پرەزيدەنت جانىنداعى ورتالىق كوممۋنيكاتسيالار قىزمەتىنىڭ اقپاراتتىق الاڭىندا كوروناۆيرۋس جاعدايىنا بايلانىستى ءباسپاسوز ءماسليحاتى ءوتتى. ءىس-شاراعا دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعى جۇقپالى اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆ, نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا, زەرتحانالىق قىزمەت بويىنشا دەنساۋلىق ساقتاۋ ءمينيسترىنىڭ كەڭەسشىسى جانار سۇلەيمەنوۆا قاتىستى.
جيىن بارىسىندا جۇمابەك بەكەنوۆ ەلىمىزدەگى سيمپتومدى جانە سيمپتومسىز ناۋقاستار سانى 27 مىڭنان اسقانىن اتاپ ءوتتى.
«قازىرگى تاڭدا ەلىمىزدە 27 541 COVID-19 جاعدايى تىركەلىپ وتىر. ونىڭ سيمپتومسىز ءتۇرى – 9 809 ادامدا, سيمپتومدى ءتۇرى – 17 732 ادامدا. سوڭعى تاۋلىكتە 1 471 اۋرۋ تىركەلدى, ونىڭ 507-ءى – سيمپتوممەن, 964-ءى – سيمپتومسىز. قايتىس بولعاندار سانى – 126 ناۋقاس. 10 962 ادام نەمەسە اۋىرعانداردىڭ 62 پايىزى سىرقاتتان جازىلىپ شىقتى. ەلىمىزدىڭ بارلىق ستاتسيونارلىق كارانتينىندە – 1 868 ادام, ءۇي كارانتينىندە – 11 563 ادام جاتىر. COVID-19-بەن اۋىرىپ, اۋرۋحانادا جاتقان ناۋقاستار سانى – 8 052, كۆي جۇقتىرىپ, امبۋلاتوريالىق باقىلاۋدا 8 472 ادام تۇر», دەدى ج.بەكەنوۆ.
ساۋلە قيسىقوۆا ەلورداداعى ەپيدەميالىق جاعدايعا توقتالىپ, مەديتسينالىق ۇيىمدارداعى كەرەۋەتتەردىڭ قوسىمشا سانىن قايتا قاراستىرۋ ارقىلى 825-كە دەيىن جەتكەنىن ايتتى.
«بۇگىندە قالادا 3348 كوروناۆيرۋس ينفەكتسياسى تىركەلدى, سونىڭ ىشىندە وتكەن اپتادا 587 جاعداي تىركەلگەن ەدى. بۇل الدىڭعى اپتاعا قاراعاندا 21 پايىزعا كوپ. كۇندەلىكتى ءوسىم – 3 پايىز. 2291 ناۋقاس جازىلىپ شىقتى. بۇگىنگى كۇنى اۋرۋحانادا 2600 ناۋقاس جاتىر. الدىڭعى اپتامەن سالىستىرعاندا 3 ەسەگە وسكەن. ونىڭ ىشىندە پنەۆمونيامەن اۋىراتىنداردىڭ سانى 92 پايىزدى قۇرايدى. بۇگىندە اۋرۋحاناداعى 126 ەمدەلۋشىنىڭ جاعدايى تۇراقتى. 50 ناۋقاس نەمەسە 40 پايىز وكپە جاساندى جەلدەتۋ اپپاراتىنا قوسىلعان. 12 ماۋسىمنان باستاپ مەديتسينالىق ۇيىمدارداعى كەرەۋەتتەردىڭ قوسىمشا سانى قايتا قاراستىرۋ ارقىلى 825-كە دەيىن جەتتى. توسەك ورىن 53 پايىزعا دەيىن ۇلعايتىلدى. ايتا كەتەتىن تاعى ءبىر جايت, ەلوردادا جەدەل جاردەم بازاسىنداعى كولل-ورتالىققا جۇگىنۋشىلەر سانى كۇرت ءوستى. كولل-ورتالىققا حابارلاساتىندار سانى 3-4 ەسەگە دەيىن ارتتى. وتكەن تاۋلىكتە 3 800 قوڭىراۋ تىركەلىپ, 2 728 ادامعا قىزمەت كورسەتىلدى. مۇندا دا 2,5 ەسە ءوسىم بايقالادى. ينفەكتسيالىق جانە پروۆيزورلىق ستاتسيونارلاردى وتتەگى كونتسەنتراتتارىمەن جانە وزگە دە مەديتسينالىق قۇرالدارمەن جابدىقتاۋ جۇمىستارى ءجۇرىپ جاتىر. بارلىق مەديتسينالىق ۇيىمدار جەكە قورعانىس قۇرالدارىمەن قامتاماسىز ەتىلگەن. دارىلىك پرەپاراتتار دا جەتكىلىكتى كولەمدە بار», دەدى C. قيسىقوۆا.
سونىمەن بىرگە ول قالانىڭ سانيتارلىق دارىگەرىنىڭ شەشىمىنە سايكەس, 23 ماۋسىمدا نۇر-سۇلتان قالاسىندا بارلىق بالاباقشانىڭ جۇمىسى مەنشىك نىسانىنا قاراماستان (مەملەكەتتىك جانە جەكەمەنشىك) جانە ەمحانالارداعى ناۋقاستاردى جوسپارلى قابىلداۋ مەن قاراۋ توقتاتىلاتىنىن تىلگە تيەك ەتتى.
«ونىڭ ىشىندە ەرەسەكتەر مەن بالالاردى پروفيلاكتيكالىق قابىلداۋ, سكرينينگتەر, جوسپارلى ستوماتولوگيالىق, وڭالتۋ قىزمەتتەرى, دەنساۋلىق مەكتەبى, مەديتسينالىق-الەۋمەتتىك قولداۋ, ءماس قۇجات راسىمدەۋ, كۇندىزگى ءبولىمنىڭ جۇمىسى, جوسپارلى تۇردە اۋرۋحاناعا جاتقىزۋعا جولداما بەرۋ, تاۋلىك بويعى جانە كۇندىزدى ستاتسيونار بار. مامانداردىڭ جوسپارلى كونسۋلتاتسيالىق كومەك كورسەتۋى ونلاين فورماتقا اۋىستىرىلادى. ديسپانسەرلىك تىركەۋدە تۇرعان ازاماتتارعا قاجەتتى رەتسەپت ونلاين بەرىلىپ, ءدارى-دارمەك ۇيگە دەيىن جەتكىزىلىپ بەرىلەدى. حالىقتى ۆاكتسيناتسيالاۋ ەكپەنىڭ ۇلتتىق كۇنتىزبەسى بويىنشا جوسپارلى تۇردە جۇرگىزىلەدى. جۇكتى ايەلدەردى قابىلداۋ, ۋدز سكرينينگ جۇرگىزۋ شتاتتىق رەجىمدە قالادى», دەدى س.قيسىقوۆا.