تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى قاشىقتان ءبىلىم بەرۋدى قولداۋ ماقساتىندا ۇيالى بايلانىس وپەراتورلارىمەن بىرلەسىپ, مەكتەپ وقۋشىلارى مەن ستۋدەنتتەرگە جانە مۇعالىمدەرگە ارنالعان ارنايى تاريفتىك جوسپار شىعارۋ ماسەلەسىن پىسىقتاعان ەدى, - دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترىنىڭ مىندەتىن اتقارۋشى باعدات ءمۋسيننىڭ ايتۋىنشا, تاريفتىك جوسپاردا وتاندىق بەينە-كونفەرەنتس بايلانىس جۇيەسىن قوسا العاندا, ءبىلىم جانە عىلىم مينيسترلىگى ماقۇلداعان وتاندىق (جەرگىلىكتى جانە قر اۋماعىنداعى) 380 ءبىلىم بەرۋ رەسۋرسىن شەكتەۋسىز پايدالانۋ قاراستىرىلعان. ء"بىلىم" تاريفتىك جوسپارىنىڭ ابونەنتتىك تولەمى ايىنا 990 تەڭگە. بۇل تاريفتىك جوسپاردى 20 تامىزدان كەيىن قولدانۋعا بولادى. جاڭا تاريفتىك جوسپارعا قوسىلۋ شارتتارىن قازىر ءبىلىم جانە عىلىم مينيسترلىگى پىسىقتاپ جاتىر. سونداي-اق بايلانىس وپەراتورلارى 1 گب ينتەرنەت ترافيگىن قوسىمشا ۇسىنادى", - دەدى باعدات مۋسين.
اتالعان ءىس-شارا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, ءبىلىم جانە عىلىم مينيسترلىگى جانە بايلانىس وپەراتورلارى اراسىندا قازاقستاندىقتاردىڭ ءبىلىم بەرۋ رەسۋرستارىنا شەكتەۋسىز قوسىلۋ جونىندەگى ىنتىماقتاستىق مەموراندۋمىن قابىلداۋ ناتيجەسىندە جۇزەگە اسىرىلعان.
سونداي-اق مينيسترلىك تىركەلگەن بايلانىس وپەراتورلارىمەن بىرگە ءتيىستى تالداۋ جۇرگىزىپ, وپەراتورلاردىڭ مەكتەپتەردەگى ينتەرنەت جىلدامدىعىن 8 مبيت/سەك دەيىن قوسۋ/ارتتىرۋ مۇمكىندىگىن انىقتادى. وسى بويىنشا ءتيىستى اقپارات جەرگىلىكتى اكىمدىكتەرگە جولداندى. جەرگىلىكتى اكىمدىكتەر مەكتەپتەردى ينتەرنەتپەن قامتۋ بويىنشا جۇمىس جۇرگىزۋى كەرەك.