قاراعاندى حالقى تۇڭعىش پرەزيدەنت-ەلباسى نۇرسۇلتان نازارباەۆتىڭ تەزىرەك ساۋىعىپ كەتۋىن تىلەيدى, – دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساي وتىرىپ.
اتاپ ايتقاندا, "قازاقمىس" كومپانيالار توبىنىڭ قىرىق مىڭ ادامنان تۇراتىن ەڭبەك ۇجىمى – كەنشىلەر, كەن بايىتۋشىلار مەن مەتاللۋرگتەر ەلباسىنا سەنىم مەن قۋات تىلەپ, جەدەلحات جولدادى.
"قادىرلى ەلباسى, ءسىزدىڭ تەزىرەك ساۋىعىپ كەتۋىڭىزدى تىلەيمىز! پاندەميا جاعدايىنداعى كۇردەلى كەزەڭدە ءبىز كورونوۆيرۋس ينفەكتسياسىمەن كۇرەسكە باعىتتالعان مەملەكەتتىك باستامالارعا بەلسەندى تۇردە ات سالىسامىز. "قازاقمىس" جۇمىسشىلاردىڭ دەنساۋلىعىن قورعاۋ جانە ءوندىرىستىڭ تىنىس-تىرلىگىن ۇزدىكسىز قامتاماسىز ەتۋ ءۇشىن مۇمكىن بولعان شارالاردىڭ بارلىعىن قاراستىرادى. ءسىز سياقتى رۋحى مىقتى ادام بۇل سىناقتى باعىندىرادى دەپ سەنەمىز!", – دەگەن قولداۋ مەن يگى تىلەك سوزدەرى جازىلعان جەدەلحاتتا.
ەلباسىنىڭ ەڭبەك جانە ساياسي وتانىنداعى ونەركاسىپتىك كاسىپورىنداردىڭ جۇمىسشىلار دا تۇڭعىش پرەزيدەنتتىڭ تەزىرەك ساۋىعۋىن تىلەيدى.
"نۇرسۇلتان نازارباەۆ قاراعاندى وڭىرىنە ءاردايىم ەرەكشە قامقورلىقپەن جانە مەيىرىممەن قارايدى. ءبىزدىڭ تۇڭعىش پرەزيدەنتىمىز قيىن سىناقتاردان ءوتتى. ەلباسىنىڭ بۇل دەرتتى تەز جەڭەتىنىنە سەنىمدىمىز", – دەگەن تىلەك ايتادى ولار.
تۇڭعىش پرەزيدەنتكە دەنساۋلىق تىلەگەن جەدەلحاتتاردى "شۇباركول كومىر" اق, "قازمارگانەتس" كب, "Sary Arka Copper Processing" جشس, "التىنالماس" اق, "كوۋنراد" مىس كومپانياسى" جشس, "التاي پوليمەتاللى" جشس, "گەفەست" تكك, "SAT KOMIR "گك" اق جانە باسقا كومپانيالار دا جىبەردى.
سونىمەن قاتار, "ارسەلورميتتال تەمىرتاۋ" كومپانياسىنىڭ كەنشىلەرى مەن مەتاللۋرگتەرى دە تۇڭعىش پرەزيدەنتكە قولداۋ ءبىلدىردى.
"اۋرۋ كوپ ۇزاماي كەيىن شەگىنەدى دەپ سەنەمىز, ويتكەنى ءسىزدىڭ جۇرەگىڭىز جانە مىنەزىڭىز قازاقستان ماگنيتكاسىنىڭ دومناسىندا شىنىققان. شىن جۇرەكتەن سىزگە تەزىرەك ساۋىعىپ كەتۋدى تىلەيمىز", – دەپ جازادى "ارسەلورميتتال تەمىرتاۋ" كومپانياسىنىڭ قىزمەتكەرلەرى.