اقمولانىڭ ەكى بويجەتكەن قىزى نازىك جاندىلاردىڭ ناماتىنە كەلمەيتىن ناعىز ايۋاندىقتىڭ ايباتىن كورسەتتى. ءبىرى 19 جاسا, ەكىنشىسى 18 جاستاعى بۇل ەكى ساديست وزدەرىنىڭ ءبىر قۇربىلارىن اياۋسىز ۇرىپ-سوعىپ, جەزوكشەلىكپەن اينالىسۋعا كۇشتەپ ءماجبۇر ەتكەن. بۇل تۋرالى «ەكسپرەسس-ك» گازەتى جازدى.
سول كۇنى, بيىلعى جىلعى 8 ناۋرىزدا كوكشەتاۋداعى ءبىر پاتەردە شۋلى توپ مەرەكەنى تويلاپ وتىرادى. ۇستەل ۇستىندەگى الىس-بەرىس, ءسوز قاعىس كەزىندە ەكى قىز ورتالارىنداعى ءۇشىنشى ءبىر قۇربىلارىمەن شالكەم-شالىس سوزگە كەلىپ قالادى. وسى رەنىشتى پايدالانا كەتكەن ەكى قىز ءۇشىنشىسىن جابىلا ۇرىپ, تاس-تالقانىن شىعارادى. سوسىن ونىڭ تەلەفونى مەن اشەكەيلەرىن تىعىپ قويادى. بۇلاردىڭ قورلىعىنان قۇتىلۋ ءۇشىن ءجابىر كورگەن قىز سوڭىندا پاتەردەگى ءبىر جىگىتپەن جىنىستىق قاتىناس جاساسۋعا كەلىسىم بەرەدى. ال بۇل كورىنىستى اناۋ ەكەۋى ۇيالى تەلەفوندارىنا ءتۇسىرىپ الادى. ارتىنان قۇتىرىنعان قىزدار زورلانعان قۇربىلارىن تىر جالاڭاش بيلەپ, ءوز دارەتىن ىشۋگە ءماجبۇر ەتەدى.
وسىدان كەيىن جاڭاعى ەكى قىز تۇسىرىلگەن سيۋجەتتى ينتەرنەتكە سالىپ جىبەرەتىندەرىن ايتىپ, قىزدى تاعى ارانداتۋعا كوشەدى. ولار قىزدى بۇدان كەيىن اقشاعا ءتانىن ساتۋعا كوندىرەدى. ودان تۇسكەن اقشانى وزدەرى قاعىپ الادى.
قاتار جۇرگەن قوس قۇربىسىنان وسىنشالىقتى ءجابىر كورگەن قىز اقىرىندا شىداماي, پوليتسياعا كەلەدى.
كوكشەتاۋدىڭ يۋۆەنالدى سوتى قالاداعى اگرارلىق-تەحنيكالىق كوللەدجدە وقيتىن بۇل ەكى قىزدىڭ ۇستىنەن قوزعالعان قىلمىستىق ءىستى سوڭىنا دەيىن جەتكىزدى. ادىلدىك قىزمەتكەرلەرى ولاردىڭ ءاربىرىن جالپى رەجىمدە جازاسىن وتەۋ تارتىبىمەن 5 جىلعا سوتتادى. سوت كۇشىندە قالدى.
قۇرىش نۇرىمبەت.
ءبىزدىڭ انىقتاما.
فرانتسيادا 18-19 عاسىرلاردا دوناسە́ن الفو́نس فرانسۋ́ا دە سا́د دەگەن اقسۇيەك, جازۋشى جانە فيلوسوف بولعان ادام ءومىر سۇرگەن. ونىڭ اتى تاريحتا «ماركيز دە ساد» دەگەن اتاۋمەن قالعان. ول ادامگەرشىلىك جاعىنان دا, ءدىن جاعىنان دا, قۇقىقتىق ءتارتىپ جاعىنان دە ەشبىر شەكتەۋ كورمەيتىن ابسوليۋتتى بوستاندىقتى ناسيحاتتاعان. ونىڭ ءومىردىڭ نەگىزگى ماقساتى جەكە ادامنىڭ العا ۇمتىلعان تالپىنىسىن قاناعاتتاندىرۋ دەپ بىلگەن.
كەيىن نەمىستىڭ ريحارد فون كرافت-ەبينگ دەگەن سەكسولوگى جۇپتاردىڭ ءبىرىن-ءبىرىن ازاپتاۋ, ءبىرىنىڭ تانىنە ءبىرى اۋىراتىن ادىستەر قولدانۋ ارقىلى جىنىستىق قاتىناستارىن جاساۋ ءۇردىسىن «ساديزم» دەپ اتاعان. وسىدان كەلىپ, بارا-بارا بۇل تەرمين بۇل ماعىناسىنان دا كەڭ اۋقىمدا قولدانىلا باستادى. ول ادامداردىڭ ءبىر-ءبىرىن اياۋسىز قيناپ, ءجابىر كورسەتۋىنە بايلانىستى ايتىلاتىن بولدى. بىراق بۇلاردىڭ بىردە-ءبىرىنىڭ جوعارىداعى فرانتسۋز اقسۇيەگىنە قاتىسى جوق. مۇندا ونىڭ تەك اتى عانا قالعان.