باتپانداپ اۋرۋ كىرگەنىنە – الەمگە الەك كىرگەنىنە اۋەلگىدە سەكەمدەنىپ قاراساق تا, كارانتين شارالارىنىڭ كەيىنگى كەزدە قاتاڭ ساقتالماۋى اجەپتاۋىر الاڭداتا باستادى. «ەلەمەگەن اۋرۋ جامان, ەسكەرمەگەن داۋ جامان» نەمەسە «اۋرۋدى ەلەمەگەن ولەر, داۋدى ەلەمەگەن تولەر» دەگەن حالىقپىز. ايتسە دە, قازىرگى كەپ – وسى.
سوڭعى دەرەكتەر بويىنشا, ەلىمىزدىڭ كەيبىر وڭىرلەرىندە COVID-19 جۇقتىرعاندار سانى كۇرت ارتىپ, 9 مىڭعا جۋىقتادى. اسىرەسە الماتى مەن نۇر-سۇلتان قالالارىندا, اتىراۋ وبلىسىندا اتالعان ىندەت ءورشي ءتۇستى. مەملەكەت تاراپىنان ىندەتتىڭ ىندەتە تارالماۋى ءۇشىن بارلىق شارالاردىڭ دەر كەزىندە قولعا الىنۋى ءبىرشاما ۋاقىت بويى بۇل اۋرۋدىڭ بەتىن قايتارۋعا سەپتەستى. دەگەنمەن, حالىقتىڭ ناپاقاسىز قالماۋى دا ەسكەرىلىپ, كەيبىر مەكەمەلەر مەن ۇيىمداردىڭ قىزمەتىن قايتا باستاۋىنا مۇمكىندىك بەرىلدى. بىراق مۇنىڭ بارلىعى كارانتيندىك تالاپتاردىڭ اياسىندا ەكەنى ەسكەرۋسىز قالعانداي. سوڭعى كۇندەرى ەلوردانىڭ وزىندە سانيتارلىق نورمالاردى ساقتاماعانى ءۇشىن 26 نىسان جابىلىپ, كەيبىرى كەمشىلىكتەرىن تۇزەگەن سوڭ جۇمىستارىن قايتا جالعاستىرعان.
سونداي-اق قاراعاندى ءوڭىرىنىڭ بارلىق كاسىپورىنى كۇشەيتىلگەن سانيتارلىق رەجىمگە كوشىرىلسە, تۇركىستان وبلىسى كارانتيندى 8 ماۋسىمعا دەيىن سوزدى. ال اقمولا وبلىسىنىڭ تسەلينوگراد اۋدانىنا قاراستى تالاپكەر اۋىلىندا ءبىر جاسار بالانىڭ اتالعان دەرتتى جۇقتىرىپ الۋى كوروناۆيرۋسقا قاتىستى ەنجارلىق تانىتۋعا بولمايتىنىن كورسەتىپ وتىر.
دەسەك تە ازاماتتارىمىز ساقتىق شارالارىن ۇمىتقان سىڭايلى. كوشەدە قوزعالىس كوبەيسە دە, كوپشىلىك بەتپەردەسىز جۇرگەنىن اڭداۋ قيىن ەمەس. وسىعان وراي مەملەكەت باسشىسى قاسىم-جومارت توقاەۆ «قالالاردا كارانتين شارالارى ساقتالماعاندىقتان ىندەت جۇقتىرعاندار سانى ارتىپ بارادى. ۇكىمەت, وبلىس جانە قالا اكىمدەرى جاعدايدى رەتتەۋى كەرەك. كوپشىلىك ورىنداردا, قوعامدىق كولىكتەردە بەتپەردە تاعۋ مىندەتتى. ازاماتتاردىڭ دەنساۋلىعىن ساقتاۋ ءۇشىن ناقتى شەشىمدەر قابىلداۋ قاجەت» دەپ جازعان بولاتىن تۋيتتەردەگى پاراقشاسىنا.
ەكى دۇنيە اراسىن ءبىر قادام قىلعان قاتەرلى ىندەتتى سان ساققا جۇگىرتىپ, بەيقامدىق تانىتۋعا بولمايدى. بىراق اۋىرعان كىسىگە بال دا اششى بولاتىنىن اۋىرماعان ادام قايدان ءبىلسىن؟! باسقا تۇسكەندە عانا باسپاقشىل بولاتىن ادەتىمىز بارىن دا جوققا شىعارمايمىز. سىنىقتان وزگەنىڭ ءبارى جۇعاتىنىن استە ۇمىتپاۋ قاجەت. ايتپەسە اسقىنعان اۋرۋ ناسىرعا شاباتىنىن اق جەلەڭدى ابزال جاندار ايتۋىنداي-اق ايتىپ كەلەدى. دەگەنمەن جاز كەلدى, جازبەن بىرگە تازا اۋاعا تىنىستاۋعا شىققان تۇرعىنداردا ەسەپ جوق. ەركىندىك پەن ەرەنسىزدىك ەگەسكە تۇسكەندە, ەرەنسىزدىك جەڭىپ شىققانداي اسەر قالدىرادى. ال مۇنىڭ سوڭى كارانتيننىڭ قايتا كۇشەيتىلۋىنە, وقشاۋلانۋ جاعدايىنىڭ سوزىلۋىنا الىپ كەلۋى دە ىقتيمال.
كۇندەلىكتى ناۋقاستاردى قابىلداپ جاتقان ينفەكتسيونيست-دارىگەر گۇلميرا قالماعانبەتوۆانىڭ ايتۋىنشا, حالىق ءالى دە ارا قاشىقتىقتى ساقتاۋى مىندەتتى.
– قازىر قالادا دا, دالادا دا ادامدار كارانتيننىڭ اۋەلگى تالاپتارىن ساقتاماي, بوساڭسي باستاعانىن بايقاپ ءجۇرمىز. سونىڭ سالدارى بولار, ەلىمىزدە ۆيرۋس جۇقتىرۋشىلار قاتارى ازايار ەمەس. سوندىقتان مەيلىنشە ۇيدە بولىپ, ءۇي جاعدايىندا وقشاۋلانعان دۇرىس دەر ەدىم. سونىمەن بىرگە بەتپەردە رەجىمىن دە بۇزۋعا بولمايدى. بايقاساڭىز, قازىر كوپتەگەن ازاماتتار بەتپەردەنى قالتاسىنا سالىپ جۇرەدى, نە يەگىنە تاعىپ الادى. بۇل – دۇرىس ەمەس. بەتپەردە ەڭ ءبىرىنشى ءوزىڭىزدى, وتباسىڭىزدى, ەت جاقىندارىڭىزدى قورعاۋ ءۇشىن كەرەك. ودان كەيىن ءوزىڭىز ءومىر سۇرەتىن ورتانىڭ قاۋىپسىزدىگى ءۇشىن دە وزەكتى ەكەنىن ەسكەرگەن ءجون. سول سەبەپتى جەكە گيگيەنالىق تازالىقتى ساقتاپ, ۇنەمى قولدى جۋىپ, انتيسەپتيك قۇرالدارىن قولدانۋعا كەڭەس بەرەمىز, – دەيدى گۇلميرا ساپارعاليقىزى.
ال قالا اۋلاسىندا شۋلاعان بالا-شاعا مەن ولاردى جاقىننان باعىپ وتىرعان اتا-انالارعا زەر سالساڭىز, ءبىر بەيعامدىقتى بايقار ەدىڭىز. البەتتە ءبارى بىردەي ەمەس. بەتپەردەسىن شەشپەي, قولىنا مەديتسينالىق قولعاپ كيگەن جانداردىڭ ءبىرى ايدانا ەلدوسقىزى قالا كوشەلەرىندەگى كوپشىلىكتىڭ بەتپەردەسىز جۇرۋىنە قارسىلىعىن جاسىرمادى.
«زاڭ, تالاپ – بارشاعا ورتاق. ءبىرىمىز بويۇسىنىپ, ءبىرىمىز قۇلاققا ىلمەيتىن بولساق, ونىڭ نەسى كارانتين؟! بۇل مەملەكەتتىڭ دە كارانتيندى ساعىزداي سوزۋىنا الىپ كەلەدى. ويتكەنى جالپى حالىقتىڭ اماندىعىنا مەملەكەت جاۋاپ بەرەدى. ادامدار دا وزدەرىنىڭ جاۋاپكەرشىلىگىن سەزىنۋى, سوعان داعدىلانۋى قاجەت دەپ ويلايمىن» دەيدى ول.
راسىندا, «سىنىق اربا كوپ كوشەر» دەگەندەي, دەنى دىمكاس قوعامدا بۇل دەرتتىڭ بۇيداسىنا يە بولا الماۋ قاۋپى باسىم. سوندىقتان كۇننىڭ شىجعىرعان ىستىعىنا قاراماستان, بەتپەردە كيىپ, ءوزىڭىزدىڭ دە, وزگەنىڭ دە جايىن ويلاعان ءلازىم. مامانداردىڭ دا, ازاماتتاردىڭ دا ورتاق تىلەگى وسى ارادا توقايلاسادى.