عيباداتحانانىڭ العاشقى كىرپىشىن قالاۋ سالتاناتىنا وبلىس اكىمى سەرىكباي ترۇموۆ پەن قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى قاتىستى. ولار ەستەلىك جازىلعان كاپسۋلا سالدى. ال ايماق باسشىسى يگىلىكتى باستاماعا ساتتىلىك تىلەپ, ەل مۇددەسىنە باعىتتالعان وسى ساۋاپتى ءىستىڭ باستالۋىمەن قۇتتىقتادى, دەپ حابارلايدى Egemen.kz
"بۇگىن, قاسيەتتى جۇما كۇنى وبلىس ورتالىعى اقتاۋ قالاسىندا جاڭادان اللا ءۇيى بوي كوتەرىپ, ىرگەتاسى قالانىپ وتىر. جاڭا "ەرجان حازىرەت" مەشىتى يماندىلىقتىڭ تەمىرقازىعىنا اينالىپ, حالقىمىزدىڭ رۋحاني قۇندىلىعىن نىعايتۋعا قىزمەت ەتەتىندىگىنە سەنەمىن", دەدى سەرىكباي ترۇموۆ.
جاڭا مەشىت ءدۇيىم جۇرتقا قادىر-قاسيەتىمەن دارالانعان ءدىني اعارتۋشى ۇستاز, عۇلاما تۇلعا ەرجان تولەگەن ۇلىنىڭ اتىمەن اتالماق. ەرجان تولەگەن ۇلىنىڭ اۋزى دۋالى, سانانى سىلكىنتەر, ويدى وياتار, ءار قادامى, ءار ءسوزى, ءار ءىس-قيمىلى وزىنە تارتىپ, ەسىمى ەلگە ەتەنە تانىس, ءبىرتۋار ادام بولعان.
ونىڭ ەسىمى ءبىزدىڭ ەلدە عانا ەمەس, يران, تۇركيا, تۇركىمەنستان, وزبەكستان, رەسەيدە دە زور قۇرمەتپەن اتالدى. زامان تالابىنا ساي سالىناتىن مەشىت 2 قاباتتى, بيىكتىگى مۇناراسىمەن قوسا ەسەپتەگەندە 19260 مەتر. ءبىر ۋاقىتتا 500 ادام قۇلشىلىق ەتە الادى. اۋماعىندا توسەلەتىن قىرلى تاستار جايناماز سەكىلدى بولماق. ودان بولەك, 300 كولىككە ارنالعان اۆتوتۇراق بولادى. جاڭا قۇلشىلىق ءۇيىنىڭ قۇرىلىسى 2021 جىلدىڭ سوڭىندا اياقتالادى دەپ جوسپارلانعان.