قانداستارعا انمەن تارتۋ جاسالدى

مادەني شارانى اشىپ, بۇل جولعى وتكىزىلىپ وتىرعان ونلايىن كونتسەرتتىڭ ماڭىزى جايلى ايتقان "وتانداستار قورى" كەاق ۆيتسە-پرەزيدەنتى ماعاۋيا سارباسوۆ, ەلىمىز شەكاراسىنان تىس جەردە ءومىر ءسۇرىپ جاتقان قازاق قانداستارىمىزدى ۇلتىمىزدىڭ رۋحاني بۇلاعىنان سۋسىنداتۋ ءبارىمىزدىڭ قاسيەتتى بورىشىمىز دەگەنگە توقتالىپ, بۇگىنگى ونلايىن كونتسەرتكە رەسپۋبليكاعا تانىمال ەڭ ۇزدىك ونەر يەلەرى مەن شىعارماشىلىق ۇجىم مۇشەلەرى شاقىرىلعانىن كونتسەرتكە الىستان كوز تىگىپ وتىرعان كوپشىلىككە ماقتانىشپەن جەتكىزدى.

وسىلايشا, الىستاعى اعايىندار اسىعا كۇتكەن كونتسەرتتىڭ العاشقى بەتاشار ءانى "حالىق قازىناسى" مەملەكەتتىك ونەر ۇجىمىنىڭ جەتەكشىسى ەرلان رىسقاليدىڭ ورىنداۋىندا "قازاعىم-اي" انىمەن باستالدى. بۇل ءاننىڭ ءسوزىن جازعان ۇلكەن اقىن  م.ماقاتاەۆ بولسا, ءانى تۇرسىنعازى راحىموۆتىكى. "پاي, پاي, پاي ارداعىم-اي, سەن مەنىڭ شولپانىمسىڭ جانعان ۇداي...", دەپ شىرقالعان  اسقاق ءان ءبىر دەمدە كورەرمەننىڭ كوڭىل پەرنەسىن سەرپىلتكەنى انىق. ودان كەيىن ورىندالعان ابايدىڭ "سەگىز اياعى" دا ءوز ۇدەسىنەن شىقتى.

كەلەسى كەزەكتە, شەرتپە كۇيدىڭ شەبەرى, تانىمال ونەر يەسى جانعالي ءجۇزباي قارا دومبىراسىن قولعا الىپ, اۋەلى سۇگىردىڭ "شالقىماسىن" شالقىتسا, ىلە-شالا ت.مومبەكوۆتىڭ "سالتاناتىن" جانە شاقاباي شالاپتىڭ ءوز كۇيىن سايراتتى.

ودان كەيىن حالىق انىنە جول اشىلىپ, ءداستۇرلى ءانشى ارداق بالاجانوۆا ءۇش ىشەكتى دومبىرامەن "اسىلزات" جانە "ۋگاي-اي" اندەرىن تاماشا ورىنداسا,  ءىزىن جالعاپ سىر ساندىعىن سىرنايلاتقان كلارا تولەنباەۆا  نارتاي اقىننىڭ تەرمەسىن ناقىشىنا كەلتىرىپ شىرقادى.

سونداي-اق, حالىقارالىق بايقاۋلاردىڭ لاۋرەاتى, قوبىزشى اقەركە تاجىباەۆانىڭ ورىنداۋىندا ىقىلاستىڭ كۇيى «قازان», ءداستۇرلى ءانشى ەربولات شالدىبەكوۆتىڭ ورىنداۋىندا كەنەن اتانىڭ "كوك شولاق" ءانى, جەتىگەندە كۇي ورىنداۋدىڭ شەبەرى ۆەنەرا تابىس قارىنداسىمىز ورىنداعان  حالىق اندەرىنەن پوپۋري, سوڭىندا  ۇجىم بولىپ شىرقاعان حالىق ءانى "ارمان-اي" مەن جاس تالانت اسقار مۇقياتتىڭ "اتا جۇرت" ءانى كورەرمەننىڭ كوڭىلىنەن شىقتى.