ەلباسى بۇگىندە سالتاناتتى ەلورداسى بار ەگەمەن مەملەكەتتە ءومىر ءسۇرىپ جاتقان جاسامپاز ۇرپاق ۇلتتىق شەكسىز قۇندىلىقتىڭ قادىرىن ءبىلىپ, ماڭىزىن تۇسىنۋگە ءتيىس ەكەنىن ايتتى. بۇل تۋرالى ول "Egemen Qazaqstan" گازەتىندە جاريالانعان "اباي اماناتى" اتتى ماقالاسىندا جازدى, دەپ حابارلايدى Egemen.kz.
"اباي زامانىندا تولىق بوداندىققا دۋشار بولعان قازاق جەرى بۇتارلانعان, بولشەكتەلگەن. قارمايتىن تال قالماي, ەل تۇڭعيىققا سۇڭگىگەن. كەزىندە تورتكۇل دۇنيە تارابىن توعىستىرىپ, الاش جۇرتىنىڭ ايبىنىن اسىرعان, ماڭگىلىك ۇيىتقىسىنا اينالعان كىندىك شاھار – تۇركىستان ءوز مارتەبەسىن جوعالتقانىنا ءبىراز ۋاقىت وتكەن. شىن مانىندە, ابايدىڭ يەك ارتىپ, ءتاۋ ەتىپ باراتىن استاناسى دا جوق ەدى. ەلدىكتى اڭساعان, بىرلىكتى كوكسەگەن دانىشپان ءۇشىن مۇنان ارتىق قاسىرەت تابىلماس", دەلىنگەن ماقالادا.
وسى ورايدا ەلباسى بۇگىنگى كۇنى الەمدى اۋزىنا قاراتقان سالتاناتتى ەلورداسى بار ەگەمەن مەملەكەتتە ءومىر ءسۇرىپ جاتقان ونىڭ جاسامپاز ۇرپاعى مۇنداي ۇلتتىق شەكسىز قۇندىلىقتىڭ قادىرىن ءبىلىپ, ماڭىزىن تۇسىنۋگە ءتيىس ەكەنىن اتاپ ءوتتى.
"ابايدىڭ وسى ارمانىنىڭ ورىندالعانىنا, ەسىلدىڭ جاعاسىندا ەڭسەلى بايتاق قالانىڭ ىرگە تەۋىپ, بوي كوتەرۋىنە مۇرىندىق بولعانىما مىڭ دا ءبىر شۇكىرشىلىك ەتەمىن", دەدى ن.نازارباەۆ.