سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى قاراعاندى وبلىسىنداعى كاسىپكەرلەرىمەن كەزدەستى. كاسىپورىن يەلەرى دەپۋتاتتارمەن كەزدەسۋدە تاۋارلارعا ىلەسپە قۇجاتتار مەن باسقا دا كوپتەگەن قاعازدارعا بايلانىستى شاعىن بيزنەس قوسىمشا شىعىندارعا ۇشىراپ كەلە جاتقانىن حاباردار ەتتى.
«قازىر جاڭا سالىق زاڭناماسى ازىرلەنىپ جاتىر جانە ءبىز بيزنەسمەندەردىڭ وزىنەن ول زاڭداردى ادامداردىڭ بارىنە نەعۇرلىم ىڭعايلى ەتىپ قالاي جاساۋ كەرەكتىگى تۋرالى پىكىر سۇرايمىز», دەدى سەناتور ەدىل مامىتبەكوۆ.
كاسىپكەرلەردىڭ ايتۋىنشا, نورماتيۆتىك-قۇقىقتىق اكتىلەرگە سايكەس شاعىن عيمارات سالۋ بارىسىندا كاسىپكەرگە مەملەكەتتىك ساۋلەت-قۇرىلىس باسقارماسىنان حابارلاما الۋعا 1-1,5 ميلليون تەڭگە جۇمساۋ كەرەك. ال ول وبەكتىنىڭ قۇرىلىسى دا سول انىقتاما سياقتى سوماعا تۇسەدى. كاسىپكەرلەر سەناتورلاردان جاعدايدى انىقتاپ, ەلدەگى شاعىن جانە ورتا بيزنەستىڭ دامۋىنا كەدەرگى كەلتىرەتىن كەدەرگىلەردى زاڭنامالىق تۇردە جويۋدى سۇرايدى.
سەنات دەپۋتاتى داۋرەن ادىلبەكوۆ ءوز كەزەگىندە مەملەكەت باسشىسىنىڭ قازاقستان حالقىنا جولداۋىندا كاسىپكەرلىكتى قولداۋ بويىنشا بىرقاتار شارالاردى اتاپ وتكەنىن ەسكە سالدى. 2025 جىلعا قاراي ەلدىڭ ءىجو-دەگى شاعىن جانە ورتا بيزنەستىڭ ۇلەسى 35%-عا جەتۋى ءتيىس.
«قازىر ونەركاسىپ ساياساتى تۋرالى زاڭ ازىرلەنىپ جاتىر. بۇگىنگى تاڭدا قاراعاندى وبلىسى – وڭدەۋ ونەركاسىبىنىڭ ۇلكەن كولەمى شوعىرلانعان ەڭ دامىعان وڭىرلەردىڭ ءبىرى. تەك 9 ايدىڭ ىشىندە وبلىسقا 400 ملرد تەڭگەدەن استام ينۆەستيتسيا سالىندى. ءوندىرىس كولەمى 1,8 ترلن تەڭگەدەن استى. بۇل وتە جاقسى كورسەتكىش», دەدى سەناتور سۇيىندىك الداشەۆ.
سەناتورلار سونىمەن قاتار ايماقتاعى بىرقاتار ءىرى ونەركاسىپ ورىندارىن ارالادى. پاترون زاۋىتىندا پارلامەنتشىلەرگە ءبىرىنشى كەزەكتە بيىلعى جىلى ىسكە قوسىلعان تاپانشالارعا ارنالعان وق ءوندىرىسى كورسەتىلدى. كاسىپورىندا جىل سوڭىنا قاراي ەكىنشى كەزەك – «اۆتوماتتى جەلىنى» ىسكە قوسۋ جوسپارلانۋدا. بۇل وندىرىسكە 28 ميللياردتان استام تەڭگە ينۆەستيتسيالاندى.
دەپۋتاتتار قازاقستانداعى ەسكى اۆتوموبيلدەردى كادەگە جاراتۋ جونىندەگى العاشقى زاۋىتتا جانە ارماتۋرا مەن وزگە دە قۇرىلىس ماتەريالدارى وندىرىسىندە دە بولدى. فەرروقورىتپا زاۋىتىندا ەلوردالىق دەلەگاتسياعا وندىرىستەگى جاڭالىقتار كورسەتىلدى. قازىرگى زامانعى تەحنولوگيالار ەۋروپا, وڭتۇستىك-شىعىس ازيا, سولتۇستىك جانە وڭتۇستىك امەريكا نارىقتارىندا ۇلكەن سۇرانىسقا يە فەرروسيليتسي مەن فەررومارگانەتستى شىعارۋعا مۇمكىندىك بەرەدى. زاۋىت 1 300-دەن استام ادامدى جۇمىسپەن قامتىپ وتىر.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ وڭىردەگى كاسىپورىنداردىڭ باسشىلارىنا ايتىلعان بارلىق ماسەلەلەر مۇقيات قارالىپ, زەردەلەنەتىنىن ايتتى.
«سەنات دەپۋتاتتارى بارلىق سىندارلى ۇسىنىستاردى, ونىڭ ىشىندە قازاقستانداعى شاعىن جانە ورتا بيزنەستى دامىتۋ مەن قولداۋ سالاسىنداعى مەملەكەتتىك ساياساتتى جەتىلدىرۋ جانە قۇقىقتىق رەتتەۋ ماسەلەلەرى بويىنشا پارلامەنتتىك تىڭداۋلاردا قارايتىن بولادى جانە قاجەت بولعان جاعدايدا زاڭناماعا وزگەرىستەر ەنگىزىلەدى», دەدى داۋرەن ادىلبەكوۆ.
كوشپەلى وتىرىس قورىتىندىسى بويىنشا ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى شاعىن جانە ورتا كاسىپكەرلىك سۋبەكتىلەرىن قولداۋ جانە دامىتۋ ءۇشىن ەل ۇكىمەتىنە ۇسىنىستار ازىرلەۋگە نيەتتەنىپ وتىر, دەپ حابارلادى سەناتتىڭ ءباسپاسوز قىزمەتى.