نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ ۇجىمى, 1 ماۋسىم – حالىقارالىق بالالاردى قورعاۋ كۇنىنە وراي «باقىتتى بالالىق» اتتى ونلاين كونتسەرت وتكىزىپ, بۇلدىرشىندەرگە مەرەكەلىك كوڭىل-كۇي سىيلادى.
ونلاين كونتسەرتكە قازاق وركەسترى, ۇرلەمەلى وركەستر, سيمفونيالىق وركەستر, «الەم» ەسترادالىق بي ءانسامبلى, «شالقىما» حالىق بي ءانسامبلى, حالىقارالىق بايقاۋلاردىڭ لاۋرەاتتارى التىنبەك ءابىلدا, ايدىن جۇماباي, اكىمحان ماجەنوۆ, الۋا قالىمبەكوۆا, ايگەرىم نارتۇيەەۆا, كوركەم شولوشوۆا, ايجان قابىلدانوۆا, مايرا ونەر مەكتەبىنىڭ وقۋشىسى اباي اسكەروۆ قاتىسىپ, «اينالايىن», «نيچەگو نا سۆەتە بولشە نەتۋ», «لەبەدي», «بالدىرعان», «كورۇعلى» سىندى ت.ب تۋىندىلاردى تارتۋ ەتتى.
سونداي-اق, كەش باسىندا ەلوردالىق فيلارمونيانىڭ باس ديرەكتورى ەرلان ەرعازى ۇلى داكەنوۆ جانە اتالمىش ۇجىم اتىنان بالالار قامقورشىسى حاليدا قۋانىشقىزى بىلكيلوۆا ينكليۋزيۆتى ءبىلىم بەرەتىن 65 مەكتەپ-گيمنازياسىنىڭ دتسپ دياگنوزى بار ەرەكشە بالالارىن مەرەكەلەرىمەن قۇتتىقتاپ, سىيلىقتار تابىستادى.
– بۇگىنگى ءبۇلدىرشىن, ەرتەڭگى ەل ابىرويىن اسقاقتاتىن تۇلعا ەكەنى بارشامىزعا ءمالىم. اتالمىش كونتسەرتتىڭ نەگىزگى ماقساتى دا سول – بالالارعا ونەر ارقىلى ونەگە كورسەتىپ, ولارعا قامقورلىق تانىتۋ. ەندەشە ءبىز بارشا بالدىرعاندارعا جارقىن بولاشاق, باقىتتى بالالىق شاق تىلەيمىز! بالالىق شاقتىڭ بال ءدامىن تاتىپ, سۇلۋ ساز, اسەم ءان, كۇمبىرلەگەن كۇي تىڭداپ مەيىرىممەن وسكەن بالا ەرتەڭ ەلگە قامقور ازامات بولاتىنى اقيقات. الەمنىڭ سىڭعىرى بولعان ءسابي كۇلكىسى اتا-انانىڭ جانىن جادىراتىپ, كوڭىلىنە قۋانىش ۇيالاتاتىنى تاعى بار. بالانىڭ بولاشاعى ونىڭ اينالاسىنداعى ادامدارعا بايلانىستى. سوندىقتان, ولارعا قامقورلىق تانىتۋ, ولارعا قورعان بولۋ ادامزاتتىڭ اسىل مىندەتى, - دەيدى ەلوردالىق فيلارمونيانىڭ باس ديرەكتورى ەرلان ەرعازى ۇلى.