بەلگىلى پيانيست, پەداگوگ, «FORTE-TRIO» مەملەكەتتىك تريوسىنىڭ جەتەكشىسى تيمۋر ۋرمانچەەۆ live فورماتتا تىكەلەي ەفيردە ونەر كورسەتتى. بۇل كەشتە قازاق, ورىس, ەۋروپا كلاسسيكاسىنىڭ جاۋھارلارى مەن تانىمال رەترو اندەرى ورىندالدى.
تيمۋر ۋرمانچەەۆتى بۇل جوبادا تەك پيانيست رەتىندە عانا تانىعان جوقپىز. مۋزىكانت ءار شىعارمانى باستاماس بۇرىن كومپوزيتورلار مەن تۋىندىنىڭ ءتول تاريحىن قىزعىلىقتى ەتىپ اڭگىمەلەپ, ونەر جايىندا جاڭا ءبىر سىر شەرتتى. بۇل كورەرمەندەرگە مۋزىكانى تەرەڭىرەك تۇسىنۋگە, اۆتوردىڭ ىشكى تولعانىسىن وزىنشە سەزىنۋگە مۇمكىندىك بەردى.
– كونتسەرتتىڭ فورماتى وتە ەرەكشە: باعدارلاما بويى (ەكى ساعاتقا جۋىق) بىردە-ءبىر سەكۋند بويىڭدى ەركىن ۇستاۋعا مۇمكىندىك جوق, ويتكەنى ۇنەمى كورەرمەننىڭ نازارىندا بولاسىڭ. باسقا ارتىستەر ونەر كورسەتىپ, نە بولماسا جۇرگىزۋشى سويلەگەن ۋاقىتتا ساحنانىڭ سىرتىنا شىعۋعا دا مۇمكىندىك تابىلمايدى. ءتىپتى كورەرمەننىڭ ىقىلاسى سەزىلەتىن قول شاپالاقتارى ەستىلمەيدى. بۇل قۇبىلىس جات كورىنگەنمەن, وتە قىزىق جانە جاڭا اسەر سىيلايدى! كارانتين كەزىندەگى ونلاين كونتسەرتتەر ارتىستەرگە كورەرمەندەرمەن بايلانىستى جوعالتپاي, ورىنداۋشىلىق شەبەرلىكتى شىڭداۋعا جاقسى مۇمكىندىك بەردى. بۇعان قوسا, ونەرسۇيەر قاۋىم دا ۇيدەن شىقپاي, سۇيىكتى ارتىستەرىنىڭ ونەرىن تاماشالاي الادى. تىكەلەي ەفيردەگى كونتسەرتتەر كورەرمەندەر اراسىندا جوعارى سۇرانىسقا يە بولدى. ءتىپتى قازىرگى ۋاقىتتا, ءبىز, ارتىستەر, تىڭدارمان قاۋىم كارانتيننەن كەيىن كونتسەرتتىك زالدارعا كەلە مە ەكەن دەپ الاڭدايمىز, – دەيدى ول.
كونتسەرتتە ۆوكالدىق مۋزىكا اسپاپتىق اۋەنمەن تاماشا ۇيلەستى. ونىڭ شاقىرۋىمەن كونتسەرتتىك باعدارلاماعا تريونىڭ مۇشەلەرى, تالانتتى مۋزىكانتتار – سكريپكاشى دينارا بازارباەۆا-ساحامان جانە ۆيولونچەلشى مۇرات ناربەكوۆ, سونداي-اق بەلگىلى ءانشى ازامات جىلتىركوزوۆ قاتىستى. ۆوكاليست قازاقتىڭ حالىق ءانى «القوڭىر», ب.شەرەمەتەۆتىڭ «يا ۆاس ليۋبيل», ە.گريگتىڭ «ليۋبليۋ تەبيا», ف.شۋبەرتتىڭ «ك مۋزىكە» جانە ت.ب. كوپتەگەن شىعارمالاردى جان-دۇنيەسىمەن ورىندادى. كەشتە بارشاعا تانىس كومپوزيتسيالار شىرقالدى, اتاپ ايتقاندا, «ياپۋراي», پ.ي.چايكوۆسكيدىڭ «ششەلكۋنچيك» بالەتىنەن ينتەرمەتستسو, م.راۆەلدىڭ «سكەرتسو» جانە وزگە دە تۋىندىلار تىڭدارمانعا جول تارتتى.
ەرەكشە قوشەمەتپەن قارسى العان ونەرسۇيەر قاۋىم كەرەمەت مۋزىكا, ەرەكشە جىلى, جايلى اتموسفەرا ءۇشىن العىس ايتىپ, مۋزىكانتتار مەن كورەرمەن اراسىنداعى قاشىقتىق سەزىلمەگەنىن ايتىپ, قوشەمەت ءبىلدىرىپ جاتتى. «مۋزىكانتتاردى وسىنشالىقتى جاقىن كورىپ, ورىنداۋ كوركەمدىگىن, بارشا قيمىل-قوزعالىستىڭ اسەم كەربەزدىگىن, سەزىمتال جۇزدەرىن, ءتىپتى تريونىڭ جوعارى كاسىبيلىگىنە قاراماستان, ارتىستەردىڭ ءسال قوبالجىعان ساتتەرىن باقىلاۋ ەرەكشە كوڭىل كۇي سىيلادى!», دەدى تىڭدارماننىڭ ءبىرى.