بيىلعى جىلى «رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعى» مەملەكەتتىك كاسىپورنىنىڭ بولجامىنا سايكەس, جامبىل وبلىسىنداعى 10 010 گەكتار القاپقا ساياق شەگىرتكەگە قارسى وڭدەۋ جۇمىستارىن جۇرگىزۋ جوسپارلانعان.
بۇگىنگى تاڭدا حيميالىق وڭدەۋ جۇمىستارى مويىنقۇم اۋدانىندا 1300 گەكتار, شۋ اۋدانىندا 1020 گەكتار, مەركى اۋدانىندا 1060 گەكتار القاپقا جۇرگىزىلىپ, تولىعىمەن اياقتالعان. ال, قورداي اۋدانىندا 985 گەكتار, ت.رىسقۇلوۆ اۋدانىندا 950 گەكتار القاپتا وڭدەۋ جۇمىستارى جالعاسۋدا. جالپى, اعىمداعى جىلى وڭىردە ساياق شەگىرتكەلەرگە قارسى حيميالىق وڭدەۋ جۇمىستارىن جۇرگىزۋگە جەرگىلىكتى بيۋدجەتتەن 15,3 ميلليون تەڭگە بولىنگەن.
جامبىل وبلىستىق اۋىل شارۋاشىلىعى باسقارماسىنىڭ مالىمەتىنشە, بيىلعى كوكتەم مەزگىلىنىڭ سالقىن بولۋىنا بايلانىستى وڭدەۋ جۇمىستارى جىلداعىدان كەش باستالعان. سەبەبى كوكتەم مەزگىلىنىڭ سالقىندىعى ساياق شەگىرتكەلەردىڭ شىعۋ كەزەڭىن جانە ءبىرىنشى كەزەڭنەن ەكىنشى كەزەڭگە تارالۋ مەرزىمىن ۇزارتقان.
جامبىل وبلىسى