بۇكىلالەمدىك تاەكۆوندو فەدەراتسياسى جانكۇيەرلەر مەن سپورتشىلاردى "تاەكۆوندو ءۇمىتى" ەستافەتاسىنا قاتىسۋعا شاقىرادى.
ونلاين-كامپانيانىڭ باستى ماقساتى – كوروناۆيرۋس ىندەتى كەزىندە ادامداردىڭ ءۇمىتىن وياتۋ. اتالعان يدەيا بۇكىلالەمدىك تاەكۆوندو فەدەراتسياسىنىڭ كورسەتىلىم كومانداسىنا تيەسىلى. بۇكىلالەمدىك تاەكۆوندو فەدەراتسياسىنىڭ پرەزيدەنتى چحۋنۆون چوۋ دا ەستافەتاعا قاتىسادى. ول "COVID" اتاۋى جازىلعان اعاش تاقتايدى سىندىرماقشى.
"شىن مانىندە, بۇل ءبارىمىز ءۇشىن قيىن كەزەڭ. ءبىز ۇيدە جاتتىعۋدامىز. دەسە دە, ءبىز ءبارىمىز ءبىر جانۇيامىز. قاۋىپسىزدىكتى ساقتاپ, مىقتى قالىپتان تانباڭىزدار. جاقىن ارادا كورىسەمىز", دەيدى پرەزيدەنت. ەستافەتاعا كەز كەلگەن ادام قاتىسا الادى. ءوز ۆيدەوڭىزدى Facebook, Instagram جەلىلەرى ارقىلى نەمەسە ەلەكتروندى پوچتا ارقىلى جىبەرە الاسىزدار.