ماقتاارال اۋدانىندا سۋ تاسقىنىنان زارداپ شەككەن ەلدى مەكەندەردەن جالپى 931 باس ءتۇرلى اۋىلشارۋاشىلىعى جانۋارلارىنىڭ ولەكسەلەرى شىعارىلعان بولاتىن. ولەكسەلەر ارنايى ينسەنەراتور اپپاراتى ارقىلى تولىعىمەن جويىلىپ, ەلدى مەكەندەردە بىرنەشە رەت دەزينفەكتسيا جۇمىستارى جاسالعان.
مال ولەكسەلەرىن جويۋ ماقساتىندا وبلىستىق اۋىل شارۋاشىلىعى باسقارماسى, ماقتاارال اۋداندىق اۋماقتىق ينسپەكتسياسى جانە اۋداندىق "ۆەتەريناريالىق قىزمەتى" كمم-ءنىڭ وكىلدەرىنەن ارنايى كوميسسيا قۇرىلىپ, دەر كەزىندە ارەكەت ەتتى. جۇمىس بارىسىندا مال ولەكسەلەرىنىڭ كوپشىلىگى وزبەكستاننان اعىپ كەلگەنى بەلگىلى بولعان ەدى.
931 مال ولەكسەلەرىنىڭ ىشىندە ءىرى قارا 40, ۇساق مالدار 876, جىلقى 9, تۇيە 6 باسقا جەتكەن. وسى جويىلعان مالداردىڭ ىشىندە سۋ باسقان ەلدى مەكەندەردە تۇراتىن 22 ازاماتقا تيەسىلى 144 باس جانۋارلارى انىقتالىپ, ارنايى بەلگىلەنگەن وتەماقىلار "تۇركىستان" كورپوراتيۆتىك الەۋمەتتىك قورى ارقىلى اۋدارىلعان.
ايتا كەتەيىك, تۇيەگە 300 مىڭ تەڭگەدەن باستاپ 1,5ميلليون تەڭگەگە دەيىن, جىلقىعا 160 مىڭنان 380 مىڭ تەڭگەگە, سيىرعا 110 مىڭ تەڭگەدەن باستاپ 220 مىڭ تەڭگەگە, ۇساق مالعا 25 مىڭنان باستاپ 45 مىڭ تەڭگەگە دەيىن, ال ءۇي قۇسىنا 2000 تەڭگەگە دەيىن وتەماقىلار تولەنگەن.