پيرەنەي تۇبەگىندەگى فەمينيزم قوزعالىسىنىڭ بەلسەندى قىزدارى يسپانيا پارلامەنتىنە باسىپ كىرىپ, زالدان كۇشتەپ شىعارىلعانشا ابورت جاساۋ قۇقىعىن ساقتاپ قالۋ جونىندە تالاپ قويدى. بۇل تۋرالى DigitalJournal.com پورتالى حابارلادى.
اكتسيا بار-جوعى ءۇش مينۋتقا سوزىلدى. وسى ۋاقىتتىڭ ىشىندە Femen توبىنىڭ جۇگەنسىز بويجەتكەندەرى ۇستەرىندەگى سىرت كيىمدەرىن شەشىپ تاستاپ, پارلامەنتتىڭ تاڭەرتەڭگى ءماجىلىسىن ءۇزىپ جىبەردى. ولار جالاڭاش قالىپتارىندا ابورتتىڭ ساقتالىپ قالۋى كەرەك ەكەنىن ايعايلاپ ايتا باستادى.
پورتالدىڭ مالىمەتى بويىنشا, ءۇش قىز پارلامەنتتىڭ جوعارعى يسپانيانىڭ ادىلەت ءمينيسترى البەرتو رۋيز-گاللاردون سويلەپ جاتقان كەزدە كىرىپ كەلگەن. قوزعالىس بەلسەندىلەرى سول بويدا: «ابورت دەگەن – قاسيەتتى نارسە, وعان تيىسۋگە بولمايدى», - دەپ ايعايلاعان. ولار بۇل سوزدەردى دەنەلەرىنە دە جازىپ الىپتى. شەشىنگەندە سولاردى كورسەتپەك بولعان.
پارلامەنت كۇزەت ءبولىمىنىڭ قىزمەتكەرلەرى فەمينيستكالاردى مۇمكىندىگىنشە الىپ شىعۋعا تىرىسقاندارىمەن, ولاردىڭ ەكەۋى بۇعان ايرىقشا قاتتى قارسىلىق كورسەتتى. اقىرىندا ءبارى جابىلىپ ءجۇرىپ, جۇگەنسىزدەردى سىرتقى ەسىكتەن شىعارىپ تاستادى.
بۇدان بۇرىن Femen بەلسەندىلەرى يسپانيانىڭ باق-تارىنا وسىنداي بىرنەشە اكتسيا ۇيىمداستىراتىندارىن مالىمدەگەن ەكەن. ولار «ەۋروپا ەلدەرىندەگى پاتريارحاتتىلىقپەن كۇرەسۋگە» بەكەم بەل بۋىپتى. سونىڭ ءبىر كورىنىسى وسىلاي كورىندى.
مۇرات ايتقوجا.
ءبىزدىڭ انىقتاما.
فەميني́زم (لاتىنشا: femina, «ايەل») — جىنىستىق, ناسىلدىك, جىنىستىق قاتىناستاعى باعىتتىلىق, جاس, ەتنوستىق, الەۋمەتتىك مارتەبەلىلىك جاعىنان قىسىمعا ۇشىراعان بارلىق ايەلدەردى قورعاۋ ماقساتىن كوزدەيتىن قوعامدىق-ساياسي قوزعالىس.
فەمينيزم XVIII عاسىردا پايدا بولدى. ونىڭ ايرىقشا جوعارى بەلسەندىلىك العان كەزى وتكەن عاسىردىڭ 60-شى جىلدارىنىڭ اياعىنا تۋرا كەلەدى. قوزعالىستىڭ تەوريا رەتىندە قالىپتاسۋى باتىستا مىناداي ينتەللەكتۋالدىق اعىمدار بويىنشا جۇرگىزىلدى: ليبەرالدى فيلوسوفيا جانە ادام قۇقىعىنىڭ تەورياسى (لوكك, رۋسسو, ميل جانە باسقالار); ادامنىڭ الەۋمەتتىك جانە ساياسي تۇرعىداعى مىنەز-قۇلقىنداعى جىنىستىق ارەكەتىن قاراستىرۋ (زيگمۋند فرەيد, ۆيلگەلم رايح, مارگارەت ميد, فرانكفۋرت مەكتەبىنىڭ فيلوسوفتارى: گەربەرت ماركۋزە جانە تەودور ادورنو). قازىر ونىڭ امەريكالىق مودەلى دە قالىپتاسا باستادى.