«ارماندا! ۇسىن! ىسكە اسىر!» 4 جىلدان بەرى قازاقستاندىق جاستاردىڭ ۇرانىنا اينالعان وسى سوزدەر جەكە الەۋمەتتىك جوباسىن ىسكە اسىرۋعا بەل بۋعان جاستار كورپۋسى دامىتۋ جوباسىنىڭ قاتىسۋشىلارىنا دەم بەرىپ كەلەدى.
وسى جىلدار ىشىندە 10 مىڭعا جۋىق جاس ۇيلەستىرۋ اگەنتتىگىنەن گرانت ۇتىپ الىپ, ءوز الەۋمەتتىك كاسىپتەرىن اشتى. ەلىمىزدىڭ بارلىق ايماعىنىڭ جاستارى 3 مىڭعا جۋىق الەۋمەتتىك جوبا جاساپ, مەنتورلاردىڭ قولداۋىنا يە بولىپ, جەكە كاسىپكەرلىكتىڭ قىر-سىرىن ۇيرەندى.
بيىل جاستار كورپۋسىن دامىتۋ جوباسى ەلىمىزدىڭ ەڭ ءىرى ەكى ايماعى – قاراعاندى جانە الماتى وبلىسىنىڭ جاستارىنا تاعى دا 310 گرانت ءبولىپ وتىر. ءار ايماققا 155 گرانت تيەسىلى. سونىمەن قاتار جاستار جوبا جاساپ قانا قويماي, اي سايىن 40-60 مىڭ تەڭگە كولەمىندە شاكىرتاقىعا يە بولادى. بۇل دا قازىرگى قيىن جاعدايدا جاستاردىڭ ساعى سىنباس ءۇشىن جاسالعان كومەك.
Zhasproject جوباسىنىڭ تاعى ءبىر ەرەكشەلىگى, جاستار ءوز ونىمدەرىن اۋىل تۇرعىندارىنا بەس اي كولەمدە تەگىن تاراتادى. جوبانىڭ الماتى وبلىسىنداعى قاتىسۋشىسى ايگەرىم تۇراعالدى پانفيلوۆ اۋدانىنىڭ ۇلكەناعاش اۋىلىندا دۇنيەگە كەلگەن. كىشكەنتايىنان ەتى ءتىرى ول مەكتەپتە قوعامدىق جۇمىستارعا, بايقاۋلارعا قاتىسىپ جۇلدەلى ورىنداردى يەلەندى. بالا كەزدەن قولونەرمەن اينالىسقاندى جانى سۇيەتىن. الماتى قالاسىندا ورتا مەكتەپتى ءتامامداپ, 9-سىنىپتان كەيىن ديزاينەر ماماندىعىنا تۇسكىسى كەلگەن. الايدا اتا-اناسى رۇقسات ەتپەگەندىكتەن 11 سىنىپتى تولىق اياقتاپ, قازاق مەملەكەتتىك قىزدار پەداگوگيكالىق ۋنيۆەرسيتەتىندە قازاق ءتىلى مەن ادەبيەتى ماماندىعى بويىنشا ءبىلىم الادى. ستۋدەنت كەزىندە اپكەسى ەكەۋى ەكى جىل ءتۇرلى تويلاردى بەزەندىرۋمەن اينالىستى, گۇلدەن باننەر جاساپ, مەيرامحانالاردىڭ ءسانىن كەلتىرۋدى ۇيرەندى.
2018 جىلى الماتى وبلىسى سارىوزەك اۋىلىنىڭ جىگىتىنە تۇرمىسقا شىققان ايگەرىم نۇرباقىتقىزى ءۇي شارۋاسىنا قاراپ وتىرماي, 3 ايلىق تىگىن كۋرسىن ءتامامدادى. كۋرستان كەيىن ءوز وتباسىنا جانە تۋىستارىنا, دۇنيەگە كەلگەن پەرزەنتىنە ارناپ ءتۇرلى كيىمدەر تىگە باستادى.
– وسىلاي تىگىن ونەرى مەن ديزاينعا ابدەن ماشىقتانىپ الدىم. ءبىر كۇنى جولداسىم Zhasproject جوباسى جايلى ايتتى. جولداسىم داۋرەن جۇمابەك تە 2017 جىلى اتالعان جوبادان گرانت جەڭىپ الىپ, اۋدانداعى مۇگەدەك جاندارعا جاردەم ەتتى. سودان كەيىن مەن دە باعىمدى سىناپ كورۋگە بەل بۋدىم, – دەيدى ايگەرىم.
كارانتينگە بايلانىستى ءۇزىلىس جاريالانعانمەن جاستار كورپۋسىن دامىتۋ جوباسى ءوز جۇمىسىن ارى قاراي جالعاستىرىپ, ايگەرىم جوبادا جەڭىمپاز اتاندى. پاندەمياعا بايلانىستى تۋىنداعان قيىن كەزدە ايگەرىم ءوز ونەرىن حالىقتىڭ يگىلىگىنە پايدالانۋدا. قازىرگى تاڭدا ول اۋىل تۇرعىندارى مەن مەكتەپ وقۋشىلارىنا اي سايىن 100-دەن اسا ماسكا تاراتىپ ءجۇر.
بولاشاقتا ايگەرىمنىڭ ءوزىنىڭ دەربەس برەندىن قالىپتاستىرىپ, تىگىنشىلىك ونەرىن ءارى قاراي دامىتسام دەگەن ماقساتى بار. Zhasproject جوباسى ارقىلى توپپەن بىرىگىپ جۇمىس ىستەۋدى ۇيرەندى. كاسىپكەرلىكتىڭ قىر-سىرىن مەڭگەرىپ, وسى سالادا ءوزىن جەتىلدىرۋدى كوزدەيدى.