الماتى وبلىسىندا ەگىس جيناۋ ناۋقانى قىزىپ تۇر

بۇگىنگە 263 مىڭ گا ءداندى-ماساقتى داقىل (56%), 438 مىڭ توننا ءداندى داقىل جينالدى, ورتاشا ونىمدىلىك گەكتارعا شاققاندا 16,7 تسەنتنەردى قۇراپ وتىر. استىقتى سىيىمدىلىعى 771 مىڭ توننا بولاتىن 265 استىق قويماسى قابىلداۋدا, ونىڭ ىشىندە 58,6 مىڭ توننالىق 2 ليتسەنزيالانعان استىق قابىلداۋ كاسىپورنى دا بار.

وبلىستىق اۋىل شارۋاشىلىعى باسقارماسىنىڭ مالىمەتىنە قاراعاندا قانت قىزىلشاسى 16,1 مىڭ گا القاپقا سەبىلگەن, 500 مىڭ توننا ءونىم الىپ, 48 مىڭ توننادان استام قانت شىعارۋ جوسپارلانعان. بۇگىنگە اقسۋ جانە كوكسۋ قانت زاۋىتتارى تولىعىمەن دايىن, قانت قىزىلشاسىن قابىلداۋ  قىركۇيەكتىڭ 2-ءشى كەزەڭىنەن باستالادى.

سونىمەن قاتار شارۋا قوجالىقتارى كارتوپ جيناۋعا دا كىرىستى. بيىل ورتاشا ونىمدىلىك 176,1 تس/گا قۇراپ وتىر, بۇل وتكەن جىلعا قاراعاندا ءسال جوعارى. بۇگىنگى كۇنى كارتوپ ەگىلگەن 40,3 مىڭ گا جەردىڭ 8,6 مىڭ گەكتارى جينالىپ, ودان 150,8 مىڭ توننا ءونىم الىندى.

بۇگىنگە قاجەتتىنىڭ 75,8%-ى, ياعني 2 ملن توننادان استام ءشوپ جانە 983,7 مىڭ توننا باسقا دا مال ازىعى دايىندالدى. قىستىق جانە جازدىق داقىلدىڭ 42,9 مىڭ تونناسى قۇيىلدى, بۇل قاجەتتى مولشەردىڭ 54,1%-ىن قۇرايدى.

بارلىق تەحنيكا جوندەلىپ, استىق جيناۋعا 1409 كومباين, 180 مەحانيكالىق قىرمان, 260 استىق تيەگىش, 203 ءدان اتقىش, 160 استىق تازالاۋ ماشينالارى مەن 249 اۆتوتارازى تارتىلعان. ءونىم جيناۋ ناۋقانىن دەر كەزىندە اياقتاۋ ءۇشىن ەنەرگەتيكا مينيسترلىگىنەن بولىنگەن 19,1 مىڭ توننا ديزەلدىك وتىننىڭ كەستە بويىنشا 3,9 مىڭ تونناسى جەتكىزىلدى, ونىڭ 1,8 مىڭ تونناسىن اۋىل شارۋاشىلىعى تاۋار وندىرۋشىلەرى الدى. سونىمەن قاتار, شارۋاشىلىقتار نارىقتان  5  مىڭ تونناسىن وزدەرى ساتىپ الدى. اتقارىلعان ءىس-شارالار جيناۋ جۇمىستارىن ۋاقىتىندا جانە ساپالى اياقتاۋعا مۇمكىندىك بەرەدى.

ەسكە سالساق, بيىلعى جىلى وڭىردەگى اۋىل شارۋاشىلىعى داقىلدارىنىڭ ەگىس القابى 7 مىڭ گەكتارعا ۇلعايىپ, 968,6 مىڭ گەكتاردى قۇراعان.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.