اقتاۋ قالاسى 33 ش/ا كوپقاباتتى ۇيلەردىڭ بىرىنەن, ناقتىراق ايتقاندا 4-ءشى قاباتتان 4 جاسار بالانىڭ قۇلاپ كەتكەندىگى جونىندە "103" قىزمەتىنە شاقىرتۋ تۇسكەن بولاتىن. وقيعا قازان ايىنىڭ 4 كۇنى ساعات شامامەن 14:55 ۋاقىتىندا بولعان.جەدەل جاردەم بريگاداسى وقيعا ورنىنا جەدەل جەتىپ, جاراقات العان بالانى ماڭعىستاۋ وبلىستىق كوپبەيىندى بالالار اۋرۋحاناسىنا جەتكىزگەن.بۇل تۋرالدى ماڭعىستاۋ وبلىستىق دەنساۋلىق ساقتاۋ باسقارماسى ءباسپاسوز قىزمەتى حابارلادى.
العاشىندا ول ەسىن بىلمەگەن, جانساقتاۋ بولىمىنە جاتقىزىلدى. ەرتەسىنە كوزىن اشتى, وتا جاساۋ قاجەتتىلىگى بولماعان. سۇيەگىنىڭ سىنۋى, باس ميىنىڭ شايقالۋى, ءۇشىنشى دارەجەلى تراۆماتيكالىق شوك دياگنوزى قويىلدى. بالانىڭ قازىرگى جاعدايى تۇراقتى. بۇگىن جانساقتاۋ بولىمىنەن تراۆماتولوگيا بولىمىنە اۋدارىلدى. مامانداردىڭ ايتۋىنشا, كەلەسى دۇيسەنبى, ياعني 7 كۇننەن ۇيىنە جىبەرىلەدى. قالعان ەم-دوم شارالارىن تۇرعىلىقتى مەكەنجايى بويىنشا جالپى تاجىريبەلى دارىگەر جازىپ بەرگەن تاعايىنداۋعا سايكەس جۇزەگە اسىرىلادى.
بيىل جىل باسىنان بەرگى 9 ايدا بيىكتىكتەن قۇلاۋ دەرەگى بويىنشا 33 دەرەك تىركەلدى, ونىڭ 17-ءسى تۇرعىن ۇيلەردەن قۇلاعان. سونداي-اق, جىل باسىنان بەرى 1 بالا قايتىس بولعان. اتاپ ايتقاندا, 17 ش/ا ورنالاسقان كوپقاباتتى ۇيلەردىڭ بىرىنەن, ناقتىراق ايتقاندا 8 قاباتتان قۇلاعان 1 بالا كوز جۇمدى.
ماڭعىستاۋ وبلىسى