سپورت سالاسىنداعى جەمقورلىق – قوعام دامۋىنا تونگەن قاۋىپ. ويتكەن, بۇندا الەۋمەتتىك ساياساتىمىزدىڭ نەگىزى جاتىر. سايكەسىنشە, جالپىۇلتتىق بىرلىكتى قالىپتاستىرۋ جانە ادامي كاپيتالدى ارتتىرۋدا ونىڭ ىقپالى زور. سوندىقتان, سالاداعى جەمقورلىق بارشا قوعامنىڭ ورنىقتى دامۋىنا كادىمگىدەي كەدەرگى ەكەنىن ءتۇسىنۋىمىز كەرەك.
وسىنداي جاعدايلاردى بولدىرماۋ ماقساتىندا ۆەلوسپورتتان وليمپيادالىق دايارلاۋ ورتالىعى ەسەپ ايىرىسۋدىڭ زاماناۋي فورماتىنا كوشتى. ياعني, بۇرىن اقشا ىسساپارعا اتتاناتىن سپورتشى مەن باپكەردىڭ شوتىنا تۇسسە, ەندى تىكەلەي كۇتىپ الۋشى نە قىزمەت كورسەتۋشى تاراپقا جىبەرىلەدى. ورتالىقتاعى مەملەكەتتىك ساتىپ الۋعا قاتىستى شارالار دا اشىق جانە جاريالى تۇردە ۇيىمداستىرىلىپ ءجۇر. ءتيىستى اقپاراتتار سايتقا سالىنادى. سوعان سايكەس, كەز كەلگەن ادام ونى قاراي الادى.
جەمقورلىقتىڭ تىيىلماۋىنا تاعى ءبىر سەبەپ – جالاقىنىڭ ازدىعى. ءسوزدىڭ شىنى كەرەك, سپورت سالاسىنداعى ايلىق كولەمى سالىستىرمالى تۇردە تومەن. سايكەسىنشە, ءبىلىمى مەن بىلىكتىلىگى جاراسىپ تۇرعان جاستار باسقا جۇمىسقا اۋىسىپ كەتىپ جاتادى. سوندىقتان, ولاردىڭ ەڭبەك اقىسىنا قاتىستى ماسەلەنى قاراستىرىپ, تەزىرەك شەشىمىن تابۋ قاجەت. بۇل باعىتتاعى جۇمىستار ءجۇرىپ جاتىر دا. ال, جاڭا ماماندار قىزمەتكە بايقاۋ ارقىلى قابىلدانادى. وعان قاتىستى اقپارات تا ءبىزدىڭ ورتالىق پەن سپورت جانە دەنەشىنىقتىرۋ ىستەرى كوميتەتىنىڭ سايتىندا جاريالانادى.
بۇعان قوسا, پارا الۋ جاعدايلارىنىڭ الىن الۋ ءۇشىن مەكەمە ىشىندە ارنايى اقپاراتتىق بۇرىش جانە ازاماتتار شاعىمىنا ارنالعان جاشىك بار. ال «سارىارقا» سپورتتىق كەشەنىنىڭ سىرتىندا ورنالاسقان الىپ ەكرانداردا جەمقورلىق پەن ونىڭ جازاسىنا قاتىستى بەينەروليك ويناتىلادى. بۇل جۇمىستار ەلورداداعى سىبايلاس جەمقورلىققا قارسى ءىس-قيمىل اگەنتتىگى دەپارتامەنتىمەن بىرلەسىپ جۇزەگە اسىرىلىپ جاتىر. ءدال وسى اگەنتتىك ماماندارى ءبىزدىڭ مەكەمە ۇجىمىمەن كەزدەسىپ, ارنايى جينالىس وتكىزەدى. ونىڭ بارىسىندا زاڭ بۇزۋشىلىقتىڭ وتاندىق سپورتقا اكەلەتىن زالالى جان-جاقتى تۇسىندىرىلەدى.
قىسقاسى, جەمقورلىقتىڭ تۇبىنە بالتا شابۋ سالادا قىزمەت ەتەتىن ءار مامانننىڭ تانىم-تۇيسىگى مەن ونىڭ كۇندەلىكتى ارەكەتىنە بايلانىستى. ەگەر بارلىعى ءوز ىسىنە ادال بولىپ, قالتانىڭ قامىن كۇيتتەمەسە وتاندىق سپورت تا قارىشتاپ داميتىنى انىق. ال بۇل ماسەلەگە نەمقۇرايلى قاراساق, ءوز وتباسىمىزعا, ءوز ۇجىمىمىزعا, قالا بەردى, ءوز ەلىمىزگە جاساعان ۇلكەن قاستاندىق بولىپ تابىلادى.
اسلان قاجەنوۆ,
ۆەلوسپورتتان وليمپيادالىق دايارلاۋ ورتالىعىنىڭ ءباسپاسوز قىزمەتكەرى