تۇرمىسى تومەن وتباسىدان شىققان وقۋشىلاردى كومپيۋتەرمەن قامتاماسىز ەتۋ ءۇشىن 6 ملرد تەڭگە ءبولىندى. بۇل تۋرالى ەلوردا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
ەلوردالىق از قامتىلعان وتباسىدان شىققان وقۋشىلاردى قاشىقتان وقىتۋ كەزىندە كومپيۋتەرلەرمەن جانە روۋتەرلەرمەن قامتاماسىز ەتۋ ءۇشىن 6 ملرد تەڭگە ءبولىندى. بۇل حالىقتىڭ الەۋمەتتىك وسال توپتارىنىڭ بارلىق بالالارىن قامتۋعا مۇمكىندىك بەرەدى. ياعني, قامتىلۋى 34,5 مىڭ بالاعا دەيىن جەتەدى.
"ەلوردالىق بارلىق ءبىلىم بەرۋ ۇيىمدارىندا جاڭا وقۋ جىلى قاشىقتان باستالادى. اتا-انالاردىڭ ءوتىنىشى بويىنشا 1-4 سىنىپ وقۋشىلارى ءۇشىن "كەزەكشى سىنىپتاردىڭ" جۇمىس ىستەۋىن جوسپارلاپ وتىرمىز. بۇل رەتتە بارلىق سانيتارلىق شارالار قاتاڭ ساقتالادى. پەداگوگتەردىڭ 30%-عا جۋىعى شتاتتىق رەجيمدە, ونىڭ ىشىندە كەزەكشى توپتاردا ساباق بەرۋ ءۇشىن جۇمىسقا شىعادى.
حالىقتىڭ الەۋمەتتىك وسال توپتارىنان شىققان بالالاردى قىركۇيەكتە كومپيۋتەرلەرمەن جانە روۋتەرلەرمەن قامتاماسىز ەتەمىز. وسى ماقساتتا 6 ملرد تەڭگە بولىنەدى. بۇدان باسقا, بىرقاتار الەۋمەتتىك شارالار قولعا الىندى. اتاپ ايتساق, جالپىعا مىندەتتى وقۋ قورى شەڭبەرىندە ءاربىر وقۋشىعا مەكتەپ قۇرالدارىن ساتىپ الۋعا 40 مىڭ تەڭگەدەن بولەمىز, 7 مىڭ بالا "مەكتەپكە جول" اكتسياسىمەن قامتىلادى جانە ت. ب.
سونداي-اق, بالاباقشالارداعى "كەزەكشى توپتاردىڭ" جۇمىسىن جالعاستىرۋدى جوسپارلاپ وتىرمىز", دەدى ەلوردا اكىمى التاي كولگىنوۆ.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.