىقتان وقىتۋ قيىن بولدى. سوندىقتان ولار كەزەكشى سىنىپتاردا وقيدى جانە ولار ءۇشىن جەكە ساباق كەستەسى جاسالدى. اتا-انالارعا ارنالعان كونسۋلتاتسيالار ولارعا ىڭعايلى ۋاقىتتا ونلاين-رەجىمدە وتەدى", - دەپ اتاپ ءوتتى سپيكەر.

وسى جىلى قالادا ارنايى ءبىلىم بەرۋ ۇيىمدارىنىڭ جەلىسى كەڭەيدى. شىلدە ايىندا № 5 "اسىل ميراس" پسيحو-پەداگوگيكالىق تۇزەتۋ كابينەتى اشىلدى, وندا حالىقارالىق سەرتيفيكاتى بار ماماندار جۇمىس ىستەيدى. سونداي-اق, № 8 جانە 89 مەكتەپتەر بازاسىندا ارقايسىسى 30 ورىندىق ەكى ينكليۋزيانى قولداۋ كابينەتى اشىلدى.

سونىمەن قاتار, № 3 پسيحولوگيالىق-مەديتسينالىق-پەداگوگيكالىق كونسۋلتاتسيا جانە № 2 پسيحو-پەداگوگيكالىق تۇزەتۋ كابينەتى ءۇشىن جاعالاۋ شاعىن اۋدانىندا جەكە كەڭ عيماراتتار قاراستىرىلعان, بۇل بالالاردى قامتۋدى 50% ارتتىرۋعا مۇمكىندىك بەردى.

سوڭعى جاڭالىقتار