قازاقستاننىڭ يندونەزياداعى ەلشىسى دانيار سارەكەنوۆ وڭتۇستىك-شىعىس ازيا ەلدەرى قاۋىمداستىعىنىڭ باس حاتشىسى ليم دجوك حويعا قازاقستان رەسپۋبليكاسىنىڭ اسەان جانىنداعى ەلشىسى رەتىندە اككرەديتتەۋ تۋرالى قر سىرتقى ىستەر ءمينيسترىنىڭ حاتىن تاپسىردى, - دەپ حابارلايدى ءسىم ءباسپاسوز قىزمەتى.
تابىستاۋ راسىمنەن كەيىنگى سۇحبات بارىسىندا قازاقستاندىق ديپلومات قاۋىمداستىقتىڭ وڭتۇستىك-شىعىس ازياداعى كوپجاقتى ىنتىماقتاستىقتى ىلگەرىلەتۋدەگى جانە ايماقتىق ينتەگراتسيانى قامتاماسىز ەتۋدەگى باستى ءرولىن اتاپ ءوتتى.
ەلشى قازاقستاننىڭ قاۋىپسىزدىك پەن تۇراقتى دامۋ سالاسىنداعى جاھاندىق جانە ايماقتىق كۇن ءتارتىبىنىڭ قالىپتاسۋى مەن جۇزەگە اسىرىلۋىنا ەلەۋلى ۇلەس قوسىپ وتىرعانىن, يادرولىق قارۋسىزدانۋ جانە تاراتپاۋ سالاسىنداعى كوشباسشىلاردىڭ ءبىرى ەكەنىن, تەرروريزمنەن ازات الەمگە قول جەتكىزۋ ءتارتىبى كودەكسى مەن يادرولىق قارۋدان ازات الەمگە قول جەتكىزۋ جونىندەگى جالپىعا بىردەي دەكلاراتسيا جانە باسقا دا بىرقاتار ماڭىزدى حالىقارالىق باستامالاردىڭ اۆتورى بولىپ تابىلاتىنىن اتاپ ءوتتى.
وسىعان بايلانىستى ەلشى قازاقستان مەن اسەان اراسىنداعى ىنتىماقتاستىقتى دامىتۋدىڭ ۇلكەن الەۋەتىن اتاپ ءوتتى جانە قاۋىمداستىقپەن ءوزارا ىقپالداستىقتى نىعايتۋعا دايىن ەكەندىگىن جەتكىزدى.
ءوز كەزەگىندە باس حاتشى د.سارەكەنوۆتى اسەان جانىندا ەلشى رەتىندە اككرەديتتەلۋىمەن قۇتتىقتاپ, ورتالىق ازياداعى ەڭ ءىرى ەكونوميكا جانە مەملەكەتپەن ەكىجاقتى فورماتتا دا, شىۇ-اسەان جانە ەاەو-اسەان باعىتىنداعى ءوزارا تۇسىنىستىك تۋرالى مەموراندۋمدار شەڭبەرىندە دە ىنتىماقتاستىقتى دامىتۋعا قىزىعۋشىلىق ءبىلدىردى.
سۇحبات سوڭىندا تاراپتار قازاقستان مەن قاۋىمداستىقتىڭ ءوزارا ءىس-قيمىل بولاشاعىن تالقىلاپ, ىنتىماقتاستىقتىڭ الەۋەتتى باعىتتارىن زەرتتەۋگە جانە انىقتاۋعا كەلىستى.