انگليانىڭ مەكتەپ حاتشىسى نيك گيبب ۇكىمەتتىڭ الداعى قىركۇيەك ايىندا بارلىق وقۋشىلاردى اعىلشىن مەكتەپتەرىنە قايتارۋعا "ناقتى نيەتى" بار ەكەنىن ايتتى. بۇل تۋرالى BBC News اگەنتتىگىنە سىلتەمە جاساي وتىرىپ Egemen.kz حابارلايدى.
نيك گيبب Sky News-كە بەرگەن سۇحباتىندا: "ارينە, ءبىز عىلىمي جانە مەديتسينالىق كەڭەستەرگە سۇيەنەمىز. بۇدان بولەك, ءبىزدىڭ مەكتەپتەردە ميلليوننان استام وقۋشى ءبىلىم الادى, سوندىقتان بارلىعىن ساقتىقپەن جاسايمىز", دەيدى مەكتەپ حاتشىسى. ونىڭ ايتۋىنشا, ۇكىمەت مەكتەپتەرمەن تىعىز قارىم-قاتىناستا جۇمىس ىستەيدى. سول سەبەپتى كەڭەس بەرۋگە ءاردايىم نيەتتى ەكەندەرىن جەتكىزدى.