اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە "اباي شىعارمالارىنىڭ تۇركى الەمىندە زەرتتەلۋى مەن ناسيحاتتالۋى" عىلىمي كونفەرەنتسيا اياسىندا نەمات كەلىمبەتوۆ اتىنداعى تۇركىتانۋ ورتالىعى ابايدىڭ 175 جىلدىق مەرەيتويىنا وراي "اباي قۇنانباي ۇلى. عاقليا كىتابى" كىتابىن تانىستىردى, دەپ حابارلايدى Egemen.kz
تۇركىتانۋ عىلىمى سالاسىندا عىلىمي جوبالار جاساپ, تۇركى الەمىنىڭ ءتىلى, ادەبيەتى, تاريحى جانە مادەنيەتىنە قاتىستى كونفەرەنتسيالار مەن سەمينارلار ۇيىمداستىرۋ, عىلىمي ەڭبەكتەردى جارىققا شىعارۋدى ماقسات ەتەتىن نەمات كەلىمبەتوۆ اتىنداعى تۇركىتانۋ ورتالىعى 2013 جىلى اشىلعان بولاتىن.
ۋنيۆەرسيتەتتىڭ "ۇلاعات" باسپاسىنان جارىققا شىققان كىتاپتا 1907 جىلى مۇرسەيىت بىكە ۇلى حاتقا تۇسىرگەن اباي قارا سوزدەرىنىڭ قولجازباسى, ترانسكريپتسياسى جانە گرامماتيكالىق يندەكسى بەرىلگەن. ەڭبەكتە بۇدان بولەك XX عاسىر باسىنداعى قولجازبالاردىڭ تىلدىك ەرەكشەلىكتەرىنە سيپاتتاما جاسالىپ, اباي قارا سوزدەرىنىڭ ءتىلى تالدانعان. بۇل جۇمىس قازىرگى قازاق تىلىنە سايكەس بىرنەشە رەت وڭدەلىپ وزگەرتىلگەن قارا سوزدەردىڭ تۇپنۇسقاسىمەن بىرگە ۇسىنىلىپ, جاڭاشا وقىلۋى جانە گرامماتيكالىق يندەكسىنىڭ بەرىلۋىمەن ەرەكشەلەنەدى. كىتاپ اۆتورى تۇركيالىق عالىم PhD دوكتور ەرجان پەتەك. كىتاپتى تۇرىك تىلىنەن اۋدارىپ, عىلىمي رەداكتسياسىن جاساعان نەمات كەلىمبەتوۆ اتىنداعى تۇركىتانۋ ورتالىعىنىڭ باس عىلىمي قىزمەتكەرلەرى فيلولوگيا عىلىمىنىڭ دوكتورى, پروفەسسور شەرۋباي قۇرمانباي ۇلى جانە PhD دوكتور مارلەن ءادىلوۆ.
پروفەسسور شەرۋباي قۇرمانباي ۇلى اباي تىلىندەگى ەسكى قازاق جازبا جانە اۋىزەكى تىلىنە قاتىستى نۇسقالار مەن كىرمە ەلەمەنتتەردىڭ دىبىستىق وزگەرىسىنىڭ تاريحى تالدانىپ ۇسىنىلعان جيناقتا مورفولوگيالىق ەرەكشەلىكتەر, كىرمە سوزدەردىڭ قازاقى فورماسى تۇسىندىرىلگەندىگى جايىندا ايتىپ وتسە, تۇركىستاندا ءتورت جىلداي عىلىمي زەرتتەۋمەن اينالىسقان تۇركيالىق عالىم, PhD دوكتور ەرجان پەتەك وسى ۋاقىت ىشىندە قازاق ءتىلى جانە ادەبيەتىمەن قاتار جىراۋلار پوەزياسىمەن تەرەڭ تانىستىعى جايىندا ايتا كەلە اباي قۇنانباي ۇلىنىڭ 175 جىلدىعىنا ءوز ۇلەسىن قوسۋ ماقساتىندا اقىن جايىنداعى ەڭبەكتى جازعاندىعى تۋرالى باياندادى.