ماۋلەن اشىمباەۆتىڭ توراعالىق ەتۋىمەن سەنات بيۋروسىنىڭ وتىرىسى ءوتىپ, وندا پالاتانىڭ 11 ماۋسىمعا جوسپارلانعان وتىرىسىنىڭ كۇن ءتارتىبى بەكىتىلدى. بۇل تۋرالى سەناتتىڭ ءباسپاسوز قىزمەتى حابارلادى.
سەناتورلار الداعى وتىرىستا قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسى جوباسىن جانە دەنساۋلىق ساقتاۋ ماسەلەلەرى جونىندەگى ىلەسپە زاڭ جوباسىن قاراۋدى جوسپارلاپ وتىر.
بۇعان قوسا وتىرىستا زاڭنامالىق اكتىلەرگە اتقارۋشىلىق ءىس جۇرگىزۋدى جانە قىلمىستىق زاڭنامانى جەتىلدىرۋ, تسيفرلىق تەحنولوگيالاردى رەتتەۋ, تۇتىنۋشىلاردىڭ قۇقىقتارىن قورعاۋ, سونداي-اق حالىقارالىق اۆتوموبيل تاسىمالدارىن قاداعالاپ وتىرۋ ماسەلەلەرى بويىنشا ەنگىزىلەتىن تۇزەتۋلەر قارالادى.
سونىمەن قاتار بيۋرودا ماجىلىستەن كەلىپ تۇسكەن زاڭ جوبالارى سالالىق كوميتەتتەرگە ءبولىنىپ بەرىلدى.
قارجى جانە بيۋدجەت كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋديتورلىق قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا باس كوميتەت بولىپ بەلگىلەندى.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس-احۋالدى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ودان ءارى پىسىقتاۋمەن اينالىسادى.
ال «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە بەكىتىلدى.
باس كوميتەتتەرگە سەناتتىڭ باسقا كوميتەتتەرىنىڭ ۇسىنىستارىن قورىتۋ جانە وسى قۇجاتتار بويىنشا قورىتىندىلار دايىنداۋ تاپسىرىلدى.