بۇگىن "Qazaqstan" رترك اق الماتى فيليالىنىڭ ديرەكتورى ساۋلە جيرەنشينا اتالمىش تەلەارنا قىزمەتكەرلەرىنەن كوروناۆيرۋستىق ينفەكتسيا تابىلۋىنا بايلانىستى ناقتى اقپارات بەردى. ويتكەنى, تەلەارناداعى ارىپتەستەرىمىزدەن ىندەت تابىلۋىنا بايلانىستى الىپقاشتى اڭگىمەلەر جەلدەي ەسىپ تۇر.
ساۋلە جيرەنشينا ارناۋلى بريفينگ-چاتتا باق وكىلدەرىنىڭ سۇراقتارىنا جاۋاپ بەرە وتىرىپ: ء«بىز پروفيلاكتيكالىق تەكسەرۋ جۇرگىزدىك, ناتيجەسىندە ەشقانداي ىندەت بەلگىسى بولماعانىمەن, ۆيرۋس جۇقتىرعانداردىڭ بار ەكەندىگى انىقتالدى. بىردەن سەس-كە حابار بەرىلدى, ولار ناۋقاس دەپ تابىلعانداردى وقشاۋلادى. كەيبىرەۋلەرى 3-4 كۇن اۋرۋحاناعا جاتىپ شىقتى, ولاردى كت-عا ءتۇسىرىپتى, وكپەلەرى تازا ەكەندىگى انىقتالعان. جالپى العاندا كوبى ۇيلەرىندە, ەشقانداي اۋرۋ دا, تەمپەراتۋرا جوق دەيدى. كارانتيندەگىلەرمەن ورتاق چاتىمىز بار. تەك ءبىر وپەراتورىمىزدىڭ ىستىعى ءبىر ءتۇسىپ, ءبىر كوتەرىلىپ تۇر. ول اۋرۋحانادا جاتىر», دەدى.
ساۋلە جانىبەكقىزى ونىڭ الدىندا ايتىلىپ جۇرگەندەگىدەي ەشقانداي قايعىلى وقيعا ورىن الماعاندىعىن, كىسى ءولىمى بولماعاندىعىن مالىمدەي كەلە: «پروفيلاكتيكالىق تەستىلەۋدىڭ ناتيجەسىندە 24 ادامدا كوروناۆيرۋستىق ينفەكتسيا بار ەكەنى انىقتالدى. ولاردىڭ ىشىندە جۋرناليستەر, وپەراتورلار, جۇرگىزۋشىلەر مەن باسقا دا تەحنيكالىق قىزمەتكەرلەر بار. ولارمەن بايلانىستا بولعاندار بىردەن وقشاۋلانىپ, تەست ناتيجەسى تەرىس ناتيجە بەرگەنىمەن كارانتينگە جىبەرىلدى», دەدى.
الماتى فيليالىنىڭ ديرەكتورى تەلەارنا عيماراتى كارانتينگە جابىلعاندىعىن راستادى.
الماتى